ນັບຕັ້ງແຕ່ປີ 1953 ເປັນຕົ້ນມາ, ຈີນໄດ້ສ້າງ ແລະ ປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີ 14 ຄັ້ງຢ່າງສຳເລັດຜົນ, ໄດ້ຮັບຜົນສຳເລັດທີ່ປະຈັກຕາຊາວໂລກໃນການພັດທະນາເສດຖະກິດສັງຄົມ, ຍົກສູງກຳລັງສັງລວມແຫ່ງຊາດ, ປັບປຸງຊີວິດການເປັນຢູ່ຂອງປະຊາຊົນ ແລະອື່ນໆ, ໄດ້ສ້າງສິ່ງມະຫັດສະຈັນໃນການພັດທະນາເສດຖະກິດຂອງປະເທດຢ່າງວ່ອງໄວ ແລະ ຮັກສາສະຖຽນລະພາບໃນສັງຄົມເປັນເວລາຍາວນານ. ການນຳພາການພັດທະນາເສດຖະກິດສັງຄົມດ້ວຍການສ້າງ ແລະ ປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີ, ໄດ້ກາຍເປັນຈຸດພິເສດອັນພົ້ນເດັ່ນຂອງສັງຄົມນິຍົມທີ່ມີສີສັນພິເສດຂອງຈີນ ແລະ ເປັນສິ່ງສຳຄັນທີ່ປະເທດຕ່າງໆໃນໂລກໄດ້ຖອດຖອນເອົາບົດຮຽນແຫ່ງການພັດທະນາຂອງຈີນ.
ລາວເປັນປະເທດບ້ານໃກ້ເຮືອນຄຽງທີ່ດີຂອງຈີນ, ໃນຊຸມປີຜ່ານມານີ້ລາວພະຍາຍາມຊອກຫາເສັ້ນທາງທີ່ສອດຄ່ອງກັບສະພາບຄວາມເປັນຈິງຂອງປະເທດຕົນໃນຂະບວນການພັດທະນາ. ໃນຂະບວນການນີ້, ທັດສະນະ ວິທີການ ແລະ ຜົນສຳເລັດຈາກພຶດຕິກຳຕົວຈິງໃນການປະຕິບັດແຜນພັດທະນາເສດຖະກິດສັງຄົມ 5 ປີຂອງຈີນໄດ້ເປັນບົດຮຽນທີ່ມີປະໂຫຍດຕໍ່ປະເທດລາວ.
ໃນຂະບວນການກຳນົດແຜນພັດທະນາ, ຈີນໄດ້ຍຶດໝັ້ນຖືປະຊາຊົນເປັນໃຈກາງຢ່າງສະເໝີຕົ້ນສະເໝີປາຍ, ຖືເອົາການຕອບສະໜອງຕາມຄວາມຮຽກຮ້ອງຕ້ອງການຂອງປະຊາຊົນທີ່ນັບມື້ເພີ່ມຂຶ້ນຕໍ່ຊີວິດການເປັນຢູ່ອັນດີງາມເປັນຈຸດປະສົງພື້ນຖານ. ປະຊາກອນຜູ້ທຸກຍາກ 55,75 ລ້ານຄົນໃນເຂດຊົນນະບົດໄດ້ຫຼຸດພົ້ນອອກຈາກຄວາມທຸກຍາກໃນໄລຍະດຳເນີນແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 13 (ແຜນການ 5 ປີຄັ້ງທີ 13), ຮອດການປະກັນສຸຂະພາບຂັ້ນພື້ນຖານປົກຄຸມຫຼາຍກວ່າ 1,3 ຕື້ຄົນ, ຜົນສຳເລັດເຫຼົ່ານີ້ໄດ້ສ່ອງແສງໃຫ້ເຫັນເຖິງກຳລັງທີ່ແຂງແຮງຂອງແຜນພັດທະນາແຫ່ງຊາດຈີນໃນການຮັບປະກັນຊີວິດການເປັນຢູ່ຂອງປະຊາຊົນ. ໃນຂະນະດຽວກັນນັ້ນ, ຜູ້ຂຽນໄດ້ສັງເກດເຫັນວ່າ, ໃນເວລາກຳນົດແຜນພັດທະນາຂອງຕົນ, ປະເທດລາວໄດ້ເນັ້ນໜັກເຖິງການຖືເອົາການປັບປຸງຊີວິດການເປັນຢູ່ຂອງປະຊາຊົນເປັນເປົ້າໝາຍແກນກາງ, ສຸມໃສ່ການຍົກລະດັບຊີວິດການເປັນຢູ່ຂອງປະຊາຊົນ, ຫຼຸດຜ່ອນອັດຕາຄວາມທຸກຍາກ, ເຮັດໃຫ້ໝາກຜົນການພັດທະນາສ້າງຜົນປະໂຫຍດໃຫ້ແກ່ປະຊາຊົນທຸກຖ້ວນໜ້າ. ຕົວຢ່າງ, ແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 9 (2021-2025) ຂອງລາວ ໄດ້ຖືເອົາການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນໜຶ່ງໃນ 6 ເປົ້າໝາຍໃຫຍ່, ທັງຖືເອົາການຫຼຸດຜ່ອນຄວາມທຸກຍາກເປັນໜຶ່ງໃນຂົງເຂດຂໍກຸນແຈທີ່ຈະບຸກທະລຸໃນແຜນການດັ່ງກ່າວ.
ພ້ອມກັນນັ້ນ, ລາວກໍໃຫ້ຄວາມສຳຄັນຕໍ່ການສ້າງແຜນພັດທະນາອຸດສາຫະກຳຕາມຫຼັກວິທະຍາສາດທີ່ນອນໃນແຜນພັດນະນາ 5 ປີຂອງຈີນ. ຈີນໄດ້ຜ່ານການຊີ້ນຳຂອງແຜນພັດທະນາ ໂດຍໄດ້ສ້າງລະບົບອຸດສາຫະກຳທີ່ຄົບວົງຈອນເທື່ອລະກ້າວ, ຫັນປ່ຽນ ແລະ ຍົກລະດັບຈາກອຸດສາຫະກຳການຜະລິດແບບດັ້ງເດີມໄປສູ່ອຸດສາຫະກຳການຜະລິດລະດັບສູງ ແລະ ອຸດສາຫະກຳໃໝ່ທີ່ມີລັກສະນະຍຸດທະສາດ. ໃນແຜນພັດທະນາຂອງລາວ, ໄດ້ປະສົມປະສານກັບທ່າແຮງດ້ານຊັບພະຍາກອນຂອງປະເທດຕົນ, ຕັ້ງໜ້າຊຸກຍູ້ການພັດທະນາອຸດສາຫະກຳທີ່ມີເອກະລັກພິເສດ. ຕົວຢ່າງ, ດ້ານກະສິກຳ, ລາວໄດ້ເພີ່ມທະວີການຮ່ວມມືກັບຈີນ, ນຳເຂົ້າເຕັກໂນໂລຊີດ້ານການປູກຝັງ ແລະ ບົດຮຽນການຄຸ້ມຄອງທີ່ທັນສະໄໝ, ຍົກສູງປະລິມານການຜະລິດ ແລະ ຄຸນນະພາບຂອງຜະລິດຕະພັນກະສິກຳ, ເພື່ອຊຸກຍູ້ການຫັນເປັນທັນສະໄໝໃນດ້ານກະສິກຳ; ຂົງເຂດພະລັງງານ, ໄດ້ຕັ້ງໜ້າພັດທະນາພະລັງງານລົມ ພະລັງງານແສງຕາເວັນ ແລະ ພະລັງງານສະອາດອື່ນໆ ເພື່ອຊຸກຍູ້ການພັດທະນາແບບຍືນຍົງ.
ການກໍ່ສ້າງພື້ນຖານໂຄງລ່າງເປັນປັດໄຈສຳຄັນໃນແຜນພັດທະນາ 5 ປີຂອງຈີນ, ຈີນໄດ້ຮັບຜົນສຳເລັດອັນໃຫຍ່ຫຼວງໃນຂົງເຂດການຄົມມະນາຄົມ ພະລັງງານ ການສື່ສານ ແລະອື່ນໆ. ການສ້າງສຳເລັດ ແລະ ເປີດນຳໃຊ້ເສັ້ນທາງລົດໄຟລາວ-ຈີນ, ບໍ່ພຽງແຕ່ໄດ້ປັບປຸງສະພາບການຄົມມະນາຄົມຂອງລາວຢ່າງຫຼວງຫຼາຍເທົ່ານັ້ນ, ຍັງໄດ້ເພີ່ມແຮງຂັບເຄື່ອນທີ່ແຂງແຮງໃຫ້ແກ່ການພັດທະນາເສດຖະກິດ, ກາຍເປັນພຶດຕິກຳທີ່ມີຊີວິດຊີວາຂອງລາວໃນການຖອດຖອນບົດຮຽນຈາກຈີນໃນການກໍ່ສ້າງພື້ນຖານໂຄງລ່າງ. ການເປີດນຳໃຊ້ເສັ້ນທາງລົດໄຟລາວ-ຈີນ, ເຮັດໃຫ້ລາວ ກັບຈີນ ກໍຄືປະເທດອ້ອມຂ້າງອື່ນໆມີການພົວພັນກັນຢ່າງໃກ້ຊິດກວ່າເກົ່າ, ໄດ້ຊຸກຍູ້ການໄປມາຫາສູ່ກັນດ້ານການຄ້າ ການແລກປ່ຽນລະຫວ່າງປະຊາຊົນ ແລະ ການຮ່ວມມືດ້ານເສດຖະກິດໃນພາກພື້ນ. ໃນຊຸມປີມໍ່ໆມານີ້, ໃນແຜນພັດທະນາເສດຖະກິດສັງຄົມແຫ່ງຊາດລາວໄດ້ເພີ່ມງົບປະມານເຂົ້າໃນການກໍ່ສ້າງພື້ນຖານໂຄງລ່າງ ເຊັ່ນ: ການຄົມມະນາຄົມ, ພະລັງງານ ແລະ ອື່ນໆ, ພ້ອມນີ້ຍັງມີແຜນຈະກໍ່ສ້າງເຄືອຂ່າຍພື້ນຖານໂຄງລ່າງທີ່ສົມບູນກວ່າເກົ່າ, ເພື່ອສ້າງພື້ນຖານທີ່ໜັກແໜ້ນໃຫ້ແກ່ການພັດທະນາເສດຖະກິດສັງຄົມຂອງລາວ.
ປັດຈຸບັນ, ຈີນພວມກະກຽມສ້າງແຜນພັດທະນາເສດຖະກິດສັງຄົມ 5 ປີຄັ້ງທີ 15, ສຳລັບປະເທດລາວກໍພວມພິຈາລະນາແຜນພັດທະນາເສດຖະກິດສັງຄົມ 5 ປີຄັ້ງທີ 10. ຫວ່າງກ່ອນນີ້ບໍ່ດົນ, ໃນເວລາໃຫ້ສຳພາດຕໍ່ນັກຂ່າວວິທະຍຸໂທລະພາບສູນກາງຈີນ, ທ່ານສອນໄຊ ສີພັນດອນ ນາຍົກລັດຖະມົນຕີລາວໄດ້ສະແດງຄວາມຊົມເຊີຍຕໍ່ຜົນສຳເລັດຂອງຈີນໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ, ທັງກ່າວວ່າ ລາວຈະສືບຕໍ່ເພີ່ມທະວີການຮ່ວມມືກັບຈີນ, ປັບປຸງແຜນພັດທະນາເສດຖະກິດສັງຄົມແຫ່ງຊາດລາວ 5 ປີຄັ້ງທີ 10 (2026-2030) ໃຫ້ສົມບູນຂຶ້ນ. ເຊື່ອວ່າຢູ່ບົນເສັ້ນທາງແຫ່ງການຮ່ວມກັນກ້າວໄປໜ້າ, ລາວ ແລະຈີນຈະຮ່ວມກັນສ້າງອະນາຄົດທີ່ດີງາມກວ່າເກົ່າ, ປະກອບສ່ວນສະຕິປັນຍາ ແລະ ກຳລັງແຮງຫຼາຍກວ່າເກົ່າເຂົ້າໃນການສ້າງຄູ່ຮ່ວມຊາຕາກຳຂອງມວນມະນຸດ.
ທີ່ມາ:ວິເຄາະສະຖານະການ锐视评
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |