ສະຫຼອງສ້າງຕັ້ງສາຍພົວພັນການທູດລາວ-ໄທ 70 ປີ ຊູສົ່ງເສີມການຄ້າ-ການລົງທຶນ

​ເວທີແລກປ່ຽນຄໍາຄິດ-ຄໍາເຫັນ ພາຍໃຕ້ຫົວຂໍ້: “ກາລະໂອກາດ ແລະ ສິ່ງທ້າທາຍ ໃນການຮ່ວມມືເສດຖະກິດ ລາວ-ໄທ ໃນການດຳລົງຊີວິດປົກກະຕິແບບໃໝ່”. ຊຶ່ງຈັດໂດຍສະຖາບັນການຕ່າງປະເທດ, ກະຊວງການຕ່າງປະເທດ ແລະ ສະຖານເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ. ເປັນໜຶ່ງໃນກິດຈະກໍາສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ໄທ ຄົບຮອບ 70 ປີ (19 ທັນວາ 1950 ເຖິງ 19 ທັນວາ 2020) ເພື່ອເສີມຂະຫຍາຍວິໄສທັດລະຫວ່າງພາກລັດ ແລະພາກທຸລະກິດ ຂອງ ສປປ ລາວ ແລະ ປະເທດໄທ ໃນການຊອກຫາຊ່ອງທາງ ແລະ ທ່າແຮງ ຊຸກຍູ້ສົ່ງເສີມການຄ້າ ແລະ ການລົງທຶນລະຫວ່າງສອງປະເທດທີ່ໄດ້ຮັບຜົນກະທົບຢ່າງໜັກຈາກການລະບາດຂອງພະຍາດໂຄວິດ-19.

​ເວທີດັ່ງກ່າວຈັດຂຶ້ນໃນວັນທີ 10 ກຸມພາ ນີ້, ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ນະຄອນຫຼວງວຽງຈັນ, ກ່າວເປີດກອງປະຊຸມໂດຍ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ແລະທ່ານ ເຈດສະດາ ກະຕະເວທິນ ເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ, ມີຜູ້ເຂົ້າຮ່ວມຈາກທັງພາກລັດ ແລະ ທຸລະກິດຂອງລາວ ແລະ ໄທ ທັງໝົດຫຼາຍກວ່າ 100 ທ່ານ.

​ເວທີການປະຊຸມຄັ້ງນີ້ ປະກອບມີ 2 ວາລະຄື: 1) ພາບລວມຂອງການຮ່ວມມືດ້ານເສດຖະກິດລາວ-ໄທ ໃນໄລຍະຜ່ານມາ, 2) ສິ່ງທ້າທາຍໃນການຮ່ວມມືດ້ານເສດຖະກິດ ໃນໄລຍະການດໍາລົງຊີວິດຮູບແບບໃໝ່, ທ່າແຮງໃນການຟື້ນຟູ ແລະ ສົ່ງເສີມເສດຖະກິດ ລາວ-ໄທ. ທັງນີ້, ສປປ ລາວ ແລະ ຣາຊະອານາຈັກໄທ ແມ່ນເປັນປະເທດບ້ານໃກ້ເຮືອນຄຽງ ທີ່ມີຮີດຄອງປະເພນີ, ວັດທະນະທໍາ ແລະ ພາສາປາກເວົ້າທີ່ຄ້າຍຄືກັນ, ລາວ ແລະ ໄທ ມີຊາຍແດນຕິດຈອດກັນຄວາມຍາວຫຼາຍກວ່າ 1.835 ກິໂລແມັດ, ປະຊາຊົນສອງປະເທດ ລາວ-ໄທ ໄດ້ມີການໄປມາຫາສູ່ກັນ, ຄ້າຂາຍ-ແລກປ່ຽນສິນຄ້າຮ່ວມກັນຢ່າງເປັນປົກກະຕິ. ຊຶ່ງຕະຫຼອດໄລຍະ 70 ກວ່າປີ ທີ່ຜ່ານມາ,ການພົວພັນຮ່ວມມື ລາວ-ໄທ ແມ່ນໄດ້ກວມເອົາເກືອບທຸກຂົງເຂດວຽກງານ. ເປັນຕົ້ນແມ່ນ: ດ້ານການເມືອງ-ຄວາມໝັ້ນຄົງ,ເສດຖະກິດ ແລະ ວັດທະນາທຳ-ສັງຄົມ ຊຶ່ງໄດ້ຮັບການຜັນຂະຫຍາຍແລະຍາດໄດ້ຜົນສໍາເລັດຫຼາຍດ້ານ. ພົ້ນເດັ່ນກໍຄືນັບແຕ່ ສປປ ລາວ ແລະ ຣາຊະອານາຈັກໄທໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 19 ທັນວາ 1950, ທັງສອງຝ່າຍ ໄດ້ມີສໍານັກງານສະຖານທູດ ແລະສະຖານກົງສູນໃຫຍ່ຕັ້ງຢູ່ປະເທດຂອງກັນ ແລະກັນ, ອັນໄດ້ສ້າງເງື່ອນໄຂສະດວກໃຫ້ແກ່ການພົວພັນຮ່ວມມື ແລະນຳເອົາຜົນປະໂຫຍດຕົວຈິງມາສູ່ປະເທດກໍຄືປະຊາຊົນສອງຊາດ ລາວ-ໄທ.

• 10/02/2022