ຈີນ ທີ່ເປີດປະຕູສູ່ພາຍນອກຂັບເຄື່ອນການພັດທະນາທົ່ວໂລກ
ວິທະຍຸໂທລະພາບສູນກາງຈີນ (CMC) ລາຍງານ, ໂລກໃນປັດຈຸບັນ, ລັດທິຝ່າຍດຽວ ແລະລັດທິປົກປ້ອງການຄ້າກຳລັງແພ່ຫຼາຍຢ່າງກວ້າງຂວາງກະທົບຢ່າງໜັກໜ່ວງຕໍ່ການພັດທະນາທົ່ວໂລກ. ພາຍໃຕ້ສະພາບການດັ່ງກ່າວ, ຝ່າຍຕ່າງໆຍິ່ງເອົາໃຈໃສ່ຕໍ່ສັນຍານການເປີດປະຕູສູ່ພາຍນອກທີ່ໄດ້ສົ່ງອອກມາຈາກກອງປະຊຸມສອງສະພາຂອງຈີນໃນປີນີ້.
ຫວ່າງມໍ່ໆມານີ້, ໃນເວລາເຂົ້າຮ່ວມການຄົ້ນຄວ້າພິຈາລະນາຂອງຄະນະຜູ້ແທນແຂວງຈ່ຽງຊູ່ໃນກອງປະຊຸມສອງສະພາທີ່ຈັດຂຶ້ນຢູ່ນະຄອນຫຼວງປັກກິ່ງຂອງຈີນ, ທ່ານສີຈິ້ນຜິງ ປະທານປະເທດຈີນໄດ້ເນັ້ນໜັກອີກເທື່ອໜຶ່ງວ່າ: ຕ້ອງເປີດກວ້າງການເປີດປະຕູສູ່ພາຍນອກໃນລະດັບສູງ, ບຸກເບີກຕະຫຼາດທົ່ວໂລກຢ່າງກວ້າງຂວາງກວ່າເກົ່າ ແລະ ເຊື່ອມໂຍງການໝູນວຽນສາກົນໃຫ້ໄດ້ດີກວ່າເກົ່າ.” ປະຊາຄົມໂລກໄດ້ຮັບຮູ້ ແລະ ເຂົ້າໃຈເຖິງການຕັດສິນໃຈ ແລະ ຄວາມໝັ້ນໃຈຂອງຈີນໃນການນຳພາການຮ່ວມມືແບບເປີດປະຕູສູ່ພາຍນອກ. ຈີນໄດ້ຍຶດໝັ້ນການເປີດປະຕູສູ່ພາຍນອກໃນລະດັບສູງເປັນຫຼັກການນຳພາຢ່າງຕໍ່ເນື່ອງ, ຈາກການເຊື່ອມຈອດເສັ້ນທາງສາຍໄໝເຫຼັກ ແລະ ເຫຼັກກ້າ ເຖິງການປະຕິບັດການເປີດປະຕູສູ່ພາຍນອກດ້ານລະບຽບການຢ່າງເລິກເຊິ່ງ ໄດ້ເຮັດໃຫ້ການພັດທະນາສາມາດສ້າງຜົນປະໂຫຍດໃຫ້ແກ່ຊີວິດການເປັນຢູ່ຂອງປະຊາຊົນ, ທັງໄດ້ສ້າງແຮງຂັບເຄື່ອນທີ່ໝັ້ນທ່ຽງໃຫ້ແກ່ການພັດທະນາເສດຖະກິດຂອງໂລກ.
ຈີນທີ່ເປີດປະຕູສູ່ພາຍນອກ, ໄດ້ສ້າງຂົວແຫ່ງການຮ່ວມມືທົ່ວໂລກທີ່ໝັ້ນຄົງ ດ້ວຍການເຊື່ອມຕໍ່ເຄືອຂ່າຍພື້ນຖານໂຄງລ່າງ. ໝາກຖົ່ວລຽນໝອນທອງຂອງໄທສາມາດໄປຂາຍຢູ່ໃນຮ້ານຊັບພະສິນຄ້າຢູ່ນະຄອນຄຸນໝິງຂອງຈີນໃນມື້ທີ 2 ໂດຍຜ່ານການຂົນສົ່ງຕາມເສັ້ນທາງລົດໄຟລາວ-ຈີນ, ສາງຂົນຖ່າຍສິນຄ້າອັດສະລິຍະທີ່ໄດ້ນຳໃຊ້ເຕັກໂນໂລຊີ 5G ແລະ ລະບົບນຳທາງເປີຍໂຕຂອງຈີນ ໄດ້ເຮັດໃຫ້ເວລາແຈ້ງຜ່ານດ່ານຫຼຸດລົງເຫຼືອພຽງ 2 ຊົ່ວໂມງ, ຕົ້ນທຶນໃນການຂົນສົ່ງຫຼຸດລົງ 60% ແລະ ລາຄາປາຍທາງໄດ້ຫຼຸດລົງ 30%, ດ່ານສາກົນບໍ່ຫານກາຍເປັນດ່ານທາງບົກທີ່ໃຫຍ່ທີ່ສຸດສຳລັບການນຳເຂົ້າໝາກຖົ່ວລຽນຂອງຈີນ, ປະຊາຊົນຈີນຊື້ໝາກຖົ່ວລຽນໄດ້ຢ່າງສະດວກສະບາຍຍ້ອນນະໂຍບາຍເປີດປະຕູສູ່ພາຍນອກ.
ນອກນີ້, ເສັ້ນທາງລົດໄຟຈີນ-ເອີຣົບ, ຈີນ-ອາຊີກາງ ແລະ ຊ່ອງທາງໃໝ່ທາງບົກ-ທາງທະເລພາກຕາເວັນຕົກຂອງຈີນ ໄດ້ເຮັດໃຫ້ຈີນເຊື່ອມຕໍ່ກັບພາກພື້ນຕ່າງໆນັບມື້ນັບແໜ້ນແຟ້ນກວ່າເກົ່າ. ດ້ວຍເຄືອຂ່າຍພື້ນຖານໂຄງລ່າງດັ່ງກ່າວ, ລົດຍົນພະລັງງານໃໝ່ ແລະ ຜະລິດຕະພັນຜະລິດໄຟຟ້າພະລັງງານແສງຕາເວັນເປັນຕົ້ນໄດ້ສົ່ງອອກຕ່າງປະເທດຫຼາຍກວ່າເກົ່າ ແລະ ສິນຄ້າທີ່ດີຂອງຕ່າງປະເທດໄດ້ສົ່ງເຂົ້າຕະຫຼາດຈີນຫຼາຍກວ່າເກົ່າ. ການນຳເຂົ້າ-ສົ່ງອອກສິນຄ້າ ແລະ ອຸດສາຫະກຳໄດ້ຮັບການພັດທະນາແບບປະສົມປະສານກັນ ເຮັດໃຫ້ຈີນກາຍເປັນຂອດສຳຄັນໃນຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງທົ່ວໂລກ.
ການລົງເລິກການເປີດປະຕູສູ່ພາຍນອກດ້ານລະບຽບການ ໄດ້ສ້າງພື້ນຖານລະບຽບການທີ່ໝັ້ນຄົງໃຫ້ແກ່ການພັດທະນາທົ່ວໂລກ. ໂດຍຜະເຊີນໜ້າກັບຄວາມບໍ່ແນ່ນອນໃນການພັດທະນາທົ່ວໂລກ, ຈີນໄດ້ເປີດກວ້າງການເປີດປະຕູສູ່ພາຍນອກຢ່າງຕໍ່ເນື່ອງ, ໄດ້ສ້າງຕັ້ງ ແລະ ເປີດດ່ານພາສີອິດສະຫຼະທົ່ວເກາະໄຫຫຼຳ, ລະດັບການເປີດປະຕູສູ່ພາຍນອກດ້ານລະບຽບການຕາມເຂດທົດລອງການຄ້າເສລີໄດ້ສູງຂຶ້ນຢ່າງໜັກແໜ້ນ, ສະພາບແວດລ້ອມໃນການດຳເນີນທຸລະກິດທີ່ມຸ່ງໝັ້ນຕະຫຼາດ, ບໍລິຫານກົດໝາຍ ແລະ ຄວາມເປັນສາກົນໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ. ການແຈ້ງຜ່ານດ່ານທີ່ມີປະສິດທິພາບສູງຢູ່ດ່ານສາກົນບໍ່ຫານ ແລະ ການຊຸກຍູ້ໂຄງການຮ່ວມມື “ດ່ານພາສີອັດສະລິຍະ” ເຮັດໃຫ້ການຄ້າຂ້າມຊາດມີປະສິດທິພາບສູງກວ່າເກົ່າ; ມີວິສາຫະກິດຂ້າມຊາດ 94% ມີຄວາມເຫັນໄປໃນແງ່ດີຕໍ່ຕະຫຼາດຈີນ, ຈຳນວນວິສາຫະກິດທຶນຕ່າງປະເທດທີ່ສ້າງຕັ້ງຂຶ້ນໃໝ່ຢູ່ຈີນໄດ້ເພີ່ມຂຶ້ນ 19,1%, ງານວາງສະແດງລະດັບຊາດຕ່າງໆ ເຊັ່ນ: ງານວາງສະແດງສິນຄ້ານຳເຂົ້າສາກົນຈີນ, ງານຕະຫຼາດນັດສິນຄ້ານຳເຂົ້າ-ສົ່ງອອກຈີນ ແລະ ອື່ນໆ ໄດ້ສ້າງເວທີການເຊື່ອມຕໍ່ດ້ານການສະໜອງກັບຄວາມຕ້ອງການທົ່ວໂລກ, ຈີນໄດ້ຮັບມືກັບຄວາມບໍ່ແນ່ນອນຂອງໂລກ ດ້ວຍຄວາມແນ່ນອນດ້ານລະບຽບການຂອງຕົນ ເຊິ່ງເປັນການສະໜອງສິ່ງຄ້ຳປະກັນດ້ານລະບຽບການທີ່ໝັ້ນຄົງໃຫ້ແກ່ການຮ່ວມມືທົ່ວໂລກ.
ການເປີດປະຕູສູ່ພາຍນອກ ແລະການເຊື່ອມຕໍ່ກັບພາຍນອກຂອງຈີນບໍ່ພຽງແຕ່ໄດ້ສ້າງຜົນປະໂຫຍດໃຫ້ແກ່ປະຊາຊົນຈີນເທົ່ານັ້ນ, ຍັງໄດ້ສ້າງຜົນປະໂຫຍດໃຫ້ແກ່ປະຊາຊົນປະເທດຕ່າງໆໃນໂລກອີກດ້ວຍ. ໜຶ່ງປີຜ່ານມາ, ການຄ້າຂາເຂົ້າ-ຂາອອກລະຫວ່າງຈີນກັບ 190 ກວ່າປະເທດ ແລະເຂດແຄວ້ນທົ່ວໂລກໄດ້ບັນລຸການເຕີບໂຕ, ໃນນັ້ນ, ການຄ້າກັບບັນດາປະເທດສະມາຊິກອາຊຽນ, ອາເມຣິກາລາຕິນ ແລະ ອາຟຣິກາ ລ້ວນແຕ່ເພີ່ມຂຶ້ນໃນລະດັບສູງຢ່າງຕໍ່ເນື່ອງ; ຈຳນວນນັກທ່ອງທ່ຽວເຂົ້າມາທ່ຽວຈີນໄດ້ເພີ່ມຂຶ້ນ 17,1%, ມາດຕະການຍົກເວັ້ນວີຊາຂອງຈີນໄດ້ດຶງດູດນັກທ່ອງທ່ຽວສາກົນມາທ່ຽວຈີນນັບມື້ນັບຫຼາຍຂຶ້ນ. ສິນຄ້າ, ບຸກຄະນາກອນ ແລະ ຂໍ້ມູນຂ່າວສານໄດ້ໄຫຼວຽນຢ່າງມີປະສິດທິພາບສູງ ເຮັດໃຫ້ຄວາມຕ້ອງການຂອງຈີນ ທີ່ມີຕະຫຼາດຂະໜາດໃຫຍ່ພິເສດເພີ່ມຄວາມອົບອຸ່ນໃຫ້ແກ່ເສດຖະກິດໂລກ. ພາຍໃຕ້ຂອບຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ, ການບຳລຸງສ້າງບຸກຄະລາກອນໃນໂຄງການເສັ້ນທາງລົດໄຟລາວ-ຈີນໄດ້ຮັບຜົນງານທີ່ດີ, ພະນັກງານລາວທີ່ເຮັດວຽກຕາມເສັ້ນທາງລົດໄຟຕອນຢູ່ໃນປະເທດລາວໄດ້ກວມຫຼາຍກວ່າ 67%; “ຮ່ອມພູຊີລີຄອນອາຟຣິກາ” ຂອງເຄນຢາໄດ້ເລັ່ງການຫັນເປັນແບບດີຈີຕອນຂອງທ້ອງຖີ່ນ… ການເປີດປະຕູສູ່ພາຍນອກຂອງຈີນບໍ່ພຽງແຕ່ແມ່ນການໄຫຼວຽນຂອງສິນຄ້າ ແລະ ທຶນຮອນເທົ່ານັ້ນ, ຍິ່ງແມ່ນການແບ່ງປັນເຕັກໂນໂລຊີ, ຜູ້ມີຄວາມຮູ້ຄວາມສາມາດ ແລະ ບົດຮຽນອີກດ້ວຍ ເຊິ່ງເຮັດໃຫ້ຜົນງານການພັດທະນາສ້າງຜົນປະໂຫຍດໃຫ້ແກ່ປະຊາຊົນປະເທດຕ່າງໆໄດ້ຢ່າງຍຸຕິທຳກວ່າເກົ່າ.
ປີນີ້, ຈີນໄດ້ເລີ່ມປະຕິບັດແຜນພັດທະນາ 5 ປີຄັ້ງທີ 15, ແຜນຜັງການເປີດປະຕູສູ່ພາຍນອກໃນລະດັບສູງຂອງຈີນນັບມື້ນັບຈະແຈ້ງ, ມາດຕະການຕ່າງໆຂອງຈີນ ເຊັ່ນ: ການປັບປຸງສະພາບການໃນການເຈາະຕະຫຼາດໂລກໃຫ້ດີຂຶ້ນ,ຊຸກຍູ້ການຍົກລະດັບຂອງທຸລະກິດເອເລັກໂຕຣນິກຂ້າມຊາດໃຫ້ສູງຂຶ້ນ, ເຂົ້າຮ່ວມການປະຕິຮູບອົງການການຄ້າໂລກ ແລະ ອື່ນໆຈະເປັນມາດຕະການທີ່ດີໃນການຮັດແໜ້ນການຮ່ວມມືສາກົນຕື່ມອີກ. ໃນອະນາຄົດ, ຈີນຈະນັບມື້ນັບເປີດກວ້າງການເປີດປະຕູສູ່ພາຍນອກ, ຮ່ວມກັນຊຸກຍູ້ຂະບວນການເສດຖະກິດໂລກາພິວັດກັບປະເທດຕ່າງໆໃນໂລກ ເພື່ອເຮັດໃຫ້ຜົນງານດ້ານການເປີດປະຕູສູ່ພາຍນອກ ແລະການຮ່ວມມືສ້າງຜົນປະໂຫຍດໃຫ້ແກ່ທຸກມຸມໂລກ ແລະຮ່ວມກັນມຸ່ງໜ້າໄປສູ່ອະນາຄົດທີ່ຈະເລີນຮຸ່ງເຮືອງກວ່າເກົ່າ.
