ຈຸດປະສົງຂອງກອງປະຊຸມແມ່ນ ເພື່ອທົບທວນຄວາມຄືບໜ້າ, ຜົນສຳເລັດຕົ້ນຕໍ 2025, ຜົນການປະເມີນ ກາງສະໄໝຂອງ ແຜນງານ ພັດທະນາທ້ອງຖິ່ນ ທີ່ດໍາເນີນໃນປີ 2025, ແລະ ຮັບຮອງແຜນວຽກ ສຳລັບ ປີ 2026. ແຜນງານ ພັດທະນາທ້ອງຖິ່ນ ໄດ້ຮັບການສະໜູນຈາກລັດຖະບານ ລຸກຊຳບວກ ແລະ ລັດຖະບານ ສະວິດເຊີແລນ ມູນຄ່າຫຼາຍກວ່າ 41 ລ້ານເອີໂຣ ມີໄລຍະເວລາຈັດຕັ້ງປະຕິບັດ 2023-2027 ເຊິ່ງມີຈຸດປະສົງຕົ້ນຕໍເພື່ອສົ່ງເສີມການພັດທະນາແບບຍືນຍົງ.

 

ໃນພິທີເປີດກອງປະຊຸມ, ທ່ານນາງ ພອນວັນ ອຸທະວົງ ໄດ້ກ່າວຄວາມຂອບໃຈຕໍ່ປະເທດ ລຸກຊຳບວກ ແລະ ປະເທດສະວິດເຊີແລນ ພ້ອມທັງເນັ້ນໜັກເຖິງຄວາມສຳຄັນ ແລະ ຄວາມສອດຄ່ອງຂອງ ແຜນງານ ພັດທະນາທ້ອງຖິ່ນ ໃນການປະກອບສ່ວນຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ແລະ 10 ໂດຍສະເພາະ ແຜນການ 5 ປີ ຄັ້ງທີ 10 (2026-2030) ທີ່ຈະສະເໜີຮັບຮອງຢູ່ ກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ 10 ທີ່ຈະດຳເນີນລະຫວ່າງ ວັນທີ 23-27 ມີນາ 2026. ແຜນງານ ພັດທະນາທ້ອງຖິ່ນ ສະໜັບສະໜູນໂດຍກົງ ເປົ້າໝາຍໃຫຍ່ທີ 2 (ດ້ານຊັບພະຍາກອນມະນຸດ), 3 (ດ້ານການພັດທະນາ) ແລະ 6 (ດ້ານການຄຸ້ມຄອງບໍລິຫານລັດ) ດ້ວຍການສະໜອງໂຄງລ່າງພື້ນຖານທີ່ຈຳເປັນ, ການສົ່ງເສີມກອງທຶນພັດທະນາບ້ານ ແລະ ການຍົກລະດັບຂີດຄວາມສາມາດຂອງພາກລັດຢູ່ທຸກລະດັບ ແລະ ຢູ່ໃນຫຼາຍຂົງເຂດ.

ຜ່ານການຈັດຕັ້ງປະຕິບັດ ປີ 2025 ທີ່ຜ່ານມາ ສາມາດສະຫຼຸບບາງຜົນສຳເລັດ ແລະ ຄວາມຄືບໜ້າ ເປັນຕົ້ນ 226 ບ້ານຂອງ 4 ແຂວງເປົ້າໝາຍ ໄດ້ເລີ່ມຈັດຕັ້ງ ແຜນພັດທະນາບ້ານແບບມີສ່ວນຮ່ວມ, ສໍາເລັດກິດຈະກໍາ:

ກອງທຶນພັດທະນາບ້ານ ຫຼາຍກວ່າ 220 ກິດຈະກຳ

ຍົກລະດັບຂີດຄວາມສາມາດໃນຫຼາກຫຼາຍຫົວຂໍ້ສຳລັບພະນັກງານລັດຖະກອນ ແລະ ຜູ້ມີສ່ວນຮ່ວມຂອງແຜນງານຢູ່ຂັ້ນສູນກາງ ແລະ ທ້ອງຖິ່ນຈຳນວນ 395 ຄັ້ງ

ໂຄງການພື້ນຖານໂຄງລ່າງຈຳນວນ 140 ໂຄງການໄດ້ມີຄວາມຄືບໜ້າ

ລິເລີ່ມໂຄງການສົ່ງເສີມໂພຊະນາການ, ການສຶກສາ ແລະ ການຫຼຸດຜ່ອນຄວາມສ່ຽງໄພພິບັດ

ຍົກສູງຄຸນນະພາບ ແລະ ການເຂົ້າເຖິງບໍລິການດ້ານການເງິນໃນລະບົບ ຢູ່ເຂດຫ່າງໄກສອກຫຼີກ

ເຊື່ອມສານເອົາວຽກງານ ຄວາມສະເໝີພາບຍິງ-ຊາຍ, ຄົນພິການ, ສັງຄົມ, ແລະ ກຸ່ມຄົນທີ່ມີຄວາມບອບບາງສູງ ເພື່ອຮັບປະກັນການມີສ່ວນຮ່ວມ ແລະ ໄດ້ຮັບຜົນປະໂຫຍດຢ່າງເທົ່າທຽມກັນ.

ທ່ານ Thomas Lammar, ອຸປະທຸດ ແຫ່ງ ລາຊະອານະຈັກ ລຸກຊຳບວກ ປະຈຳ ສປປ ລາວ ໄດ້ກ່າວວ່າ: “ແຜນງານນີ້ໄດ້ຖືກອອກແບບເພື່ອສົ່ງເສີມການພັດທະນາທ້ອງຖິ່ນໃນລະດັບບ້ານ ຊຶ່ງເປັນພາກສ່ວນຈັດຕັ້ງປະຕິບັດຕົວຈິງ ເພື່ອຮັບປະກັນເປົ້າໝາຍຜູ້ມີສ່ວນຮ່ວມໃນແຜນງານ ໄດ້ຜົນປະໂຫຍດໂດຍກົງ ແລະ ແທ້ຈິງ. ຂ້າພະເຈົ້າເຊື່ອໝັ້ນ ວ່າ ແຜນງານ ພັດທະນາທ້ອງຖິ່ນ ສາມາດປະກອບສ່ວນໃນຄວາມພະຍາຍາມຂອງ ລັດຖະບານ ສປປ ລາວ ໃນການຫຼຸດຜ່ອນຄວາມທຸກຍາກ ໂດຍຮັບປະກັນວ່າຊັບພະຍາກອນຂອງແຜນງານ ແລະ ໂອກາດຈະສາມາດໄປຮອດໄປເຖິງຜູ້ທີ່ມີຄວາມຕ້ອງການຫຼາຍທີ່ສຸດ.”

ພ້ອມນີ້, ກອງປະຊຸມໄດ້ ຮັບຮອງແຜນວຽກ ແລະ ງົບປະມານສຳລັບ ປີ 2026 ໂດຍຈະສຸມໃສ່ການເລັ່ງຈັດຕັ້ງປະຕິບັດກິດຈະກຳທີ່ກຳນົດໄວ, ລວມທັງແກ້ໄຂຂໍ້ຄົງຄ້າງ ດ້ວຍການເປັນເອກະພາບກັນກ່ຽວກັບມາດຕະການໃນການຈັດຕັ້ງປະຕິບັດ, ການປັບປຸງກົນໄກການໃນການປະສານງານ, ການຕິດຕາມ ແລະ ການປະເມີນຜົນ ແລະ ອື່ນໆ. ພາກສ່ວນກ່ຽວຂ້ອງ ແລະ ຄູ່ຮ່ວມພັດທະນາ ໄດ້ຢັ້ງຢືນທີ່ຈະສືບຕໍ່ສະໜັບສະໜູນການພັດທະນາທ້ອງຖິ່ນ ເພື່ອບໍ່ປະປ່ອຍໃຜໄວ້ຂ້າງຫຼັງ.