ບໍລິສັດສິງກະໂປ ຕັ້ງເປົ້າຈະເພີ່ມສະມັດຖະພາບໃຫ້ສູນຂໍ້ມູນ AI ໃນມາເລເຊຍ

ສຳນັກຂ່າວສານຊິນຮວາລາຍງານໃນວັນທີ 20 ຕຸລາ ຜ່ານມາວ່າ: ບໍລິສັດ Aolani, ຜູ້ໃຫ້ບໍລິການ Neocloud ຫຼື ລະບົບໂຄງສ້າງພື້ນຖານຄລາວ ໃນສິງກະໂປ, ໄດ້ລົງນາມໃນໜັງສືສະແດງເຈດຈຳນົງເພື່ອສ້າງສະມັດຖະພາບດ້ານສູນຂໍ້ມູນປັນຍາປະດິດ (AI) ຂະໜາດ 500 ເມກາວັດໃນປະເທດມາເລເຊຍ, ໂດຍການດໍາເນີນງານຈະເລີ່ມຕົ້ນໃນເຄິ່ງທີ່ສອງຂອງປີ 2027.
 
ຂ່າວລະບຸວ່າ: ໃນວັນທີ 19 ຕຸລາ ຜ່ານມາ, ບໍລິສັດ Aolani ລະບຸວ່າ ສະມັດຖະພາບດັ່ງກ່າວຈະຖືກແຈກຢາຍຕາມສູນຂໍ້ມູນຫຼາຍແຫ່ງທີ່ມີມາດຕະຖານ Tier III ແລະ ຕິດຕັ້ງສູນຂໍ້ມູນປັນຍາປະດິດ (AI) ທີ່ສ້າງຂຶ້ນເພື່ອສະໜັບສະໜູນການຂະຫຍາຍໂຄງສ້າງພື້ນຖານ AI ແລະ ການນໍາໃຊ້ໜ່ວຍປະມວນຜົນກຣາບຟິກ (GPU) ຂອງ ບໍລິສັດ Aolani.
 
ບໍລິສັດ Aolani ວາງແຜນທີ່ຈະສະໜອງໂຄງສ້າງພື້ນຖານດ້ານ AI, ການນໍາໃຊ້ GPU ແລະ ຂໍ້ກຳນົດການດໍາເນີນງານສໍາລັບສູນຂໍ້ມູນເຫຼົ່ານີ້ ຊຶ່ງຈະເຮັດໃຫ້ສະມັດຖະພາບຕາມແຜນຂອງ ບໍລິສັດ Aolani ໃນມາເລເຊຍສູງເຖິງ 580 ເມກາວັດພາຍໃນປີ 2027, ເພີ່ມຂຶ້ນຈາກປະມານ 80 ເມກາວັດທີ່ວາງແຜນໄວ້ໃນປີ 2026.
 
ສະມັດຖະພາບທີ່ເພີ່ມຂຶ້ນນີ້ຈະສະໜັບສະໜູນກຸ່ມຜູ້ໃຫ້ບໍລິການພື້ນຖານໂຄງລ່າງດີຈີຕອນ ແລະ ສູນຂໍ້ມູນຂະໜາດໃຫຍ່ພິເສດ (hyperscaler) ແລະ ບໍລິສັດ AI ທົ່ວໂລກ, ພ້ອມທັງສະໜັບສະໜູນຄວາມຕ້ອງການດ້ານກຳລັງການປະມວນຜົນໃນທ້ອງຖິ່ນ.

แชร์