ADB ຄາດຄະເນເສດຖະກິດລາວ ຈະຫຼຸດລົງຈາກ 4.4% ໃນປີ 2025 ມາທີ່ 4.0% ໃນປີ 2026 ທ່າມກາງສິ່ງທ້າທາຍຈາກພາຍນອກ

ໃນວັນທີ 10 ເມສາ ນີ້ ຫ້ອງການທະນາຄານພັດທະນາອາຊີ (ADB) ປະຈໍາລາວ ໄດ້ຈັດກອງປະຊຸມການພັດທະນາຂອງອາຊີ ຄາດຄະເນເດືອນເມສາ 2026 ຄວາມຂັດແຍ້ງໃນຕາເວັນອອກກາງ ທ້າທາຍຄວາມທົດທານໃນພາກພື້ນອາຊີ ແລະ ປາຊີຟິກ ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານນາງ ກາວີຕ້າ ໄອເຢັນກ້າ ຊ່ຽວຊານດ້ານເສດຖະກິດອາວຸໂສຂອງຫ້ອງການ ADB ປະຈໍາ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ຕາມບົດ​ລາຍ​ງານການຄາດຄະເນການພັດທະນາຂອງອາຊີວ່າ ການເຕີບໂຕທາງດ້ານເສດຖະກິດຂອງສາທາລະນະລັດ  ປະຊາທິປະໄຕ ປະຊາຊົນລາວ (ສປປ ລາວ) ຄາດວ່າຈະຫຼຸດລົງຈາກ 4.4% ໃນປີ 2025 ມາທີ່ 4.0% ໃນປີ 2026 ແລະຈະກັບມາເພີ່ມຂຶ້ນຢູ່ທີ່ອັດຕາ 4.5% ໃນປີ 2027, ອີງຕາມບົດລາຍງານການຄາດຄະເນການພັດທະນາຂອງອາຊີ (ADO) ສະບັບເດືອນເມສາ 2026 ທີ່ອອກເຜີຍແຜ່ໃນມື້ນີ້ ໂດຍທະນາຄານພັດທະນາອາຊີ (ADB) ຄາດວ່າ ການເຕີບໂຕຈະໄດ້ຮັບແຮງພັກດັນຈາກຂະແໜງບໍລິການ, ການຜະລິດໄຟຟ້າ, ການກໍ່ສ້າງ ແລະ ການເຊື່ອມໂຍງໃນພາກພື້ນ ທ່າມກາງສະພາບຄວາມສ່ຽງຈາກພາຍນອກທີ່ເພີ່ມສູງຂຶ້ນ.

ບົດ​ລາຍ​ງານການຄາດຄະເນການພັດທະນາຂອງອາຊີ ໄດ້ສະທ້ອນໃຫ້​ເຫັນ​ເຖິງ​ສະຖຽນ​ລະ​ພາບເສດຖະກິດຢ່າງຕໍ່ເນື່ອງ​ຂອງ​ປະ​ເທດ ພາຍຫຼັງມີການ​ຮັດກຸມເສດຖະກິດ​ມະຫາ​ພາກ, ການປັບຄວາມ​ດຸ່ນດ່ຽງ​ດ້ານ​ການເງິນ ​ແລະ ການຄ້າຕ່າງປະ​ເທດ ​ແລະພ້ອມທັງການຟື້ນໂຕຂອງຂະແໜງທ່ອງທ່ຽວ ​ແລະ ການສົ່ງອອກກະແສໄຟຟ້າ. ເຖິງຢ່າງໃດກໍ່ຕາມ, ຄວາມອ່ອນໄຫວຕໍ່ພາຍນອກ, ການຊຳລະໜີ້ສິນສາທາລະນະທີ່ສູງ ແລະ ຂໍ້ຈຳກັດທາງດ້ານໂຄງສ້າງເສດຖະກິດ ຍັງຄົງເປັນອຸປະສັກຕໍ່ທິດທາງການເຕີບໂຕໃນໄລຍະກາງ.

ທ່ານນາງ ແຊນນີ ແຄັມເບວ, ຫົວໜ້າຫ້ອງ ADB ປະຈໍາ ສປປ ລາວ ໄດ້ໃຫ້ຮູ້ວ່າ “ສປປ ລາວ ໄດ້ມີຄວາມຄືບໜ້າທີ່ສຳຄັນໃນການຟື້ນຟູສະຖຽນລະພາບທາງດ້ານເສດຖະກິດມະຫາພາກ ດ້ວຍການຫຼຸດອັດຕາເງິນເຟີ້ລົງ ເພີ່ມການສົ່ງອອກ ແລະ ເພີ່ມຄັງສຳຮອງເງິນຕາຕ່າງປະເທດ”. ທ່ານໄດ້ໃຫ້ຮູ້ຕື່ມອີກວ່າ "ດ້ວຍຄວາມສ່ຽງຂອງໂລກທີ່ສູງຂຶ້ນ ການຫັນເອົາຄວາມຄືບໜ້ານີ້ໄປສູ່ຜົນປະໂຫຍດທີ່ຍືນຍົງໃຫ້ແກ່ປະຊາຊົນລາວ ຈໍາເປັນຕ້ອງມີການຮັກສາວິໄນທາງການເງິນຢ່າງຕໍ່ເນື່ອງ, ເລັ່ງການປະຕິຮູບລັດວິສາຫະກິດ, ໂດຍສະເພາະແມ່ນຂະແໜງພະລັງງານ ແລະ ເພີ່ມການລົງທຶນເຂົ້າໃສ່ຂະແໜງການທີ່ມີປະສິດຕິພາບ ແລະ ທົນທານຕໍ່ສະພາບການປ່ຽນແປງດິນຟ້າອາກາດ."

ຫຼັງອັດຕາເງິນເຟີ້ຫຼຸດລົງມາຢູ່ 7.7% ​ໃນ​ປີ 2025 ຈາກຜົນ​ການ​ດຳເນີນດ້ານນະໂຍບາຍ​ການເງິນ ​ແລະ ​ເງິນຕາທີ່ເຂັ້ມງວດ ອັດຕາ​ເງິນ​ເຟີ້ໃນ​ປີ 2026​ ຄາດ​ວ່າ​ຈະ​ປັບໂຕສູງຂຶ້ນໜ້ອຍໜຶ່ງ ທີ່ອັດຕາ 9.8% ​ເຊິ່ງສະທ້ອນ​ເຖິງ​ລາຄາ​ນ້ຳມັນ​​ໂລກ​ທີ່​ສູງ​ຂຶ້ນ, ຕົ້ນທຶນການ​ຂົນ​ສົ່ງ ​ແລະ ຜົນກະທົບທີ່ອາດສົ່ງຕໍ່ໄປຍັງລາຄາ​ອາຫານ ​ແລະ ສິນຄ້ານໍາເຂົ້າ​ອື່ນໆ. ແຮງກົດດັນຕໍ່ລາຄາທີ່ເພີ່ມຂຶ້ນຍັງເປັນຜົນມາຈາກການປັບປຸງອັດຕາຄ່າໄຟຟ້າ ແລະ ເງິນເດືອນຂອງລັດຖະກອນ.

ໃນ​ປີ 2026 ຄາດວ່າການ​ຜະລິດ​ກະແສໄຟຟ້າ ກິດຈະກຳ​ທີ່​ກ່ຽວຂ້ອງ​ກັບ​ການ​ພັດທະນາ​ພື້ນຖານ​ໂຄງ​ລ່າງ ​ແລະ ການ​ບໍລິການ ​ຈະເປັນໂຕຊຸກຍູ້ທີ່ສໍາຄັນໃຫ້ແກ່​ການ​ເຕີບ​ໂຕ. ຂະແໜງອຸດສາຫະກໍາຄາດວ່າຈະຂະຫຍາຍໂຕ ໂດຍໄດ້ຮັບແຮງສະໜັບສະໜູນຈາກການລົງທຶນຢ່າງຕໍ່ເນື່ອງຂອງໄຟຟ້າພະລັງງານນໍ້າ ພະລັງງານໜູນວຽນ ແລະ ການຂຸດຄົ້ນແຮ່ທາດ ໂດຍຄາດຄະເນອັດຕາການເຕີບໂຕຂອງຂະແໜງອຸດສາຫະກໍາຢູ່ທີ່ 4.6% ໃນປີ 2026. ໂຄງການພະລັງງານໄຟຟ້າຫຼາຍກວ່າ 11 ໂຄງການພວມຢູ່ໃນລະຫວ່າງການພັດທະນາ, ຊຶ່ງຈະສົ່ງຜົນດີຕໍ່ຂະແໜງການກໍ່ສ້າງ ແລະ ການສ້າງວຽກເຮັດງານທຳໃນໄລຍະກາງ. ຂະແໜງບໍລິການຈະໄດ້ຮັບແຮງສະໜັບສະໜູນຈາກການທ່ອງທ່ຽວ ການຂົນສົ່ງ ແລະ ໂລຈິດສະຕິກ ເຊິ່ງໄດ້ຮັບຜົນປະໂຫຍດຈາກການເຊື່ອມໂຍງໃນພາກພື້ນທີ່ເພີ້ມຂຶ້ນ, ໂດຍສະເພາະຜ່ານເສັ້ນທາງລົດໄຟເຊື່ອມຕໍ່ລະຫວ່າງ ສປປ ລາວ ແລະ ສາທາລະນະລັດປະຊາຊົນຈີນ. ຢ່າງໃດກໍ່ຕາມ, ຈໍານວນນັກທ່ອງທ່ຽວຕ່າງປະເທດໃນປັດຈຸບັນເກືອບຢູ່ໃນລະດັບກ່ອນການລະບາດພະຍາດໂຄວິດ-19 ແລະ ຄາດວ່າຈະບັນລຸ.

ເຖິງແມ່ນວ່າໄດ້ມີຄວາມພະຍາຍາມ ສືບຕໍ່ສ້າງສະຖຽນລະພາບທາງດ້ານເສດຖະກິດມະຫາພາກຢ່າງຕໍ່ເນື່ອງ ແຕ່ຄວາມສ່ຽງໃນທາງລົບຕໍ່ການຄາດຄະເນກໍ່ຍັງມີຢູ່. ຄວາມບໍ່ແນ່ນອນໃນທົ່ວໂລກ ເລີ່ມສົ່ງຜົນກະທົບຕໍ່ການຄ້າ ການທ່ອງທ່ຽວ ແລະ ການລົງທຶນ, ໃນຂະນະທີ່ໜີ້ສິນສາທາລະນະ ແລະ ການຄ້ຳປະກັນຍັງຢູ່ໃນລະດັບທີ່ສູງ ຊຶ່ງກວມເອົາປະມານ 82% ຂອງ ຈີດີພີ, ຂໍ້ຈຳກັດດ້ານເງິນຕາຕ່າງປະເທດ ແລະ ຄວາມກົດດັນຕໍ່ຂະແໜງການທະນາຄານ ຍັງຈະສືບຕໍ່ສ້າງຂໍ້ຈຳກັດໃນການດຳເນີນນະໂຍບາຍມະຫາພາກ. ຄວາມສ່ຽງດ້ານການເງິນຍັງຈະເພີ່ມຂຶ້ນຕື່ມ ເນື່ອງຈາກໜີ້ສິນທີ່ອາດຈະເກີດຈາກບັນດາລັດວິສາຫະກິດ, ໂດຍສະເພາະໃນຂະແໜງພະລັງງານ, ເຊິ່ງອັດຕາຄ່າໄຟຟ້າຕໍ່າກ່ວາຕົ້ນທຶນ ແລະ ຄວາມສ່ຽງຈາກອັດຕາແລກປ່ຽນ ຈະຈຳກັດງົບປະມານລາຍຈ່າຍເຂົ້າໃນຂະແໜງສັງຄົມ ແລະ ການລົງທຶນຂອງລັດ.

ບົດ​ລາຍ​ງານ​ດັ່ງກ່າວຍັງໄດ້​ເນັ້ນໜັກໃຫ້ມີການ​ຮັກສາ​ນະໂຍບາຍເສດຖະກິດມະຫາພາກທີ່ລະມັດລະວັງ ​ແລະ ​ເລັ່ງກ​ານ ປະຕິ​ຮູບ ໂດຍ​ສະ​ເພາະ​ໃນ​ຂະ​ແໜງ​ພະລັງງານ ​ແມ່ນ​ມີຄວາມສຳຄັນ ເພື່ອຮັບປະກັນ​ສະຖຽນ​ລະ​ພາບ ​ແລະ ​ເພີ່ມທະວີ​ຄວາມເຊື່ອ​ໝັ້ນ​ໃຫ້ແກ່​ນັກ​ລົງທຶນ.

ADB ​ແມ່ນ​ທະນາຄານ​ພັດທະນາ​ຫຼາຍ​ຝ່າຍ​ທີ່ນໍາໜ້າ ​ສະໜັບສະໜູນ​ການ​ເຕີບ​ໂຕ​ແບບ​ຍືນ​ຍົງ, ​ທົ່ວເຖິງ ແລະພ້ອມຮັບກັບການປ່ຽນແປງ​ໃນ​ທົ່ວພາກພື້ນອາຊີ​ ແລະ ​ປາຊີ​ຟິກ. ການເຮັດວຽກຮ່ວມກັບປະເທດສະມາຊິກ ແລະ ຄູ່ຮ່ວມງານຂອງຕົນ ເພື່ອແກ້ໄຂສິ່ງທ້າທາຍ ທີ່ຫຍຸ້ງຍາກຮ່ວມກັນ, ADB ນຳໃຊ້ເຄື່ອງມືທາງການເງິນທີ່ມີນະວັດຕະກໍາ ແລະ ການຮ່ວມມືຍຸດທະສາດ ເພື່ອຫັນປ່ຽນຊີວິດການເປັນຢູ່, ສ້າງພື້ນຖານໂຄງລ່າງທີ່ມີຄຸນນະພາບ ແລະ ປົກປ້ອງໂລກຂອງພວກເຮົາ. ສ້າງຕັ້ງຂື້ນໃນປີ 1966, ADB ມີເຈົ້າຂອງຈາກ 69 ປະເທດສະມາຊິກ ໃນນັ້ນລວມມີ 50 ປະເທດທີ່ມາຈາກພາກພື້ນອາຊິ ແລະ ປາຊີຟິກ.

แชร์