ຜູ້ຜະລິດເຄື່ອງປຸງອາຫານຊັ້ນນໍາຂອງ Haitian ເຂົ້າຕະຫຼາດຫຼັກຊັບຮົງ​ກົງ ຮຸ້ນເພີ່ມຂຶ້ນຫຼາຍກວ່າ 3%

ບໍລິສັດ Haitianເຄື່ອງປຸງອາຫານ ແລະ ອາຫານ ຈໍາ​ກັດ  (03288.HK) ໄດ້ເປີດຕົວຄັ້ງທໍາອິດໃນຕະຫຼາດຫຼັກຊັບຮົງ​ກົງ ໃນວັນ​ທີ 19 ມິ​ຖຸ​ນາທີ່ຜ່ານມານີ້, ກາຍເປັນບໍລິສັດເຄື່ອງປຸງອາຫານເຈົ້າທໍາອິດທີ່ໄດ້ເປີດຕົວໃນຕະຫຼາດຫຼັກຊັບຮົງກົງທັງ A-share ແລະ H-share.

 ສໍານັກຂ່າວຊິນຮວາ ລາຍງານ: ຮຸ້ນຂອງບໍລິສັດໄດ້ເພີ່ມຂຶ້ນຫຼາຍກວ່າ 3 % ໃນເວລາເປີດຕົວໃນຕະຫຼາດ, ສົ່ງຜົນໃຫ້ມູນຄ່າຕະຫຼາດທັງໝົດສູງກວ່າ 400 ຕື້ຢວນ, ເຮັດໃຫ້ບໍລິສັດ Haitian ຂຶ້ນເປັນວິສາຫະກິດເຄື່ອງປຸງອາຫານທີ່ມີມູນຄ່າສູງທີ່ສຸດໃນໂລກ.

ລາຄາ IPO ຢູ່ທີ່ 36.3 ໂດລາຮົງກົງຕໍ່ຮຸ້ນ, ມີ 279 ລ້ານຮຸ້ນຂາຍອອກ, ລະດົມທຶນໄດ້ 1.48 ຕື້ໂດລາສະຫະລັດ. ນີ້ບໍ່ພຽງແຕ່ເປັນ IPO ທີ່ໃຫຍ່ທີ່ສຸດໃນອຸດສາຫະກໍາສິນຄ້າບໍລິໂພກທົ່ວໂລກໃນປີ 2025, ແຕ່ຍັງສ້າງສະຖິຕິການເງິນໃນອຸດສາຫະກໍາເຄື່ອງປຸງອາຫານທົ່ວໂລກໃນຊ່ວງ 25 ປີທີ່ຜ່ານມາອີກດ້ວຍ.

IPO ນີ້ສະແດງໃຫ້ເຫັນຄວາມໝັ້ນໃຈຂອງນັກລົງທຶນທົ່ວໂລກທີ່ມີຕໍ່ຜູ້ນໍາອຸດສາຫະກໍາເຄື່ອງປຸງອາຫານ ຂອງຈີນ, ໂດຍການສະເໜີຂາຍຮຸ້ນຕໍ່ສະທາລະນະຄັ້ງທໍາອິດໃນຮົງກົງມີຜູ້ຈອງຊື້ເກີນກວ່າ  918.2 ເທົ່າ. ການສະເໜີຂາຍຮຸ້ນສາກົນມີຜູ້ຈອງຊື້ເກີນກວ່າ  22.9 ເທົ່າ ແລະ ສໍາເລັດການຂາຍກ່ອນກໍານົດ.

ນັກລົງທຶນທີ່ສໍາຄັນ  ເຊັ່ນ: HHLR Advisors, Ltd., GIC Private Limited ແລະ UBS Asset Management (Singapore) Ltd. ເປັນຜູ້ໃຫ້ການສະໜັບສະໜູນເງິນທຶນໃນການຈອງຊື້ລວມມູນຄ່າເກືອບ 4.7 ຕື້ໂດລາຮົງກົງ, ຄິດໄລ່ໄດ້ເກືອບເຄິ່ງໜຶ່ງຂອງມູນຄ່າການຂາຍອອກຮຸ້ນທັງໝົດ.

ຕາມລາຍງານລະບຸວ່າ ເງິນທຶນທີ່ລະດົມໄດ້ໃນຄັ້ງນີ້ ສ່ວນໃຫຍ່ຈະນໍາໄປໃຊ້ໃນການ​​ພັດທະນາ​ຜະລິດ​ຕະພັນ​ທີ່​ແນ​ໃສ່​ສຸຂະ​ພາບ ​ແລະ ສອດຄ່ອງ​ກັບ​ເທຮນຊັ້ນ, ການວິໄຈ ແລະ ການພັດທະນາ​ໃນ​ເຕັກ​ໂນ​ໂລ​ຊີ​ການ​ໝັກ​ເປັນເກນຫຼັກ, ການ​ສ້າງ​ພື້ນຖານ​ໂຄງ​ລ່າງດ້ານການວິໄຈ ແລະ ການພັດທະນາ​ໃນ​ທົ່ວ​ໂລກ, ການ​ຍົກ​ລະດັບ​ຍີ່​ຫໍ້​ໃນ​ທົ່ວ​ໂລກ ​ແລະ ການ​ຂະຫຍາຍ​ເຄືອ​ຂ່າຍ​ການ​ຈຳໜ່າຍ, ລວມທັງ​ເພີ່ມ​ທະວີ​ຄວາມ​ສາມາດ​ຂອງຕ່ອງ​ໂສ້​ການ​ສະໜອງ​ຢູ່​ຕ່າງປະ​ເທດ.

ຕາມລາຍງານ ບໍລິສັດໄດ້ສ້າງຜະລິດຕະພັນແບບປະສົມປະສານທີ່ຄົບຮອບດ້ານທີ່ສຸດຂອງອຸດສາຫະກໍາ ໂດຍກວມເອົາຜະລິດຕະພັນຫຼາຍກວ່າ 1,400 SKUs.  7 ຜະ​ລິດ​ຕະ​ພັນ​ຫຼັກ​ຂອງບໍລິສັດໄດ້​ສ້າງ​ຍອດການ​ຂາຍຕໍ່​ປີ​ເກີນ 1 ຕື້​ຢວນ​. ບໍລິສັດເປັນຜູ້ນໍາໃນຕະຫຼາດພາຍໃນປະເທດ ດ້ວຍສ່ວນແບ່ງການຕະຫຼາດຫຼາຍກວ່າຄູ່ແຂ່ງທີ່ໃກ້ທີ່ສຸດຫຼາຍກ່ວາສອງເທົ່າ.

 

ອີງຕາມການຄາດຄະເນຂອງ Frost & Sullivan, ຕະຫຼາດເຄື່ອງປຸງອາຫານທົ່ວໂລກຄາດວ່າຈະບັນລຸເຖີງ 402.7 ຕື້ໂດລາສະຫະລັດໃນປີ 2029, ດ້ວຍອັດຕາການຂະຫຍາຍຕົວປະຈໍາປີແບບທົບຕົ້ນ (CAGR) ຢູ່ທີ່ 6.2 % ຕັ້ງແຕ່ປີ 2024 ຫາປີ 2029. ຕະຫຼາດທີ່ເກີດໃໝ່ກໍາລັງເລັ່ງການຂະຫຍາຍຕົວດັ່ງກ່າວ, ໂດຍອາຊີຕາເວັນອອກສຽງໃຕ້ ແລະ ອາເມລິກາລາຕິນອັດຕາການຂະຫຍາຍຕົວປະຈໍາປີແບບທົບຕົ້ນ (CAGR) ຢູ່ທີ່ 9.1% ແລະ 7.8% ຕາມລໍາດັບ.

ນັກວິ​ເຄາະ​ອຸດສາຫະກຳ​ກ່າວ​ວ່າ: ​ເສັ້ນທາງ​ການ​ເຕີບ​ໂຕ​ທີ່​ເຂັ້ມ​ແຂງ​ນີ້​ສ້າງ​ໂອກາດ​ທີ່​ກວ້າງຂວາງ​ໃຫ້​ແກ່​ການ​ຫັນ​ເປັນ​ສາກົນ​ຂອງ​ເຄື່ອງ​ປຸງ​​ອາຫານ​ຂອງ​ຈີນໄປທົ່ວໂລກ, ​ໄດ້​ສ້າງ​ເງື່ອນ​ໄຂ​ທີ່​ສະດວກ​ໃຫ້​ແກ່​ການ​ພັດທະນາ​ໃນລະດັບ​ໂລກ​ຂອງ Haitian ອີກດ້ວຍ.

(ຮຽບຮຽງໂດຍ: Niu Huizhe ກັບ Xinhua Silk Road, niuhuizhe@xinhua.org)

 

แชร์