ການປະດິດສ້າງດ້ານວິທະຍາສາດເຕັກໂນໂລຊີ ສຳຄັນແມ່ນຢູ່ນຳການສືບທອດແບບແລ່ນຕໍ່ໄມ້
ຕົ້ນລະດູຮ້ອນປີ 2016, ກອງປະຊຸມປະດິດສ້າງດ້ານວິທະຍາສາດເຕັກໂນໂລຊີທົ່ວປະເທດຈີນ, ກອງປະຊຸມບັນດິດສະຖາບັນວິທະຍາສາດຈີນ ແລະ ສະຖາບັນວິສະວະກຳຈີນ, ກອງປະຊຸມຜູ້ແທນທົ່ວປະເທດຄັ້ງທີ 9 ຂອງສະມາຄົມວິທະຍາສາດເຕັກໂນໂລຊີຈີນ ເຊິ່ງເປັນກອງປະຊຸມຂະໜາດໃຫຍ່ດ້ານວິທະຍາສາດເຕັກໂນໂລຊີອີກຄັ້ງໜຶ່ງໃນປະຫວັດສາດ ສປ ຈີນ ໄດ້ໄຂຂຶ້ນຢູ່ນະຄອນຫຼວງປັກກິ່ງ. ໂອກາດດັ່ງກ່າວ, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນໄດ້ກ່າວວ່າ: “ການປະດິດສ້າງດ້ານວິທະຍາສາດເຕັກໂນໂລຊີ ສຳຄັນແມ່ນຢູ່ນຳການສືບທອດແບບແລ່ນຕໍ່ໄມ້”, ເພິ່ນໄດ້ນຳໃຊ້ຄຳປຽບທຽບອັນມີຊີວິດຊີວາຄື “ການແລ່ນຕໍ່ໄມ້” ເພື່ອຊີ້ແຈງວ່າ: ການສ້າງສາປະເທດແຫ່ງການປະດິດສ້າງຕ້ອງການມີການບຸກບືນສູ້ຊົນຢ່າງຕໍ່ເນື່ອງແບບຮຸ່ນສູ່ຮຸ່ນ, ພ້ອມທັງຊຸກຍູ້ສົ່ງເສີມໃຫ້ບັນດິດສະຖາບັນວິທະຍາສາດຈີນ ແລະ ສະຖາບັນວິສະວະກຳຈີນ ເສີມຂະຫຍາຍບົດບາດນຳໜ້າດ້ານວິທະຍາສາດເຕັກໂນໂລຊີ, ສາມັກຄີ ແລະ ນຳພາວົງການວິທະຍາສາດເຕັກໂນໂລຊີທົ່ວປະເທດ ໂດຍສະເພາະແມ່ນຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີຮຸ່ນໜຸ່ມທັງຫຼາຍ ສ້າງຄຸນງາມຄວາມດີເພື່ອພາລະກິດສ້າງສາປະເທດໃຫ້ເປັນປະເທດເຂັ້ມແຂງດ້ານວິທະຍາສາດເຕັກໂນໂລຊີໃນໂລກ.
ປີ 2004, ທ່ານ ຢາວຊີຈື້ ນັກວິທະຍາສາດຄອມພິວເຕີທີ່ມີຊື່ສຽງລະດັບໂລກ ນັກວິຊາການເຊື້ອສາຍຈີນຜູ້ທຳອິດທີ່ໄດ້ຮັບລາງວັນຕູຣິງ ເຊິ່ງເປັນລາງວັນສູງສຸດດ້ານວິທະຍາສາດຄອມພິວເຕີໃນສາກົນນັບແຕ່ລາງວັນດັ່ງກ່າວສ້າງຕັ້ງຂຶ້ນເປັນຕົ້ນມາ ເຊິ່ງໄດ້ປະຖິ້ມເງື່ອນໄຂສະຫວັດດີການທີ່ດີຂອງຕ່າງປະເທດ ໂດຍທ່ານເລືອກກັບຄືນປະເທດຊາດເພື່ອອົບຮົມບົ່ມສ້າງ ແລະ ສິດສອນນັກສຶກສາໃຫ້ມີຄວາມຮູ້ຄວາມສາມາດ ແລະ ມີຄຸນສົມບັດຢ່າງເດັດດ່ຽວ. ປີຕໍ່ມາ, ເພິ່ນໄດ້ສ້າງຕັ້ງຫ້ອງທົດລອງວິທະຍາສາດຄອມພິວເຕີມະຫາວິທະຍາໄລຊິງຮວາ ຄື ຫ້ອງ “ຢາວ”, ເຊິ່ງມີເປົ້າໝາຍເພື່ອບຳລຸງສ້າງຜູ້ມີຄວາມຮູ້ຄວາມສາມາດດ້ານຄອມພິວເຕີລະດັບແຖວໜ້າຂອງສາກົນ ໂດຍເລີ່ມຈາກນັກສຶກສາປະລິຍາຕີ.
ກາງລະດູຮ້ອນປີ 2024, ທ່ານ ສີຈິ້ນຜິງ ໄດ້ຕອບຈົດໝາຍທ່ານ ຢາວຊີຈື້ ບັນດິດສະຖາບັນວິທະຍາສາດຈີນ ທີ່ໄດ້ກັບຄືນມາປະຕິບັດໜ້າທີ່ສິດສອນຢູ່ປະເທດຊາດເປັນເວລາ 20 ປີ ໂດຍໄດ້ສົ່ງເສີມໃຫ້ກຳລັງໃຈແກ່ທ່ານ ຢາວຊີຈື້ ຈົ່ງນຳພາສະຫາຍທັງຫຼາຍ ສືບຕໍ່ຄົ້ນຄວ້າຮູບແບບບຳລຸງສ້າງຜູ້ມີຄວາມຮູ້ຄວາມສາມາດດ້ານປະດິດສ້າງຢ່າງເປັນເຈົ້າຕົນເອງ, ປະກອບສ່ວນອັນໃໝ່ເພື່ອບັນລຸການເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງດ້ານວິທະຍາສາດເຕັກໂນໂລຊີໃນລະດັບສູງ ແລະ ການສ້າງສາປະເທດເຂັ້ມແຂງດ້ານການສຶກສາ ແລະ ປະເທດເຂັ້ມແຂງດ້ານວິທະຍາສາດເຕັກໂນໂລຊີ.
ນັບມາຮອດເດືອນທັນວາ ປີ 2025, “ຫ້ອງຢາວ” ໄດ້ບຳລຸງສ້າງນັກສຶກສາເກືອບ 1.200 ຄົນ, ໃນນັ້ນ ມີ 9 ຄົນ ໄດ້ຮັບລາງວັນທຶນການສຶກສາຊັ້ນຍອດລະດັບປະລິຍາຕີ ຂອງມະຫາວິທະຍາໄລຊິງຮວາ, 6 ຄົນໄດ້ຮັບລາງວັນຄົ້ນຄວ້າສະລອນ (Sloan Research Fellowships) ຂອງອາເມຣິກາ; ໃນໄລຍະຮຽນຊັ້ນປະລິຍາຕີ, ມີນັກສຶກສາໄດ້ລົງພິມບົດວິທະຍານິພົນ 600 ກວ່າບົດ, ນັກສຶກສາທີ່ຜ່ານບົດລາຍງານໃນກອງປະຊຸມສຸດຍອດລະດັບສາກົນ ໃນຂົງເຂດວິທະຍາສາດຄອມພິວເຕີ, ປັນຍາປະດິດກັບຂໍ້ມູນຂ່າວສານກວນຕຳ” ເກືອບ 330 ເທື່ອຄົນ.
ປີ 2019, ຈີນໄດ້ເຜີຍແຜ່ຄວາມເຫັນວ່າດ້ວຍການເສີມຂະຫຍາຍຈິດໃຈນັກວິທະຍາສາດຕື່ມອີກ ເພື່ອເພີ່ມທະວີການກໍ່ສ້າງແບບແຜນວິທີຄົ້ນຄວ້າວິທະຍາສາດ ແລະ ແບບແຜນວິຊາການ ໂດຍກຳນົດຢ່າງຈະແຈ້ງວ່າ ອອກແຮງເສີມຂະຫຍາຍຈິດໃຈກໍ່ສ້າງຄົນແບບຍອມເສຍສະຫຼະເພື່ອຊ່ວຍເຫຼືອຜູ້ອື່ນ, ສົ່ງເສີມ ແລະສະໜັບສະໜູນການເຕີບໃຫຍ່ຂະຫຍາຍຕົວຂອງຄົນຮຸ່ນໜຸ່ມ, ຮຽກຮ້ອງໃຫ້ຮູ້ວິທີພົບເຫັນຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີໜຸ່ມ, ກ້າປ່ອຍມື ແລະ ສະໜັບສະໜູນໃຫ້ເຂົາເຈົ້າເຮັດໜ້າທີ່ເປັນຂື່ຫຼັກເພື່ອແບກຫາບພາລະກິດສຳຄັນໃນການຄົ້ນຄວ້າວິທະຍາສາດ.
ທ່ານ ສີຈິ້ນຜິງ ຍັງໄດ້ຝາກຄວາມຫວັງເປັນຢ່າງຍິ່ງໄວ້ນຳຄົນຮຸ່ນໜຸ່ມທີ່ເປັນ “ຜູ້ແລ່ນຕໍ່ໄມ້”.
ໃນເວລາທີ່ຕອບຈົດໝາຍທີມງານຊາວໜຸ່ມກໍ່ສ້າງສະຖານີອະວະກາດ ຂອງກຸ່ມບໍລິສັດວິທະຍາສາດເຕັກນິກການບິນອະວະກາດຈີນ, ທ່ານ ສີຈິ້ນຜິງ ໄດ້ກະຕຸກຊຸກຍູ້ກຳລັງໃຈໃຫ້ເຂົາເຈົ້າຈົ່ງສ້າງຜົນງານອັນສະຫງ່າລາສີ ບົນເສັ້ນທາງນຳຕາມຄວາມຝັນທາງດ້ານອະວະກາດ ເພື່ອສ້າງຄຸນງາມຄວາມດີ ປະກອບສ່ວນອັນໃໝ່ເຂົ້າໃນການເຮັດໃຫ້ວິທະຍາສາດເຕັກນິກການບິນອະວະກາດຂອງປະເທດຊາດ ບັນລຸເປົ້າໝາຍເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃນລະດັບສູງ.
ຢູ່ “ໂໝຊູຄົ່ງຈ່ຽນ” ເຂດນິຄົມປະດິດສ້າງແບບຈຳລອງປັນຍາປະດິດຂະໜາດໃຫຍ່ທີ່ນະຄອນຊຽງໄຮ້, ທ່ານ ສີຈິ້ນຜິງ ໄດ້ໂອ້ລົມສົນທະນາຢ່າງໃກ້ຊິດກັບຜູ້ມີຄວາມຮູ້ຄວາມສາມາດ ທີ່ເປັນຄົນຮຸ່ນໜຸ່ມອາຍຸສະເລ່ຍບໍ່ຮອດ 35 ປີ, ເພິ່ນໄດ້ກ່າວວ່າ: “ປັນຍາປະດິດເປັນພາລະກິດທີ່ເກີດໃໝ່, ທັງເປັນພາລະກິດຂອງຊາວໜຸ່ມ.” ພ້ອມທັງຊຸກຍູ້ສົ່ງເສີມໃຫ້ເຂົາເຈົ້າຕ້ອງແລ່ນຕໍ່ໄມ້ແຫ່ງປະຫວັດສາດໃຫ້ໄດ້ຮັບຜົນງານທີ່ດີ.
ເດືອນສິງຫາ ປີ 2023, ຈີນໄດ້ເຜີຍແຜ່ບາງມາດຕະການກ່ຽວກັບການເພີ່ມທະວີການບຳລຸງສ້າງ ແລະ ນຳໃຊ້ຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີໜຸ່ມຕື່ມອີກ ໂດຍກຳນົດຢ່າງຈະແຈ້ງວ່າ ຈະສະໜັບສະໜູນຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີໜຸ່ມເຮັດໜ້າທີ່ເປັນ “ຂື່ຫຼັກ” ແລະ “ຕົວລະຄອນເອກ” ໃນການແບກຫາບພາລະກິດສຳຄັນແຫ່ງຊາດດ້ານວິທະຍາສາດເຕັກໂນໂລຊີ.
ໃນໄລຍະແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 14 ຂອງຈີນ (2021-2025), ຜູ້ຮັບຜິດຊອບໂຄງການທີ່ເປັນຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີໜຸ່ມທີ່ມີອາຍຸບໍ່ເກີນ 45 ປີ ກວມເອົາ 43,3% ຂອງຈຳນວນຜູ້ຮັບຜິດຊອບທັງໝົດຂອງໂຄງການຄົ້ນຄວ້າພັດທະນາສຳຄັນແຫ່ງຊາດຈີນ, ໂຄງການ 80% ຂອງມູນນິທິວິທະຍາສາດທຳມະຊາດແຫ່ງຊາດ ແມ່ນມອບໃຫ້ຊາວໜຸ່ມທີ່ມີອາຍຸບໍ່ຮອດ 45 ປີ ຮັບຜິດຊອບ. ປີ 2025, ໃນບັນດາບັນດິດສະຖາບັນວິທະຍາສາດຈີນທີ່ໄດ້ຮັບເລືອກຕັ້ງໃໝ່ນັ້ນ, ຜູ້ທີ່ໜຸ່ມທີ່ສຸດມີອາຍຸພຽງ 44ປີ ເທົ່ານັ້ນ.
ປັດຈຸບັນ, ຈີນໄດ້ມີຖັນແຖວນັກຄົ້ນຄວ້າພັດທະນາຂະໜາດໃຫຍ່ທີ່ສຸດຢູ່ໃນໂລກ, ຍອດປະລິມານຊັບພະຍາກອນມະນຸດ, ຍຶດຈຳນວນນັກຄົ້ນຄວ້າພັດທະນາວິທະຍາສາດເຕັກໂນໂລຊີ ລ້ວນແຕ່ຄອງອັນດັບໜຶ່ງຂອງໂລກ, ແຕ່ລະປີມີນັກສຶກສາຮຽນຈົບວິຊາວິທະຍາສາດ, ເຕັກໂນໂລຊີ, ວິສະວະກຳ ແລະ ຄະນິດສາດ ຫຼາຍກວ່າ 5 ລ້ານຄົນ.
ການຍຶດໝັ້ນໃຫ້ຜູ້ອາວຸໂສອົບຮົມບົ່ມສອນຄົນຮຸ່ນໃໝ່, ສ້າງຜົນງານທີ່ດີໃນ “ການແຂ່ງຂັນແລ່ນຕໍ່ໄມ້” ແຫ່ງການປະດິດສ້າງວິທະຍາສາດເຕັກໂນໂລຊີ, ເຊິ່ງບໍ່ພຽງແຕ່ສາມາດສ້າງຖັນແຖວຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີທີ່ມີໂຄງສ້າງອັນສົມເຫດສົມຜົນ, ມີບຸກຄະລາກອນຜູ້ສືບທອດໃນທຸກລະດັບ ແລະ ມີການສືບທອດແບບຮຸ່ນສູ່ຮຸ່ນ, ຍັງສາມາດເພີ່ມແຮງຂັບເຄື່ອນອັນໃຫຍ່ຫຼວງຢ່າງຕໍ່ເນື່ອງໃຫ້ແກ່ຈີນຊຸກຍູ້ຂະບວນການສ້າງສາຄວາມທັນສະໄໝແບບຈີນນຳອີກ.
