ກອງປະຊຸມ ໄດ້ປະເມີນຜົນການຈັດຕັ້ງປະຕິບັດມະຕິກອງປະຊຸມຄະນະກຳມະການນະໂຍບາຍເງິນຕາ ຄັ້ງທີ I ປະຈຳປີ 2026, ໂດຍສະເພາະການຜັນຂະຫຍາຍມະຕິດັ່ງກ່າວ ເປັນຕົ້ນ ສະຫຼຸບການຈັດຕັ້ງປະຕິບັດບັນດາເຄື່ອງມືນະໂຍບາຍເງິນຕາ ແລະ ທິດທາງການຈັດຕັ້ງປະຕິບັດບັນດາເຄື່ອງມືນະໂຍບາຍເງິນຕາ ແລະ ອັດຕາແລກ ປ່ຽນ ໃນຕໍ່ໜ້າ; ພ້ອມນັ້ນ, ຍັງໄດ້ຮັບຟັງການລາຍງານສະພາບການສະໜອງນໍ້າມັນເຊື້ອໄຟ ແລະ ມາດຕະການຄຸ້ມຄອງລາຄານໍ້າມັນເຊື້ອໄຟ ໃນໄລຍະສົງຄາມຢູ່ຕາເວັນອອກກາງ; ສະພາບການສະໜອງເງິນຕາຕ່າງປະເທດໃຫ້ການນໍາເຂົ້ານໍ້າມັນເຊື້ອໄຟ ແລະ ມາດຕະການໃນຕໍ່ໜ້າ, ມາດຕະການທາງດ້ານນະໂຍບາຍການເງິນ ຕາມຄໍາສັ່ງເລກທີ 40/ນຍ ເປັນຕົ້ນ ນະໂຍບາຍພາສີ-ອາກອນ, ນະໂຍບາຍນໍາເຂົ້າລົດໄຟຟ້າ ແລະ ນະໂຍບາຍອື່ນໆ ເພື່ອຮອງຮັບຜົນກະທົບຈາກສົງຄາມຢູ່ຕາເວັນອອກກາງ ແລະ ຄວາມຄືບໜ້າໃນການຊໍາລະໜີ້ທີ່ເປັນເງິນຕາຕ່າງປະເທດຂອງພາກລັດ.

 

ຜ່ານການສັງເກດຕີລາຄາ ຂອງຄະນະກຳມະການນະໂຍບາຍເງິນຕາ ເຫັນວ່າ: ໃນໄລຍະຕົ້ນປີ 2026 ສະພາບເສດຖະກິດຂອງ ສປປ ລາວ ຍັງສືບຕໍ່ປະເຊີນໜ້າກັບຄວາມສ່ຽງຫຼາຍດ້ານ ເປັນຕົ້ນແມ່ນຄວາມບໍ່ແນ່ນອນ ແລະ ຄວາມບໍ່ສະຫງົບຢູ່ຕາເວັນອອກາງ ທີ່ສົ່ງຜົນກະທົບຕໍ່ລາຄາສິນຄ້າພາຍໃນ ໂດຍສະເພາະລາຄານໍ້າມັນເຊື້ອໄຟ ພາຍໃນ ສປປ ລາວ ທີ່ມີບາງໄລຍະປັບຂຶ້ນແບບກ້າວກະໂດດ ຕາມລາຄາຂອງນໍ້າມັນຢູ່ສາກົນ ຊຶ່ງເປັນປັດໄຈໜຶ່ງທີ່ເຮັດໃຫ້ອັດຕາເງິນເຟີ້ ເພີ່ມຂຶ້ນມາຢູ່ໃນລະດັບ 2 ຕົວເລກໃນເດືອນເມສາ 2026. ພ້ອມນີ້, ໃນສັງຄົມ ຍັງມີການນໍາໃຊ້ເງິນຕາຫຼາຍສະກຸນ ເພື່ອຊໍາລະພາຍໃນປະເທດ ເຮັດໃຫ້ການດໍາເນີນນະໂຍບາຍເງິນຕາ ມີຂໍ້ຈໍາກັດ, ການຄຸ້ມຄອງເງິນຕາຕ່າງປະເທດ ຍັງພົບຄວາມຫຍຸ້ງຍາກ ແລະ ຊັກຊ້າ ຍ້ອນກິດຈະກໍາທາງເສດຖະກິດນອກລະບົບ ຍັງມີຫຼາຍ ບວກກັບພັນທະໜີ້ສິນຕໍ່ຕ່າງປະເທດຍັງມີສູງ, ການສະໜອງສິນເຊື່ອຂອງລະບົບທະນາຄານ ຍັງບໍ່ທັນໃຫ້ເຫັນເຖິງຄວາມເຂັ້ມແຂງຂອງການຜະລິດພາຍໃນປະເທດ. ສະນັ້ນ, ເພື່ອສືບຕໍ່ຮັກສາສະຖຽນລະພາບທາງດ້ານເງິນຕາແຫ່ງຊາດ ໃຫ້ໝັ້ນທ່ຽງ ແລະ ປະກອບສ່ວນຊຸກຍູ້ການຂະຫຍາຍຕົວ ຂອງເສດຖະກິດ, ຄະນະກຳມະການນະໂຍບາຍເງິນຕາ ຈຶ່ງເຫັນດີຮັບຮອງເອົາທິດທາງ ແລະ ມາດຕະການໃນການດໍາເນີນນະໂຍບາຍເງິນຕາໃນຕໍ່ໜ້າ ດັ່ງນີ້:

 

1. ສືບຕໍ່ຮັກສາອັດຕາດອກເບ້ຍພື້ນຖານຂອງ ທຫລ ໄລຍະ 7 ວັນ ໄວ້ໃນລະດັບເດີມ ຄື: 8% ຕໍ່ປີ;

2. ສືບຕໍ່ປະຕິບັດນະໂຍບາຍເງິນຕາແບບປະສົມປະສານ ໂດຍສະເພາະສືບຕໍ່ຄຸ້ມຄອງເງິນຕາຕ່າງປະເທດ ໃຫ້ເປັນລະບົບຄົບຊຸດ ແລະ ຮັບປະກັນໄດ້ການຄຸ້ມຄອງກະແສເງິນໄຫຼ ເຂົ້າ-ອອກ ຈາກການຄ້າ ແລະ ການລົງທຶນ; ສືບຕໍ່ປະຕິບັດການລວມສູນບັນຊີເງິນຝາກຂອງລັດຖະບານ (TSA), ສືບຕໍ່ນໍາໃຊ້ເຄື່ອງມືນະໂຍບາຍເງິນຕາ ກໍຄື ການອອກພັນທະບັດ ທຫລ ຕາມກົນໄກຕະຫຼາດ ທີ່ມີການຄຸ້ມຄອງຂອງລັດ ແລະ ຄຸ້ມຄອງອັດຕາແລກປ່ຽນ ເພື່ອປ້ອງກັນບໍ່ໃຫ້ເງິນເຟີ້ຂະຫຍາຍຕົວແຮງ;

3. ທຫລ ຈະສົມທົບກັບ ກະຊວງການເງິນ ແລະ ກະຊວງອຸດສາຫະກຳ ແລະ ການຄ້າ ເພື່ອທົບທວນສະພາບການສະໜອງສິນເຊື່ອ, ຄົ້ນຄວ້າດັດປັບນະໂຍບາຍທີ່ຈຳເປັນ ເພື່ອຊຸກຍູ້ການສະໜອງສິນເຊື່ອ ໃຫ້ໜັກແໜ້ນກວ່າເກົ່າ ໂດຍສະເພາະແມ່ນສິນເຊື່ອ ເພື່ອການຜະລິດລະດູຝົນ, ການຜະລິດ ເພື່ອທົດແທນການນໍາເຂົ້າ ແລະ ການສົ່ງອອກ ແນ່ໃສ່ຊຸກຍູ້ການຂະຫຍາຍຕົວ ຂອງເສດຖະກິດຕື່ມອີກ.

 

ກອງປະຊຸມດັ່ງກ່າວ ໄດ້ດໍາເນີນເປັນເວລາເຄິ່ງວັນ, ຄະນະກຳມະການ ແລະ ພາກສ່ວນກ່ຽວຂ້ອງ ໄດ້ປຶກສາຫາລືແລກປ່ຽນຄວາມຄິດເຫັນຊຶ່ງກັນ ແລະ ກັນຢ່າງກົງໄປກົງມາ ເຮັດໃຫ້ກອງປະຊຸມມີຜົນສໍາເລັດຕາມລະດັບຄາດໝາຍເປັນຢ່າງດີ.

ຂ່າວ: ທຫລ