ການຜະລິດກະສິກຳ ໂດຍສະເພາະ ການປູກໄມ້ໃຫ້ໝາກ ເປັນຕົ້ນໝາກກ້ຽງ, ໝາກພຸກ, ໝາກນັດ, ໝາກແຕ່ງ ແລະ ໝາກໝັ້ນ ສາມາດສ້າງລາຍຮັບໄດ້ເຖິງ 2,10 ຕື້ກີບຕໍ່ປີ.

ທ່ານ ຈົງກາວາ ວາໄຊຢີ ປະທານຄະນະກຳມະການປົກຄອງບ້ານທ່າຫລວງ ໄດ້ລາຍງານໃນໂອກາດທີ່ທ່ານ ສຸນີ ຄຸນປະເສີດ ຮອງປະທານຄະນະກໍາມະການປົກຄອງ ເມືອງວຽງພູຄາ ລົງຊຸກຍູ້ການປູກໄມ້ໃຫ້ໝາກຢູ່ບ້ານທ່າຫລວງ ຕາແສງນໍ້າມາຍ ເມື່ອບໍ່ດົນມານີ້ວ່າ: ບ້ານທ່າຫລວງ ມີ 49 ຫລັງຄາເຮືອນ, 68 ຄອບຄົວ, ມີພົນລະເມືອງ 319 ຄົນ, ຍິງ 150 ຄົນ, ມີຄອບຄົວທຸກຍາກ 8 ຄອບຄົວ, ທົ່ວບ້ານມີເນື້ອທີ່ທໍາການຜະລິດ 23,197 ເຮັກຕາ ໃນນີ້, ເນື້ອທີ່ການປູກພືດ ແລະ ເນື້ອທີ່ປູກໄມ້ໃຫ້ໝາກ 10 ເຮັກຕາ (ໝາກກ້ຽງ, ໝາກພຸກ, ໝາກນັດ, ໝາກແຕ່ງ ແລະ ໝາກໝັ້ນ). ນອກຈາກນີ້, ຍັງມີການປູກຢາງພາລາ ທີ່ເປັນທາແຮງຕົ້ນຕໍຢູ່ພາຍໃນບ້ານ ແລະ ອື່ນໆອີກ, ຊຶ່ງໃນປີໜຶ່ງສາມາດສ້າງລາຍຮັບໄດ້ເຖິງ 2,10 ຕື້ກີບ.

ທ່ານ ເຊັງລີ ເຈົ້າຂອງສວນໝາກກ້ຽງໄດ້ໃຫ້ຮູ້ວ່າ: ຄອບຄົວຕົນເອງ ໄດ້ເລີ່ມການປູກໝາກກ້ຽງແຕ່ປີ 2019 ມີ 2,000 ກວ່າຕົ້ນ ຊຶ່ງໄດ້ເກັບຂາຍຢູ່ໃນ 3 ປີ, ປີ 1 ສາມາດເກັບໄດ້ 100 ກວ່າໂຕນ, ສ້າງລາຍຮັບໄດ້ 450-500 ລ້ານກີບຕໍ່ປີ, ໃນປີ 2024-2025 ໄດ້ຂະຫຍາຍອອກຕື່ມ 1,500 ຕົ້ນ.