ປກສ ເມືອງນາຊາຍທອງ ຈັບຕົວແກ້ງສະແກມເມີ ໄດ້ 23 ຄົນ ຢູ່ບ້ານ ອີໄລໃຕ້

ວັນທີ 30 ມິຖຸນາ 2026 ເວລາ 13:45 ນາທີ ເຈົ້າໜ້າທີ່ໜ່ວຍງານຄຸ້ມຄອງຄົນຕ່າງປະເທດ ແລະ ທ່ອງທ່ຽວ ພະແນກສັນຕິບານ ກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ສົມທົບກັບ ປກສ ກຸ່ມອີໄລ ແລະ ອຳນາດການປົກຄອງບ້ານ ອີໄລໃຕ້ ລົງກວດກາ ແລະ ແກ້ໄຂແກ້ງສະແກມເມີ (Scammer) ຢູ່ຫ້ອງແຖວ ແລະ ເຮືອນເຊົ່າ ເຂດບ້ານ ອີໄລໃຕ້ ເມືອງນາຊາຍທອງ ສາມາດກັກຕົວເປົ້າໝາຍໄດ້ 23 ຄົນ, ມີ 2 ສັນຊາດຄື: ສັນຊາດຈີນ 9 ຄົນ ແລະ ຫວຽດນາມ 14 ຄົນ, ຍິງ 3 ຄົນ.
 
ນອກນັ້ນ, ຍັງຢຶດຂອງກາງຄະດີໄດ້ຫຼາຍລາຍການມີ: ຄອມພິວເຕີໂນດບຸກ 16 ໜ່ວຍ, ໂທລະສັບມືຖື 77 ໜ່ວຍ, ໂຟນີ (Phonee) 2 ໜ່ວຍ, ເງິນກີບ 1 ລ້ານກວ່າກີບ, ເງິນດົງ 8 ແສນກວ່າດົງ ແລະ ເຄື່ອງອຸປະກອນຕ່າງໆ ອີກຈຳນວນໜຶ່ງ.
 
ປັດຈຸບັນ, ເຈົ້າໜ້າທີ່ກອງບັນຊາການ ປກສ ເມືອງນາຊາຍທອງ ໄດ້ກັກຕົວເປົ້າໝາຍໄວ້ຄ້າຍຄຸມຂັງຊົ່ວຄາວ ກອງບັນຊາການ ປກສ ເມືອງນາຊາຍທອງ ເພື່ອສືບຕໍ່ດຳເນີນການສືບສວນ-ສອບສວນ ຂະຫຍາຍຜົນ ຕາມຂັ້ນຕອນຂອງກົດໝາຍຢ່າງເຂັ້ມງວດ.
ຂ່າວ: ປກສ ນະຄອນຫຼວງວຽງຈັນ

แชร์