ຖືເປັນການບໍລິຫານຈັດການທີ່ມີຄຸນນະພາບສູງພໍສົມຄວນ ສໍາລັບໃນສົກປີ 2025 ຜ່ານມາ ຂອງສະຫະກອນສິນເຊື່ອ ແລະ ເງິນຝາກປະຢັດ ຫົວແຊຈະເລີນ ເມືອງບາຈຽງຈະເລີນສຸກ ແຂວງຈໍາປາສັກ ທີ່ຈໍານວນສະມາຊິກ, ເງິນຮຸ້ນ, ເງິນຝາກ ແລະ ເງິນກູ້ປ່ອຍໃຫ້ສະມາຊິກ ມີການຂະຫຍາຍຕົວເພີ່ມຂຶ້ນ ພ້ອມທັງມອບອາກອນກຳໄລໃຫ້ລັດ 641 ລ້ານກີບ.

ທ່ານ ໄຊຍາ ທໍາມະວົງແສງ, ຜູ້ອໍານວຍການສະຫະກອນສິນເຊື່ອ ແລະ ເງິນຝາກປະຢັດ ຫົວແຊຈະເລີນ ໄດ້ໃຫ້ສໍາພາດຕໍ່ສື່ຂ່າວໜັງສືພິມ ເສດຖະກິດ-ສັງຄົມ ເມື່ອບໍ່ດົນມານີ້ໃຫ້ຮູ້ວ່າ: ສະຫະກອນສິນເຊື່ອ ແລະ ເງິນຝາກປະຢັດ ຫົວແຊຈະເລີນ ມີຕົ້ນກຳເນີດມາຈາກ ກອງທຶນພັດທະນາບ້ານຫົວແຊ ເຊິ່ງສ້າງຕັ້ງຂຶ້ນຕາມແນວທາງນະໂຍບາຍຂອງ ພັກ-ລັດຖະບານ ເພື່ອເປັນສ່ວນໜຶ່ງໃນວຽກງານຫຼຸດຜ່ອນຄວາມທຸກຍາກຂອງປະຊາຊົນໃນຊຸມປີ 2005.

ພາຍຫຼັງເຄື່ອນໄຫວມາໄດ້ 3 ປີ ເຫັນໄດ້ວ່າ ກອງທຶນມີລັກສະນະເຕີບໃຫຍ່ ຂະຫຍາຍຕົວ ແລະ ມີທ່າແຮງ, ທາງຄະນະຜູ້ບໍລິຫານ ພ້ອມດ້ວຍສະມາຊິກກອງທຶນ ຈຶ່ງໄດ້ຂໍຂຶ້ນທະບຽນເປັນ ສະຫະກອນສິນເຊື່ອ ແລະ ເງິນຝາກປະຢັດ ເພື່ອຫັນເຂົ້າສູ່ລະບຽບຄຸ້ມຄອງຢ່າງເປັນລະບົບ ແລະ ມີມາດຕະຖານ. ໃນປີ 2008 ສະຫະກອນສິນເຊື່ອ ແລະ ເງິນຝາກປະຢັດ ຫົວແຊຈະເລີນ ໄດ້ຮັບການສ້າງຕັ້ງຂຶ້ນ ຕາມໃບອະນຸຍາດ ເລກທີ 03/ກຄທສ, ລົງວັນທີ 29/12/2008 ຈາກກົມຄຸ້ມຄອງສະຖາບັນການເງິນ ທະນາຄານແຫ່ງ ສປປ ລາວ. ຜ່ານການເຄື່ອນໄຫວມາເປັນເວລາ 15 ປີ, ໃນວັນທີ 10/02/2026 ຈຶ່ງໄດ້ຮັບໃບທະບຽນສະຫະກອນ ສະບັບເລກທີ 001/ກສຂ.ຈສ ຈາກພະແນກກະສິກຳ ແລະ ປ່າໄມ້ ແຂວງຈຳປາສັກ ຕາມກົດໝາຍວ່າດ້ວຍສະຫະກອນ.

ຕະຫລອດປີ 2025 ຜ່ານມາ ການໃຫ້ບໍລິການທາງດ້ານການເງິນຝາກ ແລະ ສິນເຊື່ອໄດ້ມີການຂະຫຍາຍຕົວຢ່າງຕໍ່ເນື່ອງ ປະຈຸບັນມີສະມາຊິກທັງໝົດ 4,749 ຄົນ ເພີ່ມຂຶ້ນ 672 ຄົນ, ຈຳນວນເງິນຮຸ້ນ ທັງໝົດ 13.4 ຕື້ກີບ ເພີ່ມຂຶ້ນ 15%, ຈຳນວນເງິນຝາກທັງໝົດ 61.2 ຕື້ກີບ ເພີ່ມຂຶ້ນ 40%, ຈຳນວນເງິນກູ້ປ່ອຍໃຫ້ສະມາຊິກ 59.2 ຕື້ກີບ ເພີ່ມຂຶ້ນ 18% ແລະ ສະຫະກອນໄດ້ມອບອາກອນກຳໄລ ໃຫ້ລັດ ຈຳນວນ 641 ລ້ານກີບ, ກຳໄລສຸດທິ 2.7 ຕື້ກີບ ເພີ່ມຂຶ້ນ 10%.

ທ່ານ ຜູ້ອໍານວຍການ ໃຫ້ຮູ້ຕື່ມວ່າ: ເຖິງແມ່ນວ່າ ສະພາບເສດຖະກິດໂດຍລວມຈະພົບຂໍ້ຫຍຸ້ງຍາກ ແລະ ສົ່ງຜົນກະທົບຕໍ່ການດຳເນີນທຸລະກິດ ກໍຄືການດຳລົງຊີວິດປະຈຳວັນຂອງສະມາຊິກ, ແຕ່ລະບົບຂອງສະຫະກອນ ພວກເຮົາແມ່ນໄດ້ເນັ້ນໜັກ "ການເພິ່ງຕົນເອງ, ກຸ້ມຕົນເອງ" ມາແຕ່ເລີ່ມຕົ້ນ. ພ້ອມກັນນີ້ ຍັງເນັ້ນຝຶກອົບຮົມໃຫ້ສະມາຊິກສ້າງແຫຼ່ງລາຍຮັບຫຼາຍທາງ ແລະ ມີວິນັຍທາງການເງິນ ເຊິ່ງສອດຄ່ອງກັບແນວທາງ ເສດຖະກິດເອກະລາດ ເປັນເຈົ້າຕົນເອງ (ສອຈ) ຂອງ ພັກ-ລັດຖະບານ ວາງອອກ ເຮັດໃຫ້ສະຫະກອນມີຄວາມໝັ້ນຄົງ ແລະ ຂະຫຍາຍຕົວໄດ້ຢ່າງແຂງແຮງ.