ອິນໂດຊີ້ແຈງລະງັບສົ່ງອອກນໍ້າມັນປາລ໌ມ ສະເພາະນໍ້າມັນແປຮູບເທົ່ານັ້ນ

ອິນໂດນີເຊຍ ອອກມາຊີ້ແຈງກ່ຽວກັບຄຳສັ່ງຫ້າມສົ່ງອອກນໍ້າມັນປາລ໌ມ ທີ່ມີການປະກາດເມື່ອອາທິດຜ່ານມາ, ອັນໄດ້ກາຍເປັນຂ່າວດັງຂ່າວໃຫຍ່ໄປທົ່ວໂລກ. ຊຶ່ງຫຼ້າສຸດ ກໍ່ມີລາຍງານວ່າເມື່ອວັນທີ 25 ເມສາ 2022 ເຈົ້າໜ້າທີ່ກ່ຽວຂ້ອງໄດ້ອະທິບາຍເນື້ອໃນຄຳສັ່ງຫ້າມດັ່ງກ່າວແມ່ນມີຜົນບັງຄັບໃຊ້ສະເພາະກັບຜະລິດຕະພັນນໍ້າມັນປາລ໌ມໂອເລອິນ ຫຼືນໍ້າມັນປາລ໌ມແປຮູບ (RBD olein) ເທົ່ານັ້ນ.ຊຶ່ງບໍ່ໄດ້ລວມເຖິງການສົ່ງອອກນໍ້າມັນປາລ໌ມດິບແຕ່ຢ່າງໃດ; ພາຍຫຼັງຄຳຊີ້ແຈງດັ່ງກ່າວກໍສົ່ງຜົນໃຫ້ລາຄານໍ້າມັນປາລ໌ມດິບທີ່ພຸ່ງສູງຂຶ້ນນັ້ນ, ປັບຫຼຸດລົງມາແລ້ວ.

ຢ່າງໃດກໍຕາມ, ຂ່າວການລະງັບສົ່ງອອກນໍ້າມັນປາລ໌ມ ກໍ່ໄດ້ສ້າງຄວາມແຕກຕື່ນຕໍ່ຜູ້ບໍລິໂພກນໍ້າມັນພືດທົ່ວໂລກ; ດ້ວຍວ່າປະທານາທິບໍດີ ໂຈໂກ ວິໂດໂດ ຜູ້ນຳອິນໂດນີເຊຍ, ໄດ້ປະກາດເມື່ອສັບປະດາທີ່ຜ່ານມາວ່າອິນໂດນີເຊຍຈະລະງັບການສົ່ງອອກນໍ້າມັນປາລ໌ມເພື່ອແກ້ໄຂບັນຫາການຂາດແຄນນໍ້າມັນປຸງແຕ່ງອາຫານພາຍໃນປະເທດ.ໂດຍຄຳສັ່ງດັ່ງກ່າວຈະມີຜົນບັງຄັບໃຊ້ໃນວັນທີ28ເມສານີ້ ແລະວ່າລັດຖະບານຈະຍົກເລີກຄຳສັ່ງຫ້າມສົ່ງອອກດັ່ງກ່າວ,ກໍຕໍ່ເມື່ອສະຖານະການຂາດແຄນນໍ້າມັນປຸງແຕ່ງອາຫານບັນເທົາລົງ.

ລາຍງານຂ່າວດຽວກັນລະບຸຂໍ້ມູນທີ່ເປີດເຜີຍໂດຍສະມາຄົມນໍ້າມັນປາລ໌ມອິນໂດນີເຊຍ (GAPKI) ຊຶ່ງໃຫ້ຮູ້ວ່າອິນໂດນີເຊຍສົ່ງອອກນ້ຳມັນປາລ໌ມທີ່ຜ່ານຂະບວນການແປຮູບ ຈຳນວນ25,7ລ້ານໂຕນເມື່ອປີ2021,ຊຶ່ງຄິດເປັນສັດສ່ວນ75%ຂອງການສົ່ງອອກນໍ້າມັນປາລ໌ມທັງໝົດ. ສ່ວນການສົ່ງອອກນໍ້າມັນປາລ໌ມດິບ ມີຈຳນວນ 2,74 ລ້ານໂຕນ ຫຼື ຄິດເປັນສັດສ່ວນ 7,98%.

ຢ່າງໃດກໍດີ, ຫຼັງຈາກທີ່ທາງການອິນໂດນີເຊຍໄດ້ອອກມາຊີ້ແຈງເລື່ອງຄຳສັ່ງຫ້າມການສົ່ງອອກ, ກໍ່ເຮັດໃຫ້ລາຄານໍ້າມັນປາລ໌ມດິບ ແລະລາຄານໍ້າມັນຖົ່ວເຫຼືອງເລີ່ມປັບຕົວຫຼຸດລົງ. ທັງນີ້, ລາຄາສັນຍາຊື້-ຂາຍນໍ້າມັນປາລ໌ມດິບ ໃນຕະຫຼາດສິນຄ້າໂພຄະພັນທີ່ກົວລາລຳເປີຣ໌ ປະເທດມາເລເຊຍ ກໍດິ່ງລົງກວ່າ 4% ໃນການຊື້-ຂາຍລະຫວ່າງວັນ, ຊຶ່ງມາຢູ່ທີ່ລະດັບ 6.097 ຣິງກິຕ (1.399 ໂດລາສະຫະລັດ) ຕໍ່ໂຕນ; ຫຼັງຈາກທີ່ດີດຕົວຂຶ້ນໄປກວ່າ 7% ເມື່ອກ່ອນໜ້ານີ້ ແລະປິດຕະຫຼາດຫຼູດລົງ 2,1% ຫຼັງຈາກທີ່ມີຂ່າວວ່າອິນໂດນີເຊຍຈະຍັງຄົງສົ່ງອອກນໍ້າມັນປາລ໌ມດິບຕໍ່ໄປ. ສ່ວນລາຄານໍ້າມັນຖົ່ວເຫຼືອງໃນສະຫະລັດອະເມຣິກາ ທີ່ຊື້-ຂາຍໃນຕະຫຼາດຊິຄາໂກ, ກໍ່ຫຼຸດລົງມາ 0,77% ຫຼັງຈາກພຸ່ງຂຶ້ນແຕະລະດັບສູງສຸດເປັນປະຫວັດການເມື່ອວັນສຸກທີ 22 ເມສາ.

ອິນໂດນີເຊຍ ເປັນຜູ້ຜະລິດ ແລະສົ່ງອອກນໍ້າມັນປາລ໌ມລາຍໃຫຍ່ທີ່ສຸດຂອງໂລກ, ຊຶ່ງມີປະລິມານຄິດເປັນສັດສ່ວນຫຼາຍກວ່າເຄິ່ງໜຶ່ງ ຫຼື ເກືອບ 60% ຂອງການຜະລິດທົ່ວໂລກ.

ຄວາມເຄື່ອນໄຫວຂອງອິນໂດນີເຊຍ ເປັນໄປຕາມທ່າອ່ຽງທີ່ຫຼາຍປະເທດທົ່ວໂລກຫັນມາໃຊ້ມາດຕະການຄຸ້ມຄອງພືດຜົນກະສິກຳພາຍໃນປະເທດນັບຕັ້ງແຕ່ເກີດການສູ້ຮົບລະຫວ່າງຣັສເຊຍ ກັບ ຢູເຄຣນ;ຂະນະທີ່ບັນດານັກວິຊາການດ້ານເສດຖະສາດກໍ່ອອກມາສະແດງຄວາມເຫັນວ່າການທີ່ອິນໂດນີເຊຍລະງັບການສົ່ງອອກນໍ້າມັນປາລ໌ມແປຮູບ, ອາດຈະສົ່ງຜົນໃຫ້ພາວະເງິນເຟີ້ທົ່ວໂລກສູງຂຶ້ນ, ອັນເນື່ອງມາຈາກການພຸ່ງຂຶ້ນຂອງລາຄາອາຫານ ແລະ ເປັນອີກໜຶ່ງປັດໄຈທີ່ຈະເພີ່ມຄວາມສ່ຽງວ່າຈະເກີດວິກິດຄວາມອຶດຫິວເຕັມຮູບແບບ. ແຕ່ພາຍຫຼັງທີ່ອິນໂດນີເຊຍອອກມາອະທິບາຍວ່າ ການຫ້າມສົ່ງອອກບໍ່ໄດ້ລວມເຖິງນໍ້າມັນປາລ໌ມດິບ, ກໍ່ເຮັດໃຫ້ຄວາມວິຕົກກັງວົນທີ່ກ່ຽວຂ້ອງກັບຜົນກະທົບນັ້ນຜ່ອນຄາຍລົງໃນລະດັບໜຶ່ງ.

แชร์