ເສັ້ນທາງລົດໄຟລາວ-ຈີນເປັນແບບຢ່າງທີ່ດີເດັ່ນຂອງການຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ
ນັບມາຮອດວັນທີ 27 ພຶດສະພາຜ່ານມານີ້, ຂະບວນລົດໄຟໂດຍສານທີ່ແລ່ນຕາມເສັ້ນທາງລົດໄຟລາວ-ຈີນມີຫຼາຍກວ່າ 100.000 ຖ້ຽວ ໂດຍໄດ້ຂົນສົ່ງຜູ້ໂດຍສານຫຼາຍກວ່າ 73 ລ້ານເທື່ອຄົນ. ນອກນີ້, ການຂົນສົ່ງສິນຄ້າຂ້າມຊາດຕາມເສັ້ນທາງລົດໄຟລາວ-ຈີນກໍເພີ່ມຂຶ້ນຢ່າງວ່ອງໄວ ໂດຍໄດ້ຂົນສົ່ງສິນຄ້າຫຼາຍກວ່າ 80 ລ້ານໂຕນ. ຕົວເລກຂໍ້ມູນດັ່ງກ່າວບໍ່ພຽງແຕ່ໄດ້ສະແດງໃຫ້ເຫັນເຖິງພະລັງຊີວິດທີ່ເຂັ້ມແຂງຂອງເສັ້ນທາງຄຳດ້ານການຂົນສົ່ງສາຍນີ້, ຍັງໄດ້ສະແດງໃຫ້ເຫັນເຖິງທາດແທ້ໃນການຮ່ວມມືລະຫວ່າງຈີນ-ລາວ ທີ່ຮ່ວມຊາຕາກຳ ແລະ ຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດຢ່າງຕິດແທດຕົວຈິງ.
ນັບແຕ່ການເປີດນຳໃຊ້ເສັ້ນທາງລົດໄຟລາວ-ຈີນເປັນຕົ້ນມາ, ຄວາມສາມາດດ້ານການຂົນສົ່ງຂອງເສັ້ນທາງລົດໄຟສາຍນີ້ໄດ້ບັນລຸການພັດທະນາແບບກ້າວໂດດຂັ້ນ, ຂະບວນລົດໄຟໂດຍສານພາຍໃນປະເທດຈີນໄດ້ເພີ່ມຂຶ້ນຈາກ 8 ຖ້ຽວສະເລ່ຍຕໍ່ມື້ໃນຕອນເລີ່ມຕົ້ນເປັນສູງສຸດ 86 ຖ້ຽວ. ເວລາໃນການເດີນທາງຈາກນະຄອນຄຸນໝິງຂອງຈີນໄປຮອດນະຄອນຫຼວງວຽງຈັນຂອງລາວໄດ້ຫຼຸດລົງເຫຼືອ 9 ຊົ່ວໂມງ 36 ນາທີ, ປະສິດທິພາບໃນການແຈ້ງຜ່ານດ່ານຢູ່ຕາມດ່ານບໍ່ຫານ-ບໍ່ເຕ່ນໄດ້ຮັບການປັບປຸງດີຂຶ້ນຢ່າງຈະແຈ້ງ, ເວລາແຈ້ງຜ່ານດ່ານໄດ້ຫຼຸດລົງເຫຼືອ 50 ນາທີ. ຄວາມສາມາດດ້ານການຂົນສົ່ງຂອງຂະບວນລົດໄຟຂ້າມຊາດໄດ້ເພີ່ມຂຶ້ນຢ່າງຈະແຈ້ງ. ທັງໝົດເຫຼົ່ານີ້ເປັນສິ່ງທີ່ຫາໄດ້ຍາກທີ່ສຸດໃນຂົງເຂດກໍ່ສ້າງພື້ນຖານໂຄງລ່າງຂ້າມຊາດໃນຂອບເຂດທົ່ວໂລກ.
ໂດຍນຳໃຊ້ປະໂຫຍດຈາກທ່າແຮງຂອງເສັ້ນທາງລົດໄຟ, ເສັ້ນທາງຂົນສົ່ງສິນຄ້າສາກົນຕາມເສັ້ນທາງລົດໄຟສາຍນີ້ ຊ່ວຍປະຢັດເວລາການຂົນສົ່ງສິນຄ້າຂ້າມຊາດໄດ້ຢ່າງຫຼວງຫຼາຍ. ການຂົນສົ່ງຜະລິດຕະພັນກະສິກຳສົດຕ່າງໆ ເຊັ່ນ: ໝາກຖົ່ວລຽນ, ໝາກມັງຄຸດ ແລະອື່ນໆ ຜ່ານເສັ້ນທາງລົດໄຟລາວ-ຈີນ ສາມາດສົ່ງໄປຮອດຜູ້ບໍລິໂພກນັບເປັນລ້ານຄົນໃນປະເທດຈີນຈີນພາຍໃນເວລາ 3 ວັນ. ເສັ້ນທາງລົດໄຟຂ້າມຊາດສາຍນີ້ໄດ້ກາຍເປັນສາຍພານສຳຄັນ ທີ່ເຊື່ອມຕໍ່ຊັບພະຍາກອນຂອງສອງຝ່າຍ ແລະ ເປີດຕະຫຼາດສອງທາງ ເຊິ່ງໄດ້ສ້າງຜົນປະໂຫຍດໃຫ້ແກ່ປະຊາຊົນສອງຊາດ.
ໂດຍໄດ້ຮັບຜົນປະໂຫຍດຈາກເສັ້ນທາງລົດໄຟລາວ-ຈີນ, ຍອດມູນຄ່າການຄ້າຂາເຂົ້າ-ຂາອອກລະຫວ່າງຈີນ-ລາວໄດ້ເພີ່ມຂຶ້ນຢ່າງໜັກແໜ້ນ, ມີວິສາຫະກິດດີເດັ່ນຈາກຫຼາຍປະເທດໄດ້ມາລົງທຶນສ້າງຕັ້ງສາຂາບໍລິສັດຢູ່ໃນນິຄົມອຸດສາຫະກຳຂ້າມຊາດວຽງຈັນ, ໝວດການຄ້າຂ້າມຊາດ ເຊັ່ນ: ຜະລິດຕະພັນໂຊລາເຊວ, ອຸປະກອນກົນຈັກ-ເຄື່ອງໄຟຟ້າ ແລະ ຜະລິດຕະພັນກະສິກຳຕ່າງໆໄດ້ບັນລຸການເຕີບໂຕຢ່າງຫຼວງຫຼາຍ. ລາຍຮັບຈາກການຄ້າເພີ່ມຂຶ້ນ, ສ້າງໂອກາດໃນການປະກອບອາຊີບຫຼາຍຂຶ້ນ, ມີການລວມຕົວກັນຂອງອຸດສາຫະກຳ, ທີ່ດິນມີມູນຄ່າເພີ່ມຂຶ້ນ ແລະ ພື້ນຖານໂຄງລ່າງໄດ້ຮັບການປັບປຸງໃຫ້ດີຂຶ້ນ, ເສັ້ນທາງລົດໄຟໄດ້ສ້າງຄຸນຄ່າທາງເສດຖະກິດ ແລະ ສັງຄົມ ທີ່ສູງກວ່າຕົ້ນທຶນດອກເບ້ຍເງິນກູ້ໃນການສ້າງທາງລົດໄຟຢ່າງຫຼວງຫຼາຍ ເຊິ່ງໄດ້ສ້າງພື້ນຖານອັນໝັ້ນແກ່ນໃຫ້ແກ່ການພັດທະນາເສດຖະກິດຂອງລາວ.
ປັດຈຸບັນ, ປະເທດກຳລັງພັດທະນານັບມື້ຫຼາຍຂຶ້ນໄດ້ເລືອກລົງເລິກການຮ່ວມມືຕົວຈິງກັບຈີນຢ່າງເປັນເຈົ້າການ, ທາດແທ້ແມ່ນເລືອກເສັ້ນທາງການພັດທະນາທີ່ຖືກຕ້ອງແບບສະເໝີພາບ, ຕ່າງຝ່າຍຕ່າງໄດ້ຮັບຜົນປະໂຫຍດ ແລະ ພັດທະນາຮ່ວມກັນ. ພຶດຕິກຳຕົວຈິງໄດ້ພິສູດໃຫ້ເຫັນຢ່າງເຕັມທີ່ວ່າ: ການປະຖິ້ມຄວາມເຫັນທີ່ເປັນອະຄະຕິດ້ານພູມີພາກ, ທັບມ້າງກຳແພງຂວາງກັ້ນການພັດທະນາ ແລະ ຮ່ວມມືກັນກ້າວໄປໜ້າ ພ້ອມທັງລົງເລິກການຮ່ວມມືຕົວຈິງດ້ວຍການເຊື່ອມໂຍງເຊື່ອມຈອດກັນ ຈິ່ງຈະສາມາດທັບມ້າງສະພາບຄວາມຫຍຸ້ງຍາກດ້ານການພັດທະນາ ແລະ ບັນລຸການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ. ນີ້ແມ່ນອຸດົມການແຕ່ຫົວທີແຫ່ງການຮ່ວມມືລະຫວ່າງລາວ-ຈີນ ແລະ ກໍແມ່ນທ່າອຽງການພັດທະນາທົ່ວໂລກທີ່ບໍ່ສາມາດປ່ຽນແປງໄດ້.
