ສະຫວັນນະເຂດ ແລະ ນະຄອນໂຮ່ຈີມິນ ເປີດນຳໃຊ້ໂຄງການບູລະນະອະນຸສອນສະຖານປະທານ ໂຮ່ຈີມິນ ຮັດແໜ້ນສາຍພົວພັນມິດຕະພາບ ລາວ-ຫວຽດນາມ

ໃນວັນທີ 2 ເມສາ 2026 ຢູ່ທີ່ອະນຸສອນສະຖານປະທານ ໂຮ່ຈີມິນ ແຂວງສະຫວັນນະເຂດ ໄດ້ມີພິທີເປີດນຳໃຊ້ ແລະ ມອບ-ຮັບໂຄງການຟື້ນຟູ ພ້ອມທັງປັບປຸງສະຖານທີ່ປະຫວັດສາດປະທານ ໂຮ່ຈີມິນ ຢ່າງເປັນທາງການ. ໃຫ້ກຽດເຂົ້າຮ່ວມໃນພິທີອັນມີຄວາມໝາຍສຳຄັນນີ້ມີ ທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາພັກແຂວງສະຫວັນນະເຂດ ພ້ອມດ້ວຍ ທ່ານ ນາງ ດາວວອນ ໄຊສຸລຽນ ຮອງເລຂາພັກແຂວງ, ປະທານຄະນະກຳມະການປົກຄອງແຂວງ, ມີບັນດາກຳມະການປະຈຳພັກແຂວງ ແລະ ກຳມະການພັກແຂວງເຂົ້າຮ່ວມຢ່າງພ້ອມພຽງ. ທາງຝ່າຍຄະນະຜູ້ແທນຈາກ ສສ ຫວຽດນາມ ນຳໂດຍ ທ່ານ ຫງວຽນ ລອກ ຮ່າ ກຳມະການປະຈຳພັກນະຄອນ, ຮອງປະທານຄະນະກຳມະການປະຊາຊົນ ນະຄອນໂຮ່ຈີມິນ ພ້ອມດ້ວຍຄະນະນຳຈາກພະແນກວັດທະນະທຳ ແລະ ກິລາ ນະຄອນໂຮ່ຈີມິນ ແລະ ພາກສ່ວນກ່ຽວຂ້ອງ. ນອກຈາກນີ້ ຍັງມີກົງສູນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ແລະ ຄະນະນຳຈາກຂະແໜງການຕ່າງໆເຂົ້າຮ່ວມເປັນສັກຂີພິຍານຢ່າງສົມກຽດ.

ໃນພິທີອັນສະຫງ່າລາສີນີ້, ທ່ານ ແລມ ທຽວ ກີ່ ຜູ້ອຳນວຍການອະນຸລັກຮັກສາວັດຖຸບູຮານປະຫວັດສາດ ພະແນກວັດທະນະທຳນະຄອນໂຮ່ຈີມິນ ໄດ້ຂຶ້ນລາຍງານຜົນສຳເລັດຂອງການປະຕິບັດໂຄງການ ໂດຍໄດ້ເນັ້ນໜັກວ່າ ໂຄງການປະຕິສັງຂອນ ແລະ ອະນຸລັກຮັກສາສະຖານທີ່ປະຫວັດສາດຂອງປະທານ ໂຮ່ຈີມິນ ແຫ່ງນີ້ ແມ່ນໜຶ່ງໃນໂຄງການທີ່ມີຄວາມໝາຍຍຸດທະສາດສຳຄັນ ເຊິ່ງປຽບເໝືອນສາຍໃຍເຊື່ອມຕໍ່ຄວາມສາມັກຄີພິເສດ ແລະ ມິດຕະພາບອັນສະໜິດແໜ້ນລະຫວ່າງ ນະຄອນໂຮ່ຈີມິນ ແລະ ແຂວງສະຫວັນນະເຂດ ໃຫ້ມີຄວາມແໜ້ນແຟ້ນຍິ່ງໆຂຶ້ນ. ໂຄງການດັ່ງກ່າວແມ່ນໄດ້ນຳໃຊ້ເງິນທຶນຊ່ວຍເຫຼືອລ້າຈາກນະຄອນໂຮ່ຈີມິນ ມອບໃຫ້ແກ່ແຂວງສະຫວັນນະເຂດ ໂດຍມີພະແນກວັດທະນະທຳ ແລະ ກິລານະຄອນໂຮ່ຈີມິນ ເປັນໜ່ວຍງານຫຼັກໃນການຈັດຕັ້ງປະຕິບັດ.

ສຳລັບລາຍລະອຽດຂອງການກໍ່ສ້າງ ແລະ ບູລະນະໃນຄັ້ງນີ້ ແມ່ນໄດ້ຮັບການອະນຸມັດຈາກຄະນະກຳມະການປະຊາຊົນນະຄອນໂຮ່ຈີມິນ ນັບຕັ້ງແຕ່ວັນທີ 29 ສິງຫາ 2023 ດ້ວຍມູນຄ່າການລົງທຶນທັງໝົດ 66 ຕື້ດົ້ງ. ຂະໜາດຂອງໂຄງການປະກອບມີຫຼາຍລາຍການທີ່ສຳຄັນ ເປັນຕົ້ນແມ່ນການປັບປຸງ ແລະ ຍົກລະດັບແຜ່ນອະນຸສອນສະຖານ ພ້ອມທັງພື້ນຖານຮູບປັ້ນທີ່ມີຄວາມສູງ 4 ແມັດ ແລະ ການເສີມຂະຫຍາຍຮູບແຕ້ມຂອງປະທານ ໂຮ່ຈີມິນ ໃຫ້ມີຄວາມສະຫງ່າງາມ. ນອກຈາກນັ້ນ ຍັງໄດ້ມີການສ້າງຮູບປັ້ນດອກບົວສອງດ້ານໃໝ່ຈຳນວນສາມຮູບ ທີ່ມີຄວາມກວ້າງເຖິງ 14 ແມັດ ແລະ ສູງ 7 ແມັດ ໂດຍນຳໃຊ້ຫີນສີຂາວທີ່ມີຄຸນນະພາບດີເລີດຈາກແຂວງເຫງະອານ ປະເທດຫວຽດນາມ ເຊິ່ງເປັນບ້ານເກີດຂອງປະທານ ໂຮ່ຈີມິນ ມາເປັນວັດສະດຸຫຼັກ.

ໃນສ່ວນຂອງອາຄານສະຖານທີ່ ໄດ້ມີການກໍ່ສ້າງຫໍວາງສະແດງແຫ່ງໃໝ່ທີ່ທັນສະໄໝ, ອາຄານບໍລິຫານ ແລະ ຫ້ອງບໍລິການຕ່າງໆ ເພື່ອອຳນວຍຄວາມສະດວກໃຫ້ແກ່ຜູ້ເຂົ້າຊົມ. ພ້ອມກັນນັ້ນ ກໍໄດ້ສ້ອມແປງ ແລະ ເສີມຮົ້ວປ້ອງກັນໃຫ້ມີຄວາມສູງ 12 ແມັດ, ມີການປູທາງຢ່າງດ້ວຍຫີນທຳມະຊາດພາຍໃນເດີ່ນ ແລະ ເສັ້ນທາງພາຍໃນອະນຸສອນສະຖານທັງໝົດ. ທາງດ້ານພູມສັນຖານແມ່ນໄດ້ຮັບການເອົາໃຈໃສ່ເປັນພິເສດ ໂດຍມີການປູກຕົ້ນຈຳປາເຊິ່ງເປັນດອກໄມ້ປະຈຳຊາດລາວ ແລະ ຕົ້ນໄມ້ມົງຄຸນຕ່າງໆ ພ້ອມທັງການຕິດຕັ້ງລະບົບໄຟສ່ອງສະຫວ່າງສິລະປະ, ລະບົບຊົນລະປະທານອັດຕະໂນມັດ ແລະ ການນຳໃຊ້ພະລັງງານແສງຕາເວັນ ເພື່ອເຮັດໃຫ້ສະຖານທີ່ແຫ່ງນີ້ມີຄວາມສວຍງາມ ແລະ ຍືນຍົງ.

ການກໍ່ສ້າງໄດ້ເລີ່ມຂຶ້ນຢ່າງເປັນທາງການໃນວັນທີ 21 ກໍລະກົດ 2025 ພາຍໃຕ້ການຊີ້ນຳຢ່າງໃກ້ຊິດຈາກການນຳທັງສອງຝ່າຍ. ດ້ວຍຄວາມພະຍາຍາມ ແລະ ຄວາມຮັບຜິດຊອບສູງຂອງຄະນະຄຸ້ມຄອງໂຄງການ ບວກກັບການຮ່ວມມືຢ່າງກະຕືລືລົ້ນຈາກບັນດາຂະແໜງການໃນແຂວງສະຫວັນນະເຂດ ເຮັດໃຫ້ວຽກງານທັງໝົດສຳເລັດລົງຢ່າງຈົບງາມຕາມມາດຕະຖານເຕັກນິກ ແລະ ໄດ້ຮັບການຢັ້ງຢືນການນຳໃຊ້ຢ່າງເປັນທາງການໃນທ້າຍປີ 2025 ທີ່ຜ່ານມາ.

ໃນໂອກາດອັນສະຫງ່າລາສີນີິ້, ທ່ານ ຫງວຽນ ລອກ ຮ່າ ຮອງປະທານຄະນະກຳມະການປະຊາຊົນນະຄອນໂຮ່ຈີມິນ ແລະ ທ່ານ ທອງໃສ ໄຊຍະວົງຄຳດີ ກຳມະການປະຈຳພັກແຂວງ, ຮອງປະທານຄະນະກຳມະການປົກຄອງແຂວງສະຫວັນນະເຂດ ກໍໄດ້ຜັດປ່ຽນກັນມີຄຳເຫັນ ໂດຍໄດ້ສະແດງຄວາມຂອບໃຈຢ່າງຈິງໃຈຕໍ່ສາຍພົວພັນອັນສະໜິດແໜ້ນລະຫວ່າງສອງທ້ອງຖິ່ນ. ທ່ານຮອງປະທານຄະນະກຳມະການປົກຄອງແຂວງສະຫວັນນະເຂດ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະກຳມະການຮັບຜິດຊອບທັງສອງຝ່າຍ ບໍ່ວ່າຈະເປັນພະແນກວັດທະນະທຳ ແລະ ກິລານະຄອນໂຮ່ຈີມິນ, ພະແນກວັດທະນະທຳ ແລະ ການທ່ອງທ່ຽວແຂວງສະຫວັນນະເຂດ ລວມເຖິງບໍລິສັດຜູ້ຮັບເໝົາກໍ່ສ້າງ ທີ່ໄດ້ທຸ່ມເທແຮງກາຍແຮງໃຈຈົນໂຄງການນີ້ສຳເລັດຕາມຈຸດປະສົງລະດັບຄາດໝາຍ.

ໃນຕອນທ້າຍຂອງພິທີ ໄດ້ມີການມອບ-ຮັບໃບຢັ້ງຢືນຜົນສຳເລັດຂອງໂຄງການ ລະຫວ່າງ ຕາງໜ້າຄະນະການນຳທັງສອງຝ່າຍ ເພື່ອເປັນຫຼັກຖານແຫ່ງການຮ່ວມມື. ຈາກນັ້ນ ທ່ານ ບຸນໂຈມ ອຸບົນປະເສີດ ແລະ ທ່ານ ຫງວຽນ ລອກ ຮ່າ ພ້ອມດ້ວຍຄະນະນຳທັງໝົດ ໄດ້ຮ່ວມກັນຕັດແຖບຜ້າເປີດນຳໃຊ້ໂຄງການຢ່າງເປັນທາງການ ພ້ອມທັງຢ້ຽມຊົມສະຖານທີ່ ແລະ ຫໍວາງສະແດງ ດ້ວຍບັນຍາກາດທີ່ເຕັມໄປດ້ວຍຄວາມພາກພູມໃຈ ແລະ ໄມຕີຈິດມິດຕະພາບອັນດູດດື່ມ ເຊິ່ງເປັນການຢືນຢັນອີກຄັ້ງວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ ຈະໄດ້ຮັບການປົກປັກຮັກສາ ແລະ ເສີມຂະຫຍາຍໃຫ້ແຕກດອກອອກຜົນຍິ່ງໆຂຶ້ນໃນອະນາຄົດ.

ທີ່ມາ: ສະຫວັນນາຂ່າວ

แชร์