ອາຫານທີ່ມີຄອລລາເຈນ ກິນແລ້ວຜິວເຄັ່ງມີນໍ້າມີນວນ

ຮຽບຮຽງ: ດວງໄຊ

 ກ່ອນທີ່ເຮົາຈະໄປຮູ້ຈັກກັບອາຫານທີ່ມີຄອລລາເຈນ, ເຮົາມາຊອກຮູ້ກ່ອນວ່າຄອລລາເຈນແມ່ນຫຍັງ? ມັນຄື: ໂປຣຕີນເມຕຣິກຊ໌ ນອກເຊລລ໌ ທີ່ບໍ່ສາມາດລະລາຍໃນນໍ້າໄດ້, ຄອລລາເຈນເຮັດໜ້າທີ່ຄ້າຍຄືກັບຢາງກາວທີ່ຢຶດຕິດເຊລຜິວໜັງ, ເອັນ ແລະກ້າມຊີ້ນໃຫ້ແໜ້ນ ແລະເຄັ່ງຕຶງ, ຊຶ່ງຫຼາຍກວ່າ 80% ຂອງເຊລຜິວໜັງໃນຮ່າງກາຍແມ່ນມີຄອລລາເຈນເປັນສ່ວນປະກອບ. ດັ່ງນັ້ນ, ຫາກຂາດຄອລລາເຈນ, ກໍເປັນອັນວ່າຜິວພັນຈະຕ້ອງຫ່ຽວຍານ. ຊຶ່ງສະພາບຜິວທີ່ແຫ້ງຫ່ຽວຂອງຜູ້ອາຍຸສູງ ແມ່ນເປັນເພາະປະລິມານຄອລລາເຈນຄ່ອຍໆຫຼຸດລົງຕາມການເວລາ ແລະນັ້ນກໍ່ເປັນທຳມະຊາດຂອງສັງຂານ.

ຄຸນສົມບັດທີ່ດີຂອງຄອລລາເຈນ, ຊຶ່ງນອກຈາກຄວາມໂດດເດັ່ນໃນຖານະເປັນໂປຣຕີນຢຶດເຊລຜິວໜັງໃຫ້ເຄັ່ງຕຶງແລ້ວຍັງຊ່ວຍແກ້ບັນຫາຜິວທີ່ຖືກຄວາມຮ້ອນ ຫຼືລັງສີຢູວີເຜົາໄໝ້ຈົນໝອງຊໍ້າ. ນອກນັ້ນ, ຜູ້ຊ່ຽວຊານຍັງລະບຸວ່າ “ຄອລ ລາເຈນສາມາດຊ່ວຍປິ່ນປົວພະຍາດຂໍ້ກະດູກເສື່ອມ ແລະປິ່ນປົວໄຂຂໍ້ອັກເສບໄດ້ອີກດ້ວຍ”.

ຄອລລາເຈນມີຢູ່ໃນຖົ່ວເຫຼືອງ ແລະຊີສທຸກປະເພດ: ທີມີເຈນິສຕິນ (genis tein) ສານຕ້ານອະນຸມູນອິດສະຫຼະທີ່ເອີ້ນວ່າ: ໄອໂຊຟລາໂວນ, ຊຶ່ງມີສ່ວນຊ່ວຍເລັ່ງການຜະລິດຄອລລາເຈນ, ຊ່ວຍຍົກກະຊັບຜິວໃຫ້ເຄັ່ງຕຶງ ແລະຊ່ວຍສະກັດກັ້ນ ເອນໄຊມ໌ ໂຕຮ້າຍ ອັນເປັນສາຍເຫດຂອງຮອຍຕີນກາ. ນອກນັ້ນ, ຄອລລາເຈນຍັງມີຢູ່ໃນຖົ່ວດິນ, ຖົ່ວລັນເຕົາ ແລະ ຖົ່ວຊະນິດອື່ນໆ, ທີ່ມີກົດ ໄຮຢາລູໂຣນິກ (hyaluronic acid) ຊຶ່ງເປັນອາວຸດຊັ້ນດີຂອງຂະບວນການຢຸດຢັ້ງຮອຍຫ່ຽວ ແລະ ຊ່ວຍກະຕຸ້ນການສ້າງຄອລລາເຈນມາບຳລຸງຜິວ. ນອກນັ້ນ,ຍັງມີຢູ່ໃນຖົ່ວອັລມອນດ໌ ໃນແກ່ນໝາກມ່ວງຫິມະພານໃນທັນຍະພືດຕ່າງໆ ອີກທັງໃນປາແຊລມອນ, ປາທູນ້າ, ອະໂວຄາໂດ, ຊຶ່ງເປັນກຸ່ມທີ່ມີກົດໄຂມັນໂອເມກ້າອັນເປັນແຫຼ່ງສ້າງຄອລລາເຈນຕາມທຳມະຊາດ.

ຄອລລາເຈນມີຢູ່ໃນຜັກໃບຂຽວທຸກຊະນິດເຊັ່ນ: ຜັກກາດນາ (ຄະນ້າ) ຜັກກາດຊອມ, ຜັກກາດຫໍ່, ຜັກສະຫຼັດ, ຜັກໂຂມ, ກະຫຼໍ່າ, ໜໍ່ໄມ້ຝຣັ່ງ ແລະ ອື່ນໆ. ຊຶ່ງຖ້າມີສີຂຽວເຂັ້ມເທົ່າໃດ ກໍຍິ່ງມີຄອລລາເຈນຫຼາຍ. ນອກນັ້ນ,ຍັງມີຢູ່ໃນຜັກ ແລະ ໝາກໄມ້ທີ່ມີສີແດງ ທີ່ມີ ໄລໂຄປີນ ໃນປະລິມານສູງ, ສານຊະນິດນີ້ ຊ່ວຍຊຸກຍູ້ການສ້າງ ຄອລລາເຈນ ໄດ້ດີ. ພ້ອມນັ້ນ ຍັງເຮັດໜ້າທີ່ຄ້າຍຄືສານຕ້ານອະນຸມູນອິດສະຫຼະ, ຊ່ວຍເຕີມເຕັມຄວາມແຂງແຮງໃຫ້ເຊລຜິວ. ດັ່ງນັ້ນ, ເຮົາຈຶ່ງຄວນຮັບປະທານໝາກເລັ່ນ, ໝາກເຜັດຢວກ ສີສົ້ມ-ແດງ ຫົວບີທຣູທ, ແຄຣອທ ແລະ ອື່ນໆທີ່ມີສີສັນຕາມທຳມະຊາດ.

ໝາກໄມ້ທີ່ມີວິຕາມິນ C ເຊັ່ນ: ໝາກນາວ, ໝາກສີດາ, ສະຕຣໍວ໌ເບີຣ໌ຣີ (Strawberry) ແລະ ອື່ນໆ ທີ່ມີລົດຊາດສົ້ມຫຼາຍກວ່າຫວານ, ຍິ່ງເປັນໝາກໄມ້ ແລະ ຜັກທີ່ມີສີສັນຕາມທຳມະຊາດກໍຍິ່ງມີຄອລລາເຈນຫຼາຍ. ອີກທັງໃນໝາກແຕງ, ໝາກກອກຝຣັ່ງທັງຂຽວ ແລະດຳລ້ວນອຸດົມໄປດ້ວຍຊັລເຟີຣ໌ ຊຶ່ງມີສ່ວນສຳຄັນໃນການສ້າງຄອລລາເຈນບຳລຸງຜິວ.

ນອກນັ້ນຍັງມີຢູ່ໃນ ດາຣ໌ກຊ໊ອກໂກແລຕ, ຊາຂາວ, ຫົວຜັກທຽມ, ຫອຍນາງລົມ, ໄຂ່ຂາວ, ເຂົ້າບາຣ໌ເລຍ໌, ສາຫຼ່າຍທະເລ ແລະສາຫຼ່າຍນໍ້າຈືດ ຫຼືໄຄຫີນ ແລະ ເທົາ, ໃນເຫັດທຸກຊະນິດ, ໃນນວນ ແລະນໍ້າໝາກພ້າວ ແລະໃນກະດູກອ່ອນຂອງໝູ, ໄກ່ ແລະອື່ນໆ.

แชร์