ສໍາເລັດກອງປະຊຸມສະ​ມາ​ຄົມ​ມິດ​ຕະ​ພາບ ລາວ-ສ.ເກົາຫຼີ ຄັ້ງທີ XIV

ໂດຍຕອບສະໜອງ ຕາມການເຊີນ ຂອງສະ​ມາ​ຄົມ​ມິດ​ຕະ​ພາບ ສ. ເກົາຫຼີ - ລາວ (KLFA), ຄະນະຜູ້ແທນ​ສະ​ມາ​ຄົມ​ມິດ​ຕະ​ພາບ ລາວ - ສ. ເກົາຫຼີ (LKFA) ຊຶ່ງນຳໂດຍ ​ທ່ານ ຄໍາສວຍ ແກ້ວດາລາວົງ ປະທານສະມາຄົມມິດຕະພາບ ລາວ - ສ.ເກົາຫຼີ ໄດ້ເດີນທາງໄປຢ້ຽມຢາມ ແລະ ແລະ ເຮັດ​ວຽກ ທີ່ ສ. ເກົາຫຼີ ແຕ່ວັນທີ 22-27 ຕຸ​ລາ 2025.

ໃນວັນທີ 23 ຕຸ​ລາ 2025, ສອງສະມາຄົມມິດຕະພາບ ໄດ້ຈັດກອງປະຊຸມພົບປະຄັ້ງທີ XIV ທີ່ໂຮງແຮມ ເຊອູນ ​ກາ​ເດີນ (SEOUL GARDEN) ນະ​ຄອນຫຼວງ​ເຊ​ອູນ, ສ. ​ເກົາຫຼີ ໂດຍການເປັນປະທານຮ່ວມຂອງ ທ່ານ ຄຳສວຍ ແກ້ວດາລາວົງ ປະທານສະມາຄົມມິດຕະພາບ ລາວ - ສ. ເກົາຫຼີ ແລະ ທ່ານ ໂອ ມິງຮວັນ (OH MYUNG HWAN) ປະທານສະມາຄົມມິດຕະພາບ ສ. ເກົາຫຼີ - ລາວ. ພ້ອມນີ້, ຍັງມີ ທ່ານ ສົງ​ການ ຫຼວງ​ມູ​ນິນ​ທອນ ​ເອກອັກ​ຄະ​ລັດຖະ​ທູດແຫ່ງ ສປປ ລາວ ປະ​ຈຳ ສ. ເກົາຫຼີ ແລະ ບັນດາ​ຄະນະບໍລິຫານງານສະມາຄົມ​ມິດ ຕະພາບ ລາວ -​ ສ. ​ເກົາຫຼີ ແລະ ສ. ເກົາຫຼີ - ລາວ, ພະນັກງານ​ ຈາກ​ພາກສ່ວນ ​ທີ່​ກ່ຽວຂ້ອງ​ຂອງ​ທັງ​ສອງ​ຝ່າຍ ທັງ​ພາກ​ລັດ ​ແລະ ​ເອ​ກະ​ຊົນ​ເຂົ້າ​ຮ່ວ​ມ.

ກອງປະຊຸມ ໄດ້ສະຫຼຸບຕີລາຄາການພົວພັນຮ່ວມມືກັນລະຫວ່າງ ສອງສະມາຄົມໃນໄລຍະ 1 ປີຜ່ານມາ ແລະ ວາງ​ທິດ​ທາງ​ແຜນ​ການ​ໃນ​ຕໍ່​ໜ້າ, ເຊິ່ງຜ່ານ​ມາ​ສອງສະມາຄົມມິດຕະພາບ ໄດ້​ມີຜົນສໍາເລັດອັນພົ້ນເດັ່ນ ໃນ​ການຮ່ວມມືກັນປະ ກອບສ່ວນຊ່ວຍເຫຼືອ​ ແລະ ພັດທະນາຢູ່ ສປປ ລາວ ໂດຍສະເພາະດ້ານພື້ນຖານໂຄງລ່າງການສຶກສາ, ສາທາ​ລະ​ນະ​ສຸກ, ມະ ນຸດສະທໍາ, ເຊິ່ງສອງສະມາຄົມມິດຕະພາບ ໄດ້ຊ່ວຍເຫຼືອສ້າງ​ໂຮງ​ຮຽນ, ​ສະ​ໜອງຢາປິ່ນ ປົວພະຍາດ, ເຄື່ອງ​ນຸ່ງ​ຫົ່ມ, ອຸ​ປະ​ກອນ​ການສຶກ​ສາ ແລະ ອື່ນໆ ລວມ​ມູນ​ຄ່າ​ທັງ​ໝົດ 129,970 ໂດ​ລາ​ສະ​ຫະ​ລັດ.  

ພ້ອມນີ້, ສອງຝ່າຍເຫັນດີສືບຕໍ່ຮ່ວມມື ແລະ ເຄື່ອນໄຫວຮ່ວມກັນຕາມພາລະບົດບາດ ໂດຍສືບຕໍ່ໂຄສະນາເຜີຍແຜ່ສາຍພົວພັນ ແລະ ການຮ່ວມມືອັນດີງາມ ລະຫວ່າງສອງປະເທດໃຫ້ປະຊາຊົນສອງຊາດ ໄດ້ຮັບຮູ້ ແລະ ເຂົ້າໃຈຢ່າງເລິກ ເຊິ່ງ, ສະໜັບສະໜູນການໄປມາຫາສູ່ ແລະ ພົວພັນຮ່ວມມືລະຫວ່າງປະຊາຊົນ ເພື່ອສ້າງຄວາມຮັກແພງ, ຄວາມໄວ້ເນື້ອເຊື່ອໃຈ ແລະ ສ້າງກິດຈະກໍາຮ່ວມກັນ ເພື່ອປະກອບສ່ວນເສີມຂະຫຍາຍ ແລະ ພັດທະນາສາຍພົວພັນມິດຕະ​ພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ.ເກົາຫຼີໃຫ້ນັບມື້ໄດ້ຮັບການພັດທະນາ ແລະ ກ້າວເຂົ້າສູ່ລະດັບໃໝ່.

ໃນວັນດຽວກັນ, ທ່ານ ຄຳ​ສວຍ ແກ້ວ​ດາ​ລາ​ວົງ ​​ ​ໄດ້ຕາງ​ໜ້າ​​ໃຫ້ລັດ​ຖະ​ບານ​ແຫ່ງ​ ສ​ປ​ປ ​ລາວ ປະ​ດັບຫຼຽນກາ​ມິດ​ຕະ​ພາບ ໃຫ້​ແກ່ຄະນະບໍລິຫານງານ ຂອງສະ​ມາ​ຄົມ​ມິດ​ຕະ​ພາບ ສ.ເກົ​າຫຼີ - ລາວ ຈຳ​ນວນ 03 ທ່ານ ເພື່ອ​ເປັນ​ການ​ຍ້ອງ​ຍໍ​ຜົນ​ງານຄຸນ​ງາມຄວາມ​ດີ ຕໍ່ການ​ປະກອບສ່ວນເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສ. ເກົາຫຼີ ກໍ່ຄືການປະກອບສ່ວນ​ທຶນຮອນ​ຊ່ວຍ​ເຫຼືອ​ສ້າງ​ສາ​ພັດ​ທະ​ນາ ສ​ປ​ປ ລາວ ເປັນ​ຕົ້ນ ​ແມ່ນ​​ການ​ສ້າງໂຮງ​ຮຽນ​ປະ​ຖົມ​ສົມ​ບູນບ້ານ​ຊຽງ​ແລ​ນາ, ເມືອງ​ປາກ​ງື່ມ, ນະ​ຄອນຫຼວງວຽງ​ຈັນ, ໂຮງ​ຮຽນ​ປະ​ຖົມ​ສົມ​​ບູນບ້ານ​ຫ້ວຍ​ລ້າ, ເມືອງ​ສັງ​ທອງ, ນະ​ຄ​ອນຫຼວງວຽງ​ຈັນ ແລະ ໂຮງ​ຮຽນ​ປະ​ຖົມ​ສົມ​ບູນ​ບ້ານ​ກ້ານ, ເມືອ​ງ​ຊຳ​ເໜືອ, ແຂວງ​ຫົວ​ພັນ.

        ນອກຈາກນີ້ ຄະນະຜູ້ແທນສະມາຄົມມິດຕະພາບ ລາວ - ສ.ເກົາຫຼີ ໄດ້ຢ້ຽມຢາມ ແລະ ທັດ​ສະ​ນະສຶກ​ສາສະຖານ ທີ່ທ່ອງທ່ຽວປະຫັວດສາດ​ຈຳ​ນວນ​ໜຶ່ງ​ຂອງ​ແຂວງ​ໂຈ​ລາ​, ​ເຊິ່ງການຢ້ຽມຢາມຂອງ​ຄະ​ນະ ​ໃນ​ຄັ້ງ​ນີ້​ແມ່ນໄດ້ຮັບ​ຜົນ​ສຳ​ເລັດຢ່າງສະຫງ່າງາມ.

  • ຂ່າວ: ຣັດສະໝີ ດວງສັດຈະ.

 

แชร์