ແບນຊິກ ເຮັດໄດ້ພຽງສະເໝີກັບ ອິຣານ 0-0
ການແຂ່ງຂັນເຕະບານໂລກ 2026 ຮອບແບ່ງກຸ່ມ (ກຸ່ມ G) ນັດທີສອງ ທີ່ສະໜາມ ໂຊໄຟ ສະເຕດຽມ (SoFi Stadium) ລັດແຄລິຟໍເນຍ ສະຫະລັດອາເມຣິກາ ເມື່ອຕອນເຊົ້າຂອງວັນທີ 22 ມິຖຸນາ 2026 ຕາມເວລາໃນ ສປປ ລາວ, ທີມຊາດແບນຊິກ ລົງສະໜາມພົບກັບ ທີມຊາດອິຣານ. ໂດຍຜົນງານນັດທຳອິດ ແບນຊິກ ສະເໝີ ອີຢິບ 1-1 ສ່ວນ ອີຣານ ສະເໝີ ນູແວນເຊລັງ (ນິວຊີແລນ) 2-2 ສົ່ງຜົນໃຫ້ທັງ 4 ທີມໃນກຸ່ມນີ້ມີ 1 ຄະແນນເທົ່າກັນ.
ເລີ່ມເກມເຄິ່ງເວລາທຳອິດເປັນແບນຊິກ ທີ່ເປີດເກມບຸກເຂົ້າໃສ່ອິຣານຢ່າງຕໍ່ເນື່ອງ ແລະ ຄອງບານໄດ້ເປັນສ່ວນໃຫຍ່, ແຕ່ເປັນອິຣານ ເກືອບໄດ້ປະຕູຂຶ້ນນຳກ່ອນ ໃນນາທີ 25 ເມື່ອ ເມດີ ຕາເຣມີ ສົ່ງບານເຂົ້າປະຕູ ແຕ່ຫຼັງຈາກຜູ້ຕັດສິນກວດສອບ VAR ແລ້ວ ພົບວ່າເປັນຈັງຫວະຢືນລ້ຳໜ້າກ່ອນ ເຮັດໃຫ້ ອີຣານ ພາດໂອກາດໄດ້ປະຕູຢ່າງໜ້າເສຍດາຍ ຈົບເຄິ່ງທຳອິດສະເໝີກັນຢູ່ 0-0.
ເຂົ້າສູ່ເຄິ່ງເວລາທີ 2 ແບນຊິກ ຍັງຄົງເປັນຝ່າຍຄອງບານບຸກຄືເກົ່າ ແຕ່ເກມຕ້ອງມາພົບກັບຈຸດປ່ຽນໃນນາທີທີ 66 ເມື່ອຜູ້ຕັດສິນ ຈົກໃບແດງໃຫ້ ນາທັງ ເອັນກອຍ ກອງຫຼັງແບນຊິກ ໄລ່ອອກຈາກສະໜາມທັນທີ ເຮັດໃຫ້ ແບນຊິກ ເຫຼືອຜູ້ຫຼິ້ນພຽງ 10 ຄົນ.
ເຖິງວ່າ ອິຣານ ຈະມີຜູ້ຫຼິ້ນຫຼາຍກວ່າ ແຕ່ກໍຍັງເປັນຝ່າຍ ແບນຊິກ ທີ່ພະຍາຍາມຊອກຫາຈັງຫວະເຂົ້າຍິງປະຕູຢ່າງຕໍ່ເນື່ອງ, ແຕ່ສຸດທ້າຍກໍບໍ່ມີຝ່າຍໃດສາມາດເຈາະປະຕູກັນໄດ້ ຈົບເກມສະເໝີກັນໄປ 0-0 ແບ່ງກັນໄປທີມລະ 1 ຄະແນນ ເຮັດໃຫ້ທັງສອງທີມມີ 2 ຄະແນນ ຕ້ອງໄປລຸ້ນເຂົ້າຮອບ 32 ທີມສຸດທ້າຍໃນນັດສຸດທ້າຍ.
ສຳລັບໂປຣແກຣມການແຂ່ງຂັນນັດສຸດທ້າຍຂອງກຸ່ມ G ຈະແຂ່ງຂັນພ້ອມກັນ ໃນວັນທີ 27 ມິຖຸນາ, ແບນຊິກ ຈະພົບກັບ ນູແວນເຊລັງ ທີ່ສະໜາມ ບີຊີ ເພຼດ (BC Place) ເມືອງແວນຄູເວີ ປະເທດການາດາ; ສ່ວນອິຣານ ຈະພົບກັບ ເອຢິບ ທີ່ສະໜາມ ລູເມນ ຟິວ (Lumen Field) ເມືອງຊີແອດເທິນ ສະຫະລັດອາເມຣິກາ.
