ທ່ານ ຄໍາແກ້ວ ລັດທະຍອດ ໄດ້ຜ່ານຮ່າງຄໍາສັ່ງຂອງປະທານຄະນະກໍາມະການປົກຄອງແຂວງ ວ່າດ້ວຍການເພີ່ມທະວີໃນການອະນຸລັກ ແລະ ສົ່ງເສີມຄຸນຄ່າມໍລະດົກໂລກທາງທໍາມະຊາດ ເຂດອຸທິຍານແຫ່ງຊາດຫີນໜາມໜໍ່. ພ້ອມນີ້, ບັນດາຜູ້ຕາງໜ້າຈາກພາກສ່ວນທີ່ກ່ຽວຂ້ອງ ໄດ້ນໍາສະເໜີຄວາມຄືບໜ້າການຈັດຕັ້ງປະຕິບັດກິດຈະກໍາໃນໄລຍະ 06 ເດືອນຕົ້ນປີ ແລະ ແຜນຈັດຕັ້ງປະຕິບັດໃນອະນາຄົດຂອງອຸທິຍານແຫ່ງຊາດຫີນໜາມໜໍ່ ລວມທັງລາຍງານຄວາມຄືບໜ້າການຮັບຮອງແຜນຄຸ້ມຄອງຮ່ວມ 05 ປີ, ນໍາສະເໜີແນວຄວາມຄິດໃນການສ້າງແຜນແມ່ບົດການປົກປັກຮັກສາສາຍພູຫີນປູນແຂວງຄໍາມ່ວນ ໃນກອບຍຸດທະສາດການພັດທະນາສີຂຽວ ແລະ ເພື່ອໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມຂອງແຂວງ ແລະ ເມືອງ ພ້ອມທັງປຶກສາຫາລືໃຫ້ຄໍາຄິດເຫັນໃນການຂະຫຍາຍເຂດກັນຊົນມໍລະດົກໂລກ (ສະເໜີປ່າສະຫງວນແຫ່ງຊາດ ຂຸນເຊໜອງມ້າເປັນເຂດກັນຊົນ), ສັງລວມຄືນຜົນການປຶກສາຫາລືແຜນດໍາເນີນງານການຮ່ວມມືຊາຍແດນ (TAP) ລະຫວ່າງອຸທິຍານແຫ່ງຊາດຫີນໜາມໜໍ່ ສປປ ລາວ ແລະ ອຸທິຍານແຫ່ງຊາດ ຟອງຍ່າ-ແກບາງ ສສ ຫວຽດນາມ ໃນເດືອນພຶດສະພາ 2026 ລວມທັງບົດບັນທຶກກອງປະຊຸມຮັບຮອງແຜນດໍາເນີນງານຮ່ວມຊາຍແດນລະຫວ່າງ 02 ເຂດ, ນໍາສະເໜີໂຄງຮ່າງການປະສານງານໃນການຄຸ້ມຄອງຮ່ວມຊາຍແດນອຸທິຍານແຫ່ງຊາດຫີນໜາມໜໍ່ ແລະ ອຸທິຍານແຫ່ງຊາດ ຟອງຍາ-ແກບາງ, ຜ່ານຮ່າງບົດບັນທຶກຄວາມເຂົ້າໃຈ, ຮ່າງສິດ ແລະ ໜ້າທີ່ຄະນະກໍາມະການຄຸ້ມຄອງມໍລະດົກ ແລະ ກອງເລຂາຂັ້ນແຂວງ, ນໍາສະເໜີ ແຜນກິດຈະກໍາຂອງ ແຜນດຳເນີນງານການຮ່ວມມືຊາຍແດນ (TAP) ທີ່ເປັນບຸລິມະສິດ ສຳລັບ 2026-2027 ພ້ອມກັນນັ້ນ, ຍັງມີການປຶກສາຫາລື, ສົນທະນາແລກປ່ຽນຄໍາຄິດເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານບັນລຸຕາມວັດຖຸປະສົງ ແລະ ລະດັບຄາດ ໝາຍທີ່ວາງໄວ້.

ຂ່າວ-ພາບ: ແດງສະຫວັດ ແສນພານິດ