ໃນໄລຍະ 6 ເດືອນຕົ້ນປີ 2026, ການຈັດຕັ້ງປະຕິບັດວຽກງານຕົວຈິງ ຂອງແຂວງຫົວພັນ ສາມາດຍາດໄດ້ຜົນສໍາເລັດໃນຫຼາຍດ້ານ ເປັນຕົ້ນ ຂົງເຂດປ້ອງກັນຊາດ-ປ້ອງກັນຄວາມສະຫງົບ ໄດ້ສຸມໃສ່ ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ດ້ວຍການຈັດຕັ້ງເຊື່ອມຊຶມນິຕິກຳຕ່າງໆ, ຈັດຕັ້ງຮໍ່າຮຽນການເມືອງ ຫັດແອບສິລະປະຍຸດ, ຍຸດທະວິທີສູ້ຮົບ, ປັບປຸງກອງຫຼອນ-ປກສ ເພື່ອຍົກລະດັບຄວາມຮູ້ຄວາມສາມາດ ແລະ ກໍາລັງແຮງສູ້ຮົບໃຫ້ສູງຂຶ້ນ ເຮັດໃຫ້ທົ່ວແຂວງມີຄວາມສະຫງົບໂດຍພື້ນຖານ.

 

ສຳລັບຂົງເຂດເສດຖະກິດ ໄດ້ສຸມໃສ່ຜະລິດກະສິກຳຕາມລະດູການ ຫັນລົງຊຸກຍູ້, ໃຫ້ການແນະນຳຄວາມຮູ້ດ້ານເຕັກນິກ, ວິຊາການ, ການເກັບກ່ຽວຜົນຜະລິດລະດູແລ້ງ ແລະ ຊຸກຍູ້ການຜະລິດລະດູຝົນ, ໄດ້ເອົາໃຈໃສ່ພັດທະນາກະສິກໍາ-ປ່າໄມ້ ຕາມທິດສີຂຽວ ສະອາດ ປອດໄພ ແລະ ເປັນມິດຕໍ່ສິ່ງແວດລ້ອມ ຮັບປະກັນຄວາມໝັ້ນຄົງ ທາງດ້ານສະບຽງອາຫານ ແລະ ໂພຊະນາການ, ຜະລິດສິນຄ້າກະສິກຳທີ່ມີຄຸນນະພາບ ໂດຍໄດ້ຊຸກຍູ້ສົ່ງເສີມຫົວໜ່ວຍທຸລະກິດ ແລະ ກະສິກອນ ນໍາໃຊ້ເຕັກນິກໃໝ່ ເຂົ້າໃສ່ການຜະລິດ ແບບຄອບຄົວ ເພື່ອທົດແທນການນຳເຂົ້າ ກ້າວໄປສູ່ເສດຖະກິດເອກະລາດເປັນເຈົ້າຕົນເອງໃຫ້ຫລາຍຂຶ້ນ.

 

ສະຫາຍ ຄອນປະພັນ ເລືອງສີຈັນທອງ ຮອງເລຂາພັກແຂວງ, ຜູ້ປະຈໍາການຄະນະບໍລິຫານງານພັກແຂວງຫົວພັນ ລາຍງານຕໍ່ທີ່ປະຊຸມກ່ຽວກັບການນໍາພາ-ຊີ້ນໍາຈັດຕັ້ງປະຕິບັດວຽກງານຮອບດ້ານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີຂອງຄະນະບໍລິຫານງານພັກແຂວງ ສະໄໝທີ XI ໃນວັນທີ 16 ມິຖຸນາ 2026 ນີ້ວ່າ: ໄດ້ເອົາໃຈໃສ່ຄຸ້ມຄອງການຮຽນ-ການສອນ ເປັນປົກກະຕິ ການປະຕິບັດຕົວຊີ້ວັດ ຂອງຂະແໜງການສຶກສາ ບັນລຸໄດ້ຄາດໝາຍເປັນສ່ວນໃຫຍ່, ຈັດການສອບເສັງນັກຮຽນເກັ່ງ ແລະ ເສັງຈົບຊັ້ນປະຖົມ ແລະ ມັດທະຍົມທົ່ວແຂວງມີຜົນສຳເລັດ, ຂະຫຍາຍຕາໜ່າງສາທາລະນະສຸກ ເພື່ອຄວບຄຸມ ແລະ ປົກຄຸມ ການໃຫ້ການບໍລິການ ປະຊາຊົນໃນທົ່ວແຂວງ.

 

ຂົງເຂດອຳນາດລັດໄດ້ນຳພາການກະກຽມ ແລະ ດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາແຂວງ ຊຸດທີ V ສຳເລັດຕາມຄາດໝາຍ ພ້ອມທັງໄດ້ເອົາໃຈໃສ່ ປັບປຸງອົງການລັດແຕ່ລະຂັ້ນ ຕາມມະຕິ, ຄໍາສັ່ງ ຂອງສູນກາງພັກ ໃຫ້ມີຄວາມກະທັດຮັດ ສົມເຫດສົມຜົນ ແລະ ການປັບປຸງພາລະບົດບາດ, ກໍານົດຕຳແໜ່ງງານ, ບັນຈຸສັບຊ້ອນບຸກຄະລາກອນ ໃຫ້ສົມຄູ່ກັບໜ້າທີ່ການເມືອງ ເຮັດໃຫ້ການເຄື່ອນໄຫວວຽກງານມີປະສິດທິຜົນສູງຂຶ້ນ. ນອກຈາກນີ້, ໄດ້ເພີ່ມທະວີຄວາມສາມັກຄີປອງດອງ ລະຫວ່າງເຜົ່າ, ຊັ້ນຄົນ, ເພດ, ໄວ, ສາສະໜາ ແລະ ກ້ອນກໍາລັງສາມັກຄີທົ່ວປວງຊົນພາຍໃນແຂວງ, ເອົາໃຈໃສ່ນໍາພາ-ຊີ້ນຳວຽກງານກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດໝາຍ, ປັບປຸງລະບົບການເມືອງຢູ່ຂັ້ນຮາກຖານ ໃຫ້ມີຄວາມເຂັ້ມແຂງ, ໜັກແໜ້ນ, ຕີຖອຍປະກົດການຫຍໍ້ທໍ້ໃນສັງຄົມ.

 

ສໍາລັບທິດທາງແຜນການໃນຕໍ່ໜ້າ, ຄະນະບໍລິຫານງານພັກແຂວງຫົວພັນ ຈະສືບຕໍ່ສ້າງທຸກເງື່ອນໄຂ ເພື່ອຮັກສາສະຖຽນລະພາບ ທາງດ້ານການເມືອງ, ຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ຢ່າງໜັກແໜ້ນ, ສ້າງຄວາມສາມັກຄີປອງດອງ ແລະ ຍຸຕິທຳ ໃນສັງຄົມ, ສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ໃນການນຳພາ ຂອງຄະນະບໍລິຫານງານພັກແຂວງ ກໍຄືຄະນະພັກແຕ່ລະຂັ້ນ ຕິດພັນກັບການເສີມຂະຫຍາຍຜົນງານອັນພົ້ນເດັ່ນ ສ້າງຮາກຖານພັກ, ໜ່ວຍພັກໃຫ້ມີຄວາມປອດໃສ ເຂັ້ມແຂງ ໜັກແໜ້ນ, ສູ້ຊົນບຸກບືນແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ດ້ວຍການນໍາໃຊ້ບາງມາດຕະການ ແລະ ສ້າງບັນດາປັດໄຈຕົວຈິງ ເພື່ອຈັດເກັບລາຍຮັບເຂົ້າງົບປະມານໃຫ້ບັນລຸຕາມແຜນການ, ນໍາໃຊ້ທ່າແຮງບົ່ມຊ້ອນຂອງຂະແໜງການ ແລະ ທ້ອງຖິ່ນ ເຂົ້າໃນການພັດທະນາຕາມເງື່ອນໄຂສະພາບຕົວຈິງ, ຂະຫຍາຍໜໍ່ແໜງຕົວແບບດ້ານຕ່າງໆ, ຍົກສູງປະສິດທິພາບຂອງການຄຸ້ມຄ້ອງລັດ, ຄຸ້ມຄອງສັງຄົມດ້ວຍກົດໝາຍ ຕິດພັນກັບການປັບປຸງກົງຈັກການຈັດຕັ້ງ ແນໃສ່ເຮັດໃຫ້ກົງຈັກການຈັດຕັ້ງກະທັດຮັດ, ເຂັ້ມແຂງ, ຫຼຸດຜ່ອນຂັ້ນ-ຂອດບໍລິການ, ເຄື່ອນໄຫວເປັນລະບົບຮັດກຸມ, ໂປ່ງໃສ ແລະ ວ່ອງໄວ ແນໃສ່ສ້າງແຂວງຫົວພັນໃຫ້ມີການພັດທະນາດີຂຶ້ນ.

 

ກອງປະຊຸມຄັ້ງນີ້, ໂດຍເປັນກຽດເຂົ້າຮ່ວມຂອງສະຫາຍ ເພັດ ພົມພິພັກ ກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຫ້ອງວ່າການສູນກາງພັກ, ສະຫາຍ ພຸດພັນ ແກ້ວວົງໄຊ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຫົວພັນ ພ້ອມດ້ວຍຄະນະປະຈໍາພັກແຂວງ, ກຳມະການພັກແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຂ່າວ-ພາບ: ນິດຖະໜອມ