ໃນກອງປະຊຸມ, ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ, ຄະນະກໍາມະການອະໄພຍະໂທດລະດັບຊາດ, ທັງເປັນຫົວໜ້າກອງເລຂາຄະນະກໍາມະການອະໄພຍະໂທດ ລະດັບຊາດ ໄດ້ຜ່ານບົດສະຫລຸບການຈັດຕັ້ງປະຕິບັດວຽກງານອະໄພຍະໂທດ ປະຈໍາປີ 2025 ແລະ ທິດທາງວຽກງານຈຸດສຸມ ປະຈໍາປີ 2026 ໂດຍຍົກໃຫ້ເຫັນດ້ານດີ, ຜົນສຳເລັດ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຊຶ່ງໜຶ່ງປີຜ່ານມາ, ມີນັກໂທດທີ່ໄດ້ຮັບການໃຫ້ອະໄພຍະໂທດ ປະຈໍາປີ 2025 ຕາມລັດຖະດໍາລັດຂອງປະທານປະເທດ ສະບັບເລກທີ 304/ປປທ, ລົງວັນທີ 20 ພະຈິກ 2025 ທັງໝົດ 2.858 ຄົນ, ຍິງ 362 ຄົນ; ຕ່າງປະເທດ 59 ຄົນ, ຍິງ 7 ຄົນ. ໃນນີ້ ໄດ້ຮັບການຫລຸດຜ່ອນໂທດ ທັງໝົດ 2.622 ຄົນ, ຍິງ 329 ຄົນ, ຕ່າງປະເທດ 57 ຄົນ, ຍິງ 6 ຄົນ; ນັກໂທດຕະຫລອດຊີວິດ ໄດ້ຮັບອະໄພຍະໂທດມາເປັນໂທດ 20 ປີ 42 ຄົນ, ຍິງ 3 ຄົນ, ຕ່າງປະເທດ 4 ຄົນ; ນັກໂທດທີ່ໄດ້ເງື່ອນໄຂປ່ອຍຕົວ ທັງໝົດ 236 ຄົນ, ຍິງ 33 ຄົນ, ຕ່າງປະເທດ 2 ຄົນ, ຍິງ 1 ຄົນ; ນັກໂທດທີ່ຖືກສານຕັດສີນປະຫານຊີວິດ ໄດ້ຮັບອະໄພຍະໂທດມາເປັນໂທດຕັດອິດສະລະພາບຕະຫລອດຊີວິດ ຕາມລັດຖະດໍາລັດ ຂອງປະທານປະເທດ ສະບັບເລກທີ 305/ປປທ, ລົງວັນທີ 20 ພະຈິກ 2025 ມີຈໍານວນ 40 ຄົນ, ຍິງ 5 ຄົນ. ນອກຈາກນີ້, ເນື່ອງໃນໂອກາດວັນສະຖາປະນາຄົບ ຮອບ 50 ປີ ຍັງໄດ້ມີການອະໄພຍະໂທດ ໃຫ້ແກ່ນັກໂທດທີ່ມີອາຍຸ 70 ປີ ຂຶ້ນໄປ ຕາມດໍາລັດຂອງປະທານປະເທດ ສະບັບເລກທີ 332/ປປທ, ລົງວັນທີ 5 ທັນວາ 2025 ຈໍານວນ 28 ຄົນ, ຍິງ 8 ຄົນ. ພ້ອມນີ້, ຍັງໄດ້ຊຸກຍູ້ພາກສ່ວນປະຕິບັດຄໍາຕັດສິນຂອງສານ ເກັບຄ່າປັບໃໝ ແລະ ຄ່າເສຍຫາຍທາງແພ່ງ ທີ່ນັກໂທດຊໍາລະໃນການຄົ້ນຄວ້າສະເໜີໃຫ້ອະໄພຍະໂທດ ປະຈຳປີ 2025 ທັງໝົດ 13,3 ຕື້ກວ່າກີບ, ເປັນເງິນໃຊ້ແທນຄ່າເສຍຫາຍທາງແພ່ງ 3 ຕື້ກວ່າກີບ ແລະ ໂທດປັບໃໝທາງອາຍາ ໄດ້ທັງໝົດ 10,2 ຕື້ກວ່າກີບ.

 

ໂອກາດນີ້, ປະທານກອງປະຊຸມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຈັດຕັ້ງ ປະຕິ ບັດໃນປີຜ່ານມາ ບົນຈິດໃຈເຊີດຊູຄວາມຮັບຜິດຊອບຂອງ ຄະນະກຳມະການອະໄພຍະໂທດລະດັບຕ່າງໆ ໄດ້ປະຕິບັດໜ້າທີ່ສໍາເລັດຕາມຈຸດປະສົງ ແລະ ຄາດໝາຍ, ບັນດາຜົນສໍາເລັດລວມ ແມ່ນຄວາມຮັບຜິດຊອບການເມືອງຂອງຄະນະກຳມະການແຕ່ລະຂັ້ນ, ແມ່ນການປະກອບສ່ວນຂອງຂະແໜງການ, ອົງການກ່ຽວຂ້ອງ ຊຶ່ງໄດ້ພ້ອມກັນທຸ້ມເທເຫື່ອແຮງ, ຄວາມຮູ້, ຄວາມສາມາດຂອງຕົນ ເຂົ້າໃນການ ເຄື່ອນໄຫວຈັດຕັ້ງປະຕິບັດໜ້າທີ່ວຽກງານປິ່ນອ້ອມຈົນໄດ້ຮັບຜົນສໍາເລັດ.

ຂ່າວ-ພາບ: ວຽງສະຫວັນ