ໄລຍະ 2 ປີ ແຂວງສາລະວັນ ສາມາດມ້າງຄະດີຢາເສບຕິດໄດ້ 285 ເລື່ອງ, ຢຶດຢາບ້າເກືອບ 7 ແສນເມັດ ແລະ ປະຫານຊີວິດ ຜູ້ກະທໍາຜິດ 6 ເລື່ອງ

.

ທ່ານ ພົນຈັດຕະວາ ສີເສີດ ສອນດາລາ ຄະນະປະຈຳພັກແຂວງ ຫົວໜ້າກອງບັນຊາການ ປ້ອງກັນຄວາມສະຫງົບ ແຂວງສາລະວັນ ໄດ້ລາຍງານຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ໄລຍະ 2 ປີ (2024-2025) ຕໍ່ກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ໄລຍະ 2 ປີ (2024-2025) ຈັດຂື້ນໃນວັນທີ 23 ມິຖຸນາ 2026 ຢູ່ທີ່ສະໂມສອນແຂວງ ມີບາງຕອນທ່ານໄດ້ລາຍງານວ່າ: ແຂວງສາລະວັນ ແມ່ນໜື່ງທີ່ນອນຢູ່ບັນດາແຂວງພາກໃຕ້ຂອງລາວ, ມີເສັ້ນຊາຍແດນຕິດກັບ 2 ປະເທດ ຄື: ທິດຕາເວັນອອກຕິດກັບ ສສ ຫວຽດນາມ (ແຂວງກວາງຈິ, ເທື່ອທຽນເຫ໋ວ), ມີຊາຍແດນຮ່ວມກັນ 170 ກວ່າກິໂລແມັດ, ທິດຕາເວັນຕົກຕິດກັບຣາຊະນາຈັກໄທ (ຈັງຫວັດອຸບົນລາດຊະທານີ) ໂດຍມີແມ່ນໍ້າຂອງເປັນເສັ້ນຊາຍແດນ ມີຄວາມຍາວປະມານ 90 ກິໂລແມັດ, ທິດເໜືອເໜືອ ຕິດກັບແຂວງສະຫວັນນະເຂດ, ທິດໃຕ້ຕິດກັບ ແຂວງຈໍາປາສັກ, ແຂວງເຊກອງ. ໃນໄລຍະ 2 ປີ ຜ່ານມາ ໄດ້ເກັບກຳຂໍ້ມູນບັນດາເປົ້າໝາຍທີ່ພົວພັນກັບສິ່ງເສບຕິດຮ່ວມກັບກອງບັນຊາການ ປກສ 8 ຕົວເມືອງ, ອົງການປົກຄອງບ້ານ, ເປັນຕົ້ນ: ໄດ້ຂຶ້ນບັນຊີເປົ້າໝາຍທີ່ພົວພັນຢາເສບຕິດ ທັງໝົດ 7.375 ຄົນ, ຍິງ 1.321 ຄົນ; ເປົ້າໝາຍເສບຢາເສບຕິດ ທັງໝົດ 6.064 ຄົນ, ຍິງ 1.168 ຄົນ; ເປົ້າໝາຍ ຄ້າ-ຂາຍຢາເສບຕິດ ມີທັງໝົດ 1.192 ຄົນ, ຍິງ 153 ຄົນ. ຜ່ານການກວດກາຕົວຈິງເມື່ອທຽບໃສ່ ໄລຍະທີ 1 (2021-2023), ເຫັນໄດ້ວ່າ: ເປົ້າໝາຍທີ່ພົວພັນຢາເສບຕິດຫຼຸດລົງ 4.137 ຄົນ ເທົ່າກັບ 35,93% ນອກຈານີ້ ຍັງໄດ້ຂື້ນບັນຊີເປົ້າໝາຍພື້ນທີ່ຫຼໍ່ແຫຼມມີ 18 ຈຸດ, ເຊິ່ງໄລຍະຜ່ານມາ ສາມາດແກ້ໄຂໄດ້ 8 ຈຸດ, ຍັງຄ້າງ 10 ຈຸດ; ຂື້ນບັນຊີຈຸດມົ້ວສຸມ ຮ້ານບັນເທີງ 100 ຮ້ານ, ຮ້ານເກມ 22 ຮ້ານ, ຮ້ານ ສະນຸກເກີ້ 16 ຮ້ານ ແລະ ຫ້ອງແຖວ 62 ແຫ່ງ.