ລາວເດີນໜ້າສູ່ຍຸກການຄ້າດິຈິຕອນ ກຽມຈັດ Lao E-Commerce ສ້າງໂອກາດໃຫ້ທຸລະກິດ
ກະຊວງອຸດສາຫະກຳ ແລະ ການຄ້າ ກຽມຈັດງານ "Lao E-Commerce Festival 2026" ເປັນຄັ້ງທຳອິດ ໃນວັນທີ 25-26 ກັນຍາ 2026 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍມຸ່ງຫວັງໃຫ້ເປັນເວທີສຳຄັນໃນການຂັບເຄື່ອນເສດຖະກິດດິຈິຕອນ ແລະ ຍົກລະດັບຄວາມສາມາດຂອງທຸລະກິດລາວໃຫ້ທັນກັບການປ່ຽນແປງໃນຍຸກດິຈິຕອນ.
ການຖະແຫຼງຂ່າວເມື່ອວັນທີ 15 ກໍລະກົດ 2026 ທ່ານ ພຸດທະວັນ ນັນທະວົງ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ລະບຸວ່າ ເສດຖະກິດດິຈິຕອນກຳລັງກາຍເປັນເສົາຄ້ຳສຳຄັນຂອງການເຕີບໂຕທາງເສດຖະກິດຂອງ ສປປ ລາວ ດັ່ງນັ້ນ ການຈັດງານຄັ້ງນີ້ ຈຶ່ງເປັນການຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດດິຈິຕອນຂອງລັດຖະບານໃຫ້ເກີດຜົນເປັນຮູບປະທຳ.
ຈຸດເດັ່ນຂອງງານ ຄື ການນຳເອົາຜູ້ໃຫ້ບໍລິການແພລດຟອມຊື້-ຂາຍອອນລາຍ, ລະບົບການຊຳລະເງິນດິຈິຕອນ, ບໍລິການຂົນສົ່ງ-ໂລຈິສຕິກ ແລະ ຜູ້ປະກອບການ ມາພົບປະກັນໃນເວທີດຽວ ເພື່ອສ້າງລະບົບນິເວດການຄ້າອອນລາຍທີ່ເຂັ້ມແຂງ.
ຂະນະດຽວກັນ ງານນີ້ຍັງຈະເປັນໂອກາດໃຫ້ MSMEs ແລະ ສິນຄ້າ ODOP ໄດ້ຂະຫຍາຍຕະຫຼາດ ທັງພາຍໃນ ແລະ ຕ່າງປະເທດ ຄວບຄູ່ກັບການສົ່ງເສີມການຄ້າອອນລາຍທີ່ໂປ່ງໃສ ຖືກຕ້ອງຕາມກົດໝາຍ ແລະ ຄຸ້ມຄອງຜົນປະໂຫຍດຂອງຜູ້ບໍລິໂພກ.
ພາຍໃນງານ ຈະມີການວາງສະແດງສິນຄ້າ, ການສຳມະນາຖ່າຍທອດປະສົບການຈາກຜູ້ຊ່ຽວຊານ, ພ້ອມທັງກິດຈະກຳຈັບຄູ່ທຸລະກິດ ເພື່ອຕໍ່ຍອດການລົງທຶນ ແລະ ສ້າງຄວາມຮ່ວມມືທາງການຄ້າໃນໄລຍະຍາວ.
ກະຊວງອຸດສາຫະກຳ ແລະ ການຄ້າ ຈຶ່ງເຊີນຊວນຜູ້ປະກອບການ, ນັກສຶກສາ ແລະ ປະຊາຊົນ ເຂົ້າຮ່ວມງານຢ່າງພ້ອມພຽງ ເພື່ອຮ່ວມກັນສ້າງພື້ນຖານໃຫ້ເສດຖະກິດດິຈິຕອນຂອງ ສປປ ລາວ ເຕີບໂຕຢ່າງໝັ້ນຄົງ ແລະ ຍືນຍົງ.
ຂ່າວ ບຸນນິກ ມະນີ
