ໃນການລົງກວດກາຄັ້ງນີ້, ທາງຄະນໍາເມືອງພ້ອມຄະນະໄດ້ຮັບຟັງການຜ່ານບົດລາຍງານຫຍໍ້ ກ່ຽວກັບການຈັດຕັ້ງປະຕິບັດບັນດາໂຄງການພັດທະນາພື້ນຖານໂຄງລ່າງໃນໄລຍະຜ່ານມາ ເຊິ່ງໄດ້ຮັບທຶນອຸປະຖຳຊ່ວຍເຫຼືອຈາກ ບໍລິສັດ ລາວໂຈງຫວງບໍ່ແຮ່ ຈຳກັດ ແລະ ການມີສ່ວນຮ່ວມຂອງປະຊາຊົນ ເຊິ່ງລວມມີ 3 ບ້ານຄື: ບ້ານແດນກາງໄດ້ດຳເນີນການປັບປຸງເສັ້ນທາງຊອຍພາຍໃນບ້ານ ຈຳນວນ 2 ເສັ້ນ, ລວມມູນຄ່າການກໍ່ສ້າງທັງໝົດ 13,770,000 ກີບ; ບ້ານຫ້ວຍໝໍ້ ໄດ້ດໍາເນີນການກໍ່ສ້າງຫ້ອງນ້ຳ ຈຳນວນ 2 ຫ້ອງ (ຂະໜາດ ຍາວ 3 ແມັດ, ກວ້າງ 2 ແມັດ, ສູງ 2,5 ແມັດ)ພ້ອມທັງຕິດຕັ້ງລະບົບໄຟຟ້າເຂົ້າສະໂມສອນບ້ານ, ລວມມູນຄ່າ 52,800,000 ກີບ (ໃນນີ້ ມີມູນຄ່າອຸປະກອນ ແລະ ແຮງງານສົມທົບຈາກພາຍໃນບ້ານມູນຄ່າ 21,330,000 ກີບ; ບ້ານສີວີໄລ ໄດ້ດໍາເນີນການກໍ່ສ້າງອ່າງເກັບນ້ຳ ແລະ ປັບປຸງທໍ່ນ້ຳລິນ (ຂະໜາດ ຍາວ 3 ແມັດ, ກວ້າງ 2.5 ແມັດ, ສູງ 2.2 ແມັດ) ພ້ອມທັງຕິດຕັ້ງທໍ່ຈຳນວນ 3 ໂຄ້ງ, ລວມມູນຄ່າ 47,695,000 ກີບ (ໃນນີ້ ມີຄ່າອຸປະກອນ ແລະ ແຮງງານສົມທົບຈາກບ້ານ ຈຳນວນ 11,175,000 ກີບ), ໂດຍໃຊ້ໄລຍະເວລາການກໍ່ສ້າງ ເດືອນກວ່າຈິ່ງສໍາເລັດ; ຈາກນັ້ນ ທາງທິມງານກໍໄດ້ຜັດປ່ຽນກັນປະກອບຄຳເຫັນ ແລະ ສະເໜີແລກປ່ຽນບາງບັນຫາ ຕໍ່ຄະນະນໍາເມືອງ ແລະ ພາກສ່ວນທີ່ກ່ຽວຂ້ອງ ເພື່ອເຮັດໃຫ້ການຈັດຕັ້ງປະຕິບັດງານໃນຕໍ່ໜ້າມີຄວາມສະດວກ ແລະ ສອດຄ່ອງ.

ໂອກາດນີ້, ທ່ານ ສຸລະສິດ ດວງມະໂນ ກໍ່ໄດ້ໃຫ້ກຽດມີຄຳເຫັນໂອ້ລົມ ກ່ອນອື່ນທ່ານ ໄດ້ສະແດງຄວາມຂອບໃຈຢ່າງສູງ ມາຍັງ ບໍລິສັດ ລາວໂຈງຫວງບໍ່ແຮ່ ຈຳກັດ ທີ່ໄດ້ມອບທຶນຊ່ວຍເຫຼືອເຂົ້າໃນການພັດທະນາພື້ນຖານໂຄງລ່າງໃນຄັ້ງນີ້, ພ້ອມທັງຍ້ອງຍໍຊົມເຊີຍມາຍັງອຳນາດການປົກຄອງບ້ານ ແລະ ປະຊາຊົນທຸກພາກສ່ວນທີ່ໄດ້ໃຫ້ການຮ່ວມມືໂດຍການສະຫຼະເຫື່ອແຮງ, ວັດຖຸອຸປະກອນສົມທົບເຂົ້າໃນການກໍ່ສ້າງຈົນສາມາດບັນລຸໄດ້ຕາມແຜນການທີ່ວາງໄວ້, ທ່ານຍັງໄດ້ເນັ້ນໜັກໃຫ້ອຳນາດການປົກຄອງບ້ານ ແລະປະຊາຊົນແຕ່ລະບ້ານຈົ່ງພ້ອມກັນປົກປັກຮັກສາ ແລະຊ້ອມແຊມບັນດາສິ່ງປຸກສ້າງເຫຼົ່ານີ້ ເພື່ອໃຫ້ສາມາດນຳໃຊ້ໄດ້ຢ່າງຍາວນານ ແລະເກີດປະໂຫຍດສູງສຸດແກ່ຊຸມຊົນຕະຫຼອດໄປ.

ຂ່າວ: ແດງ ແກ້ວອ່ອນຄໍ