9 ເດືອນ ແຮງງານລາວ ຂຶ້ນທະບຽນໄປຕ່າງປະເທດ 71,345 ຄົນ, ແຕ່ພາຍໃນມີພຽງ 5 ພັນຄົນ

ສະພາບການເຄື່ອນຍ້າຍແຮງງານລາວ ຍັງຄົງເປັນປະເດັນຮ້ອນທີ່ສັງຄົມໃຫ້ຄວາມສົນໃຈຢ່າງສູງ. ລ້າສຸດ, ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ເປີດເຜີຍຕົວເລກສະຖິຕິການຂຶ້ນທະບຽນຜູ້ຊອກວຽກເຮັດງານທຳ ໃນໄລຍະ 9 ເດືອນຕົ້ນປີ 2026 ພົບຄວາມແຕກຕ່າງກັນຢ່າງຫຼວງຫຼາຍ ລະຫວ່າງ ຄວາມຕ້ອງການເຮັດວຽກຢູ່ພາຍໃນປະເທດ ແລະ ການອອກໄປເຮັດວຽກຢູ່ຕ່າງປະເທດ.

ອີງຕາມບົດຊີ້ແຈງຂອງ ທ່ານ ໂພໄຊ ໄຊຍະສອນລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ເມື່ອວັນທີ 7 ຕຸລາ 2026 ໃຫ້ຮູ້ວ່າ: ໄລຍະ 9 ເດືອນຕົ້ນປີ 2026 ມີແຮງງານລາວທີ່ມາຂຶ້ນທະບຽນຕ້ອງການມີວຽກເຮັດງານທຳທັງໝົດ 76,604 ຄົນ. ໃນນີ້, ຜູ້ທີ່ຂຶ້ນທະບຽນຕ້ອງການເຮັດວຽກຢູ່ ພາຍໃນປະເທດ ມີພຽງ 5,259 ຄົນ (ຍິງ 2,243 ຄົນ), ຫຼັກໆຍ້ອນບັນຫາຄ່າຄອງຊີບທີ່ສູງ, ເງິນກີບອ່ອນຄ່າ ແລະ ຄ່າແຮງງານທີ່ບໍ່ທັນສົມຄູ່ກັບຄ່າໃຊ້ຈ່າຍຕົວຈິງ.

ໃນທາງກົງກັນຂ້າມ, ມີຜູ້ຂຶ້ນທະບຽນ ຕ້ອງການໄປເຮັດວຽກຢູ່ຕ່າງປະເທດ ສູງເຖິງ 71,345 ຄົນ (ຍິງ 37,168 ຄົນ) ເຊິ່ງເປັນຕົວເລກທີ່ຫຼາຍກວ່າຄວາມຕ້ອງການເຮັດວຽກພາຍໃນ ເກືອບ 14 ເທົ່າ! ສະທ້ອນໃຫ້ເຫັນວ່າ ແຮງງານສ່ວນໃຫຍ່ຍັງມຸ່ງຫວັງໄປຊອກຫາລາຍຮັບທີ່ສູງກວ່າຢູ່ຕ່າງປະເທດ ເຊັ່ນ: ໄທ, ສ.ເກົາຫຼີ ແລະ ຍີ່ປຸ່ນ.

ຢ່າງໃດກໍຕາມ, ໃນໄລຍະ 9 ເດືອນດັ່ງກ່າວ ກະຊວງ ຮສສ ຜ່ານອົງການຈັດຫາງານລັດ ແລະ ເອກະຊົນ ສາມາດຈັດຫາວຽກເຮັດງານທຳໄດ້ທັງໝົດ 119,382 ຄົນ (ລວມທັງຜູ້ທີ່ຂຶ້ນທະບຽນ ແລະ ຜູ້ທີ່ເຂົ້າສູ່ລະບົບຈ້າງງານ). ໃນນັ້ນ, ຈັດຫາງານຢູ່ພາຍໃນປະເທດໄດ້ 15,772 ຄົນ ແລະ ຈັດສົ່ງໄປເຮັດວຽກຢູ່ຕ່າງປະເທດຢ່າງຖືກຕ້ອງຕາມກົດໝາຍໄດ້ 103,610 ຄົນ.

ເພື່ອແກ້ໄຂວິກິດການຂາດແຄນແຮງງານພາຍໃນປະເທດ, ລັດຖະບານ ແລະ ກະຊວງ ຮສສ ກຳລັງເລັ່ງຊຸກຍູ້ໃຫ້ບັນດາຫົວໜ່ວຍທຸລະກິດ ແລະ ໂຮງງານ ປັບປຸງເງື່ອນໄຂການເຮັດວຽກ, ເພີ່ມສະຫວັດດີການ ແລະ ສິ່ງອຳນວຍຄວາມສະດວກຕ່າງໆ ເພື່ອດຶງດູດແຮງງານລາວໃຫ້ເຮັດວຽກຢູ່ພາຍໃນຫຼາຍຂຶ້ນ. ພ້ອມດຽວກັນນັ້ນ, ກໍໄດ້ປັບປຸງລະບົບຈັດຫາງານອອນລາຍ, ແອັບພລິເຄຊັນເທິງມືຖື (Mobile App) ແລະ ເລັ່ງຈັດງານ "ນັດພົບແຮງງານ" ໃນຫຼາຍແຂວງທົ່ວປະເທດ ເພື່ອເຊື່ອມໂຍງຜູ້ຊອກວຽກ ແລະ ຜູ້ຈ້າງງານໃຫ້ມາພົບກັນໂດຍກົງ.

ຂ່າວ: ເສດຖະກິດ-ສັງຄົມ

แชร์