ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ປິດລົງດ້ວຍຜົນສໍາເລັດອັນຈົບງາມ

ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໄດ້ໄຂຂຶ້ນແຕ່ວັນທີ 5 ແລະ ໄດ້ປິດລົງຢ່າງເປັນທາງການໃນຕອນບ່າຍວັນທີ 21 ຕຸລາ 2026 ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໂດຍໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ, ທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ, ພ້ອມດ້ວຍບັນດາການນຳຂັ້ນສູງ, ສະມາຊິກສະພາແຫ່ງຊາດ (ສສຊ), ສະມາຊິກລັດຖະບານ ແລະ ແຂກຖືກເຊີນຢ່າງພ້ອມພຽງ.

ທ່ານ ສອນໄຊ ສີພັນດອນ ໄດ້ກ່າວສູນທອນພົດປິດກອງປະຊຸມວ່າ: ກອງປະຊຸມໃນຄັ້ງນີ້ ໄດ້ດຳເນີນດ້ວຍຄວາມຮັບຜິດຊອບສູງ, ເສີມຂະຫຍາຍສິດປະຊາທິປະໄຕ ແລະ ໄດ້ ບັນລຸຜົນສໍາເລັດຕາມຈຸດປະສົງລະດັບຄາດໝາຍທີ່ວາງໄວ້ ເຊິ່ງໄດ້ຮັບຮອງເອົາມະຕິກອງປະຊຸມສະພາແຫ່ງຊາດຈຳນວນ 17 ສະບັບ ເພື່ອເປັນບ່ອນອີງໃຫ້ແກ່ລັດຖະບານ ແລະ ພາກສ່ວນທີ່ກ່ຽວຂ້ອງນໍາໄປຈັດຕັ້ງປະຕິບັດ. ບັນດາເນື້ອໃນ ແລະ ມະຕິສຳຄັນທີ່ກອງປະຊຸມໄດ້ພິຈາລະນາ ແລະ ຮັບຮອງເອົາມີດັ່ງນີ້:
1) ກອງປະຊຸມໄດ້ພິຈາລະນາ ແລະ ເລືອກຕັ້ງປະທານສະພາແຫ່ງຊາດ ຊຸດທີ X ແລະ ທ່ານນາຍົກລັດຖະມົນຕີ ແຫ່ງ ສປປ ລາວ ຕາມລັດຖະທຳມະນູນ ແລະ ກົດໝາຍ ເພື່ອສືບຕໍ່ນຳພາ-ຊີ້ນຳການບູລະນະລະບົບອຳນາດລັດ ປະຊາທິປະໄຕ ປະຊາຊົນ ໃຫ້ໄປຕາມທິດພັດທະນາໃຫ້ປະເທດໃຫ້ມີຄວາມໜັກແໜ້ນ.
2) ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈຳປີ 2026 ພ້ອມທັງກຳນົດທິດທາງແຜນການ ປີ 2027 ໂດຍເສດຖະກິດປີ 2026 ຄາດວ່າຈະຂະຫຍາຍຕົວໃນລະດັບ 5.1% (ຕາມມະຕິສະພາແຫ່ງຊາດ 5.5%).
3) ກອງປະຊຸມໄດ້ພິຈາລະນາ ແລະ ຮັບຮອງເອົາບັນຊີຢາເສບຕິດທີ່ເກືອດຫ້າມ ແລະ ສານເຄມີທີ່ຖືກຄວບຄຸມການນໍາໃຊ້ ເພື່ອເປັນບ່ອນອີງໃຫ້ແກ່ການຄວບຄຸມ, ປ້ອງກັນ, ສະກັດກັ້ນ ແລະ ຕ້ານຢາເສບຕິດໃນສັງຄົມ.
4) ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2026 ແລະ ທິດທາງແຜນການເຄື່ອນ ໄຫວວຽກງານ ປະຈຳປີ 2027 ແລະ ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງ ປະຕິບັດແຜນງົບປະມານແຫ່ງລັດ ປະຈຳປີ 2025 ຂອງອົງການກວດສອບແຫ່ງລັດ ແລະ ບົດລາຍງານ ຂອງອົງການກວດກາແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2026 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2027.
5) ພິຈາລະນາ ແລະ ຮັບຮອງເອົາ ບົດລາຍງານຂອງ ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2026 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2027.
6) ພິຈາລະນາ, ຮັບຮອງເອົາບົດລາຍງານຂອງສະພາແຫ່ງຊາດ ກ່ຽວກັບການຈັດຕັ້ງປະຕິບັດ ແຜນການ ເຄື່ອນໄຫວວຽກງານ ປະຈຳປີ 2026 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2027.
7) ກອງປະຊຸມໄດ້ພິຈາລະນາ ແລະ ຮັບຮອງເອົາຮ່າງກົດໝາຍ ຈໍານວນ 8 ສະບັບ ດ້ວຍຄະແນນສຽງແຕ່ 90.96% ຂຶ້ນໄປ. ໃນນີ້ ມີກົດໝາຍສ້າງໃໝ່ 1 ສະບັບ ຄື: ກົດໝາຍວ່າດ້ວຍການປົກປ້ອງເງິນຝາກ ແລະ ກົດໝາຍປັບປຸງ 7 ສະບັບ ຄື: ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງໄຊເບີ, ກົດໝາຍວ່າດ້ວຍ ການຄວບຄຸມເຄື່ອງດື່ມທີ່ມີທາດເຫຼົ້າ, ກົດໝາຍວ່າດ້ວຍ ການຈະລາຈອນທາງບົກ, ກົດໝາຍວ່າດ້ວຍ ນາຍທະຫານກອງທັບປະຊາຊົນລາວ, ກົດໝາຍວ່າດ້ວຍ ກຳລັງປ້ອງກັນຄວາມສະຫງົບປະຊາຊົນລາວ, ກົດໝາຍວ່າດ້ວຍ ການບິນພົນລະເຮືອນ ແລະ ກົດໝາຍວ່າດ້ວຍ ກົດໝາຍວ່າດ້ວຍລັດຖະບານ.
ນອກຈາກນັ້ນ, ພາຍໃນກອງປະຊຸມຍັງໄດ້ຮັບຟັງການຊີ້ແຈງຕໍ່ຄໍາຊັກຖາມຈາກທ່ານນາຍົກລັດຖະມົນຕີ ແລະ ບັນດາທ່ານໃນຄະນະລັດຖະບານ ຈຳນວນ 11 ທ່ານ ກ່ຽວກັບບັນຫາເຄັ່ງຮ້ອນຕ່າງໆໃນສັງຄົມ ເຊັ່ນ: ການແກ້ໄຂບັນຫາເງິນເຟີ້, ການຄວບຄຸມລາຄາສິນຄ້າ, ການຄຸ້ມຄອງລົດບັນທຸກນໍ້າໜັກເກີນ, ການພັດທະນາຂົງເຂດສຶກສາ-ສາທາລະນະສຸກ ແລະ ການກະກຽມຮັບມືກັບໄພພິບັດທຳມະຊາດ.
ໃນຕອນທ້າຍຂອງກອງປະຊຸມ, ທ່ານ ປະທານສະພາແຫ່ງຊາດ ໄດ້ສະແດງຄວາມຂອບໃຈຢ່າງສູງ ຕໍ່ການຊີ້ນຳອັນໃກ້ຊິດຈາກກົມການເມືອງສູນກາງພັກ, ຄະນະເລຂາທິການສູນກາງພັກ, ຍ້ອນຄວາມຮັບຜິດຊອບຂອງລັດຖະບານ, ບັນດາອົງການຈັດຕັ້ງຂັ້ນຕ່າງໆ, ກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ໄດ້ຮ່ວມມືກັນຈົນເຮັດໃຫ້ກອງປະຊຸມປະສົບຜົນສຳເລັດຢ່າງຈົບງາມ, ພ້ອມນັ້ນ ທ່ານປະທານຍັງໄດ້ສະເໜີໃຫ້ທຸກພາກສ່ວນນຳເອົາມະຕິຂອງກອງປະຊຸມໄປຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈິງຢ່າງ ໃຫ້ມີປະສິດທິຜົນສູງສຸດ. 

ຂ່າວ: ສາວລາວໃຕ້

ພາບ:ສຳນານ, ໜັງສພິມວຽງຈັນໃໝ່

แชร์