ໃນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ວັນທີ 17 ພະຈິກ 2025, ທ່ານ ສັນຕິພາບ ພົມວິຫານ, ລັດຖະມົນຕີກະຊວງການເງິນ, ໄດ້ນໍາສະເໜີບົດຊີ້ແຈງກ່ຽວກັບຄວາມຄືບໜ້າໃນການແກ້ໄຂຜົນການກວດກາ–ກວດສອບ ຕາມມະຕິເລກທີ 139/ສພຊ ແລະ 140/ສພຊ ໃນໄລຍະ 2021–2025. ບົດລາຍງານເປີດເຜີຍວ່າ ຍັງມີຫຼາຍບັນຫາຄ້າງຄາ ທີ່ກໍາລັງຢູ່ໃນຂະບວນການແກ້ໄຂ ແລະ ບາງສ່ວນຈໍາເປັນຕ້ອງໃຫ້ສະພາແຫ່ງຊາດ ແລະ ລັດຖະບານກໍາຊັບການຕິດຕາມໃກ້ຊິດ.

1. ການຂາຍໄມ້ບໍ່ຜ່ານການປະມູນ ແລະ ຫຼຸດລາຄາກາງ ຂອງກະຊວງອຸດສາຫະກຳ ແລະການຄ້າ: ການດໍາເນີນການປະມູນຂາຍໄມ້ຫຼຸດລາຄາກາງ ຂອງກະຊວງອຸດສາຫະກຳ ແລະ ການຄ້າ ຢູ່ ແຂວງຈໍາປາສັກ ໃນ 16 ສັນຍາ ບໍລິມາດ 4,516 ແມັດກ້ອນ, ມູນຄ່າ 15.8 ຕື້ກີບ. ຕໍ່ບັນຫາດັ່ງກ່າວ ກໍ ໄດ້ສົມທົບ ກັບແຂວງ ເພື່ອກວດກາຄືນເຫັນວ່າ ແຂວງ ກໍ່ໄດ້ມີການແຕ່ງຕັ້ງຄະນະ ເພື່ອດໍາເນີນການ ປະມູນຕາມລະບຽບການແລ້ວ ແຕ່ບໍ່ມີພາກສ່ວນໃດສົນໃຈ ເນື່ອງຈາກວ່າ ເປັນໄມ້ເນື້ອອ່ອນ, ໄມ້ຖ່ອນ ນ້ອຍ ແລະ ເກັບໄວ້ດົນຄຸນນະພາບບໍ່ສູງ. ສະນັ້ນ, ທາງແຂວງຈຶ່ງໄດ້ຂາຍອອກໃນລາຄາ 6.7 ຕື້ກີບ ເຊິ່ງຕໍ່າກວ່າລາຄາກາງພາໃຫ້ເກີດມີຄ່າຜິດດ່ຽງຢູ່ 9.1 ຕື້ກີບ, ຕໍ່ກັບບັນຫາດັ່ງກ່າວສະເໜີ ການນໍາແຂວງ ແລະ ສະພາປະຊາຊົນແຂວງເປັນຜູ້ຕິດຕາມແກ້ໄຂ ຕາມພາລະບົດບາດ.