ສໍາມະນາທິດສະດີ ສອງພັກ ລາວ-ຫວຽດນາມ ຄັ້ງທີ XI

ກອງປະຊຸມສໍາມະນາທິດສະດີ ສອງພັກລາວ-ຫວຽດນາມ ຄັ້ງທີ XI ພາຍໃຕ້ຫົວຂໍ້: “ປ່ຽນແປງໃໝ່ຈິນຕະນາການໃນການສ້າງພື້ນຖານເສດຖະກິດ ເອກະລາດ ເປັນເຈົ້າຕົນເອງ ຢູ່ ສປປ ລາວ” ໄດ້ຈັດຂຶ້ນໃນວັນທີ 28 ພະຈິກນີ້ ທີ່ແຂວງຫຼວງພະບາງ ພາຍໃຕ້ການເປັນເຈົ້າພາບຂອງ ສປປ ລາວ ໂດຍການເປັນປະທານຮ່ວມຂອງ ສະຫາຍ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກປະຊາຊົນ ປະຕິວັດລາວ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຫງວຽນ ຊວັນ ຖັງ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາທິດສະດີສູນກາງພັກ ຫົວໜ້າສະຖາບັນການ ເມືອງແຫ່ງຊາດ ໂຮ່ຈິມິນ; ມີສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ແລະບັນດາສະຫາຍການນໍາ, ນັກວິທະຍາສາດຂອງສອງພັກ ລາວ-ຫວຽດນາມ ເຂົ້າຮ່ວມ.

ໂອກາດເຂົ້າຮ່ວມເປັນປະທານກອງປະຊຸມ, ສະຫາຍ ກິແກ້ວ ໄຂຄໍາພິທູນ ໄດ້ກ່າວວ່າ: ຫົວຂໍ້ຂອງກອງປະຊຸມສຳມະນາຄັ້ງນີ້, ມີຄວາມໝາຍສໍາຄັນທາງດ້ານທິດສະດີ ແລະ ພຶດຕິກຳ, ເປັນບັນຫາທີ່ຕິດພັນກັບຊີວິດການເປັນຢູ່ຂອງປະຊາຊົນ ແລະ ເປັນບັນຫາທີ່ສັງຄົມໃຫ້ຄວາມສົນໃຈຫຼາຍ. ກອງປະຊຸມໄດ້ຈັດຕັ້ງຂຶ້ນໃນບັນຍາກາດທີ່ພັກກອມມູນິດຫວຽດນາມ ພວມຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIII ຂອງຕົນຢ່າງມີປະສິດທິຜົນ ແລະ ພັກປະຊາຊົນ ປະຕິວັດລາວ ພວມຜັນຂະຫຍາຍກອງປະຊຸມໃຫຍ່ ຄັ້ງທີ XI ໃນໄລຍະທ້າຍສະໄໝ ແລະ ພວມດຳເນີນກອງປະຊຸມໃຫຍ່ 3 ຂັ້ນ, ກະກຽມສະຫຼຸບທິດສະດີ ແລະ ພຶດຕິກຳໃນຫຼາຍບັນຫາ ເປັນຕົ້ນແມ່ນການສ້າງໂຄງການການເມືອງຂອງພັກ, ກະກຽມສະຫຼຸບ 40 ປີ ແຫ່ງການປະຕິບັດແນວທາງການປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ; ຮ່າງເອກະສານບົດລາຍງານການເມືອງ ຂອງຄະນະບໍລິຫານງານສູນກາງພັກ ສະໄໝທີ XI ຕໍ່ກອງປະຊຸມໃຫຍ່ຄັ້ງທີ XII ຂອງພັກ, ກະກຽມການສະເຫຼີມສະຫຼອງວັນສ້າງຕັ້ງພັກ ຄົບຮອບ 70 ປີ ແລະ ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດຂອງປະທານ ໄກສອນ ພົມວິຫານ ຄົບຮອບ 105 ປີ ແລະ ວັນສຳຄັນອື່ນໆຂອງຊາດ.

ໃນໄລຍະຜ່ານມາ, ພັກເຮົາ ໄດ້ວາງແນວທາງການພັດທະນາ ບົນພື້ນຖານການຂຸດຄົ້ນ, ນໍາໃຊ້ກາລະໂອກາດ ແລະ ກໍາລັງແຮງສັງລວມ ເພື່ອສ້າງການຫັນປ່ຽນໃນການພັດທະນາ, ຮັບປະກັນໃຫ້ເສດ ຖະກິດເຕີບໂຕ ດ້ວຍຈັງຫວະທີ່ໝັ້ນທ່ຽງ ແລະ ຕໍ່ເນື່ອງ, ສ້າງພື້ນຖານການຜະລິດ ແລະ ການບໍລິການທີ່ໜັກແໜ້ນ, ເຂັ້ມແຂງ, ຮັບປະກັນການພັດທະນາຕາມທິດສີຂຽວຍືນຍົງ ແລະ ເປັນເຈົ້າຕົນເອງ. ຈາກພຶດຕິກໍາແຫ່ງການກໍ່ສ້າງ, ພັດທະນາພື້ນຖານເສດຖະກິດແຫ່ງຊາດ ໄປຕາມທິດດັ່ງກ່າວ ສາມາດຍາດໄດ້ຜົນສໍາເລັດອັນໃຫຍ່ຫຼວງຫຼາຍດ້ານ ເປັນຕົ້ນແມ່ນຜົນສໍາເລັດດ້ານການພັດທະນາ ແລະ ຂະຫຍາຍທ່າແຮງບົ່ມຊ້ອນຂອງປະເທດ, ເຂດແຄ້ວນ ແລະ ທ້ອງຖິ່ນ ເພື່ອສ້າງການຜະລິດ ແລະ ການບໍລິການທີ່ເປັນປາຍແຫຼມ ຕາມທິດສີຂຽວ ແລະ ຍືນຍົງ ເພື່ອຕອບສະໜອງຄວາມຮຽກຮ້ອງຕ້ອງການຊົມໃຊ້ພາຍໃນ ແລະ ເປັນສິນຄ້າສົ່ງອອກຕ່າງປະເທດໃຫ້ຫຼາຍຂຶ້ນ ສົມຄູ່ກັບທ່າແຮງບົ່ມຊ້ອນ; ບູລະນະລະບອບລະບຽບຊຸກຍູ້ການ ເຄື່ອນໄຫວຂອງວິສາຫະກິດພາຍໃນ ນັບທັງລັດວິສາຫະກິດ ໃຫ້ມີການເຄື່ອນໄຫວຢ່າງມີປະສິດທິຜົນ; ໄດ້ມີຜົນສໍາເລັດໃນການປັບປຸງສະພາບແວດລ້ອມການດໍາເນີນທຸລະກິດ ສ້າງຄວາມໄວ້ເນື້ອເຊື່ອໃຈໃຫ້ແກ່ນັກລົງທຶນພາຍໃນ ແລະ ຕ່າງປະເທດ, ອັນພົ້ນເດັ່ນແມ່ນການສ້າງຍຸດທະສາດແຫ່ງຊາດ ວ່າດ້ວຍການບໍລິການຂອງລັດ ຜ່ານປະຕູດຽວ, ຊຸກຍູ້ ແລະ ສ້າງຄວາມເຂັ້ມແຂງວຽກງານບໍລິການຜ່ານປະຕູດຽວໃຫ້ບັນດາແຂວງ, ປັບປຸງກົນໄກຄຸ້ມຄອງການລົງທຶນຂອງພາຍໃນ ແລະ ຕ່າງປະເທດ ໃຫ້ສອດຄ່ອງກວ່າ ເກົ່າ, ເອົາໃຈໃສ່ປັບປຸງກົດໝາຍ ແລະ ນິຕິກຳລຸ່ມກົດໝາຍໃຫ້ເປັນລະບົບຄົບຊຸດ; ເປັນເຈົ້າການໃນການພົວພັນຮ່ວມມືກັບສາກົນ ເພື່ອພັດທະນາເສດຖະກິດເອກະລາດ ເປັນເຈົ້າຕົນເອງ. ໂດຍສືບຕໍ່ເສີມຂະຫຍາຍ ນະໂຍບາຍດ້ານການຄ້າ ແລະ ເພີ່ມທະວີການຮ່ວມມືເສດຖະກິດກັບພາກພື້ນ ແລະ ສາກົນໃຫ້ນັບມື້ນັບຂະຫຍາຍຕົວຍິ່ງຂຶ້ນ, ອໍານວຍຄວາມສະດວກດ້ານການຄ້າ ເພື່ອຫຼຸດຜ່ອນຂອດຂັ້ນໃນການດຳເນີນທຸລະກິດ ແລະ ຂັ້ນຕອນ ໃນການນຳເຂົ້າ-ສົ່ງອອກສິນຄ້າ. ສປປ ລາວ ມີສາຍພົວພັນທາງການທູດກັບ 139 ປະ ເທດ, ມີການພົວພັນທາງການຄ້າກັບຫຼາຍກວ່າ 60 ປະເທດໃນໂລກ ແລະ ໄດ້ຮ່ວມລົງນາມສັນຍາການພົວພັນການຄ້າສອງຝ່າຍເກືອບ 20 ສະບັບກັບ 15 ປະເທດ. ສປປ ລາວ ກໍໄດ້ຮັບສິດທິພິເສດທາງດ້ານການຄ້າຈາກ 42 ປະເທດໃນທົ່ວໂລກ.

ຢ່າງໃດກໍຕາມ, ຜ່ານການຈັດຕັ້ງປະຕິບັດ ກໍມີຂໍ້ຈໍາກັດ ແລະ ສິ່ງທ້າທາຍຈໍານວນໜຶ່ງ ເປັນຕົ້ນຄວາມເປັນເຈົ້າຕົນເອງດ້ານເສດຖະກິດ ທຽບກັບເງື່ອນໄຂ, ຈຸດພິເສດ, ຄວາມສາມາດ ແລະ ທ່າແຮງບົ່ມຊ້ອນທີ່ມີຢູ່ ຂອງປະເທດເຮົາຈຶ່ງມີຄວາມຈໍາເປັນຢ່າງພາວະວິໄສ ທີ່ດ້ານໜຶ່ງຕ້ອງຢືນຢັນຄືນຄວາມຖືກຕ້ອງສອດຄ່ອງຂອງແນວທາງ, ແຜນນະໂຍບາຍ ທີ່ພັກໄດ້ວາງອອກ, ກວດກາ, ຕີລາຄາ ແລະ ປັບປຸງນະໂຍບາຍ, ກ່ຽວກັບການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ເພື່ອພັດທະນາເສດຖະກິດຕະຫຼາດຕາມທິດສັງຄົມນິຍົມ ປະເທດເຮົາ ໃຫ້ເປັນຮູບປະທໍາຍິ່ງຂຶ້ນ. ບົນພື້ນຖານຮັບຮູ້ທີ່ກ່າວມານັ້ນ, ພັກປະຊາຊົນ ປະຕິວັດລາວ ຖອດຖອນໄດ້ບາງບົດຮຽນທີ່ວ່າ ຈິນຕະນາການໃໝ່ ກ່ຽວກັບການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ຈະໄດ້ສຸມໃສ່ບາງວຽກຈຸດສຸມ ເຊັ່ນ: ການຍົກສູງສະຕິຊາດ ເປັນເອກະລາດ, ເສີມຂະຫຍາຍສະຕິປັນຍາ, ກໍາລັງແຮງ ແລະ ຄວາມສາມາດຂອງຄົນໃນຊາດ; ສ້າງເສດຖະກິດ ເອກະລາດ ເປັນເຈົ້າຕົນເອງ ເປັນຂະບວນວິວັດແຫ່ງການພັດທະນາຈາກຕໍ່າຫາສູງ, ຈາກນ້ອຍຫາໃຫຍ່ ບົນພື້ນຖານການບຸກບືນສູ້ຊົນສູງສຸດ ແລະ ຕ້ອງໃຊ້ເວລາອັນແນ່ນອນ ດ້ວຍຈິດໃຈເຄັ່ງຮ້ອນບໍ່ແກ່ຍາວ ມີບາດກ້າວເດີນທີ່ຈະແຈ້ງ.

ສະຫາຍ ກິແກ້ວ ໄຂຄໍາພິທູນ ຍັງກ່າວວ່າ: ການສ້າງເສດຖະກິດເອກະລາດ ເປັນເຈົ້າຕົນເອງ ໃນຂະບວນວິວັດແຫ່ງການພັດທະນາປະເທດຊາດ ຕາມເສັ້ນທາງກ້າວຂຶ້ນສັງຄົມນິຍົມ ບົດຮຽນຢູ່ລາວ ແລະ ຫວຽດນາມ ມີເນື້ອໃນກວ້າງຂວາງ ແລະ ກວມລວມຫຼາຍບັນຫາ, ຕ້ອງໄດ້ມີການຄົ້ນຄວ້າ, ວິໄຈຢ່າງເລິກເຊິ່ງ ຊັດເຈນ ແລະ ເບິ່ງບັນຫາຢ່າງພາວະວິໄສ. ດ້ວຍເຫດນັ້ນ, ຈຶ່ງຮຽກຮ້ອງບັນດານັກວິທະຍາສາດ, ນັກທິດສະດີພວກເຮົາ ຈົ່ງພ້ອມກັນຍົກສູງຄວາມຮັບຜິດຊອບໃນການຄົ້ນຄິດ, ປະກອບຄຳເຫັນຢ່າງກົງໄປກົງມາສ້າງສັນ, ຮັບປະກັນທັງລັກສະນະທິດສະດີ ແລະ ພຶດຕິກຳຢ່າງມີຊີວິດຊີວາ; ຮຽກຮ້ອງບັນດາສະ ຫາຍເຂົ້າຮ່ວມກອງປະຊຸມຮັບຟັງຢ່າງເອົາໃຈໃສ່ ແລະ ຕັ້ງບັນຫາແລກປ່ຽນບົດຮຽນໃຫ້ມີບັນຍາກາດທີ່ຄຶກຄຶ້ນ ແລະ ມີເນື້ອໃນອຸດົມສົມບູນ ບັນລຸໄດ້ຕາມລະດັບຄາດໝາຍທີ່ກຳນົດໄວ້.

ກອງປະຊຸມຄັ້ງນີ້, ດຳເນີນເປັນເວລາ 1 ວັນ ໂດຍຈະໄດ້ມີການນໍາສະເໜີບັນດາຫົວຂໍ້ກ່ຽວຂ້ອງ ລວມມີ 9 ຫົວຂໍ້ ແລະ ຄະນະຜູ້ແທນເຂົ້າຮ່ວມກອງປະຊຸມ ກໍໄດ້ມີຄໍາເຫັນແລກປ່ຽນຊຶ່ງກັນ ແລະ ກັນ; ກອງປະຊຸມໄດ້ປິດລົງດ້ວຍຜົນສຳເລັດຢ່າງຈົບງາມ.
ຂ່າວ-ພາບ: ສຸກສະຫວັນ

แชร์